LECTURAS DEL JUEVES 2º TIEMPO ORDINARIO

LECTURAS DEL JUEVES 2º TIEMPO ORDINARIO

Ko’ágã  ñahendúta Tupã Ñandejára ñe’ẽ Samuel arandukápe oĩ háicha    18, 6-9; 19, 1-7

David ojuka rire Goliátpe ha ñorairõhárakuéra ou jevývo ñorairõhágui, opa Israel pegua távagui osé joa kuñakuéra mburuvicha guasu Saúl ruguaitĩvo. Vy’a pópe opurahéi hikuái ha ojeroky imba’e pararã rory ha iplatíllo púpe. Opurahéi ha ojeroky aja, kuña kuéra he’i jepi: Saúl ojuka 1.000 kuimba’e, David katu 10.000.

Kóva ombopochy eterei Saúlpe, ha he’i: Davídpe ome’ẽ 10.000 voi, chéve katu 1.000 añónte. Ko’ẽrõitéma omoĩne ichupe mburuvicha guasúrõ. Upévantema hemby!

Upe guive Saúl ndojeroviavéi David rehe.

Saúl he’i ita’ýra Jonatán ha opa mburuvichakuérape ojuka haguã Davídpe. Jonatán katu, ohayhu etereíva Davídpe, omomarandu, ha he’i ichupe: Che ru Saúl nde jukase hína.

Upévare epu’ã ko’ẽ mboyve tereho ekañy ha ani rejechauka. Asẽta aguata che ru ndive nde reimeha rupi ha añe’ẽta ichupe nde rehe, jahecha mba’épa he’i. Upéi aikuaaukáta ndéve.

Jonatán oñe’ẽ Saúlpe David rehe. He’i ichupe: Che ruvicha guasu, naiporãi rejapo mba’eve ivaíva ne rembiguái David rehe. Ha’e niko ndojapói va’ekue nde rehe mba’eve ivaíva, iporãvante uvei. Omoĩ niko hekove ojuka haguã pe filistéope, ha péicha Tupã Ñandejára omoakã rapu’ã Israélpe. Nde rehechávo upéva revy’a iterei va’ekue. Mba’ére piko ágä reñohése heko potĩva ruguy, rejukávo Davídpe rei ete asy?

Saúl ohendúvo Jonatán Ñe’ẽ he’i: Ñandejára rérape ame’ẽ che Ñe’ẽ David nomano mo’ãiha.

Upéi Jonatán ohenói Davídpe ha omombe’u ichupe opa mba’e. Ogueraha ichupe Saúl rendápe ha David opyta jevy Saúl ndive.

Tupã Ñandejára Ñe’ẽ.

SALMO ÑEMBOHOVÁI 55, 2-3. 9-12. 13

Opavave: Tupã Ñandejára rehe ajerovia ha iñe’ë  amomba’e.

Tupã che poriahuvereko opu’ãmba niko che rehe hikuái.

Ára pukukue che apére oiko hikuái, ha ojopy che ndive.

Umi che rayhu’ỹva oko’i che rehe, heta niko umi oñemoĩva che rehe. O.

Nde niko che resay remokã.

Noĩmbái nga’u piko ãva kuatiápe?

Umi che rayhu’ỹva oguevíne, ajerure vove ndéve che pytyvõ haguã. O.

Aikuaa porã Tupã Ñandejára oĩha che ndive.

Umi che rayhu’ỹva oguevíne,

Hese ajeroviáta ndakyhyje véima.

Máva piko ojapóta che rehe mba’eve? O.

Upéicha rupi aikóta Tupã Ñandejára renondépe,

ojeiko háicha ára sakãme. O.

ALELUIA  Cf. 2Tim  1, 10b

Aleluia.

Ñandejára Jesucristo ñane Pysyröhára ipu’aka manóre

ha ombojajái tekove, Marandu porã rehe ae.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha    3, 7-12

Upe ramo Jesús ha hemimbo’e kuéra heta Galileagua ndive oho yguasu rembe’ýpe. Oikuaávo umi mba’e ojapóva, oho hendápe heta Judeagua, Jerusalén, Idumea, Jordángui kuarahy resẽvo, Tiro ha Sidón pegua.

Upévare Jesús he’i hemimbo’ekuérape ogueru haguã ichupe peteĩ yga, ani haguã upe aty guasu ojopypa ichupe. Omonguera haguére hetápe, umi hasýva ojeitypa hi’ári opoko haguã hese. Ha umi mba’epochy ohechávo ichupe oñesũ henondépe ha osapukái: Nde hína Tupã ra’y! Jesús he’i ichupe kuéra ani haguã imandu’a hese avave renondépe.

Ñandejára Jesucristo Ñe’ẽ