Ñahendu Jesús. Lunes 4º Tiempo Durante el Año

Escucha el evangelio y la reflexión en: https://youtu.be/gmBirMkb27g

Lunes 4º Tiempo Durante el Año Marcos 5, 1 – 20

Jesús ha idisípulo kuéra ohasa rire Lágo Galiléa mboypýri, oñemboja hikuái pe y rembe’ýpe Gerasa rovái. Jesús oguejývo pe kanóagui, oñemboja hendápe peteĩ kuimba’e oîva Aña poguýpe. Sementériope niko oikóva ha’e, ha upégui osẽ Jesús rendápe. Ipochy jave avave ndaikatúiva ojoko chupe, kadénape oñapytĩ ramo jepe.

Hetáma oĩ oipokua ha oipykuáva chupe. Ha ojejokuaháicha omondohopa oĩva, ha avave ndaipu’akái hese. Ára ha pyhare osapukái oikóvo umi sérro ha seménteriore, ha hete ombohuguypa itápe.

Ha ohecha Jesúspe mombyry guive, ha pya’e ou oñesũ henondépe.

Jesús he’i chupe: — Nde, Aña, esẽ ko kuimba’égui.

Upépe pe demóño osapukái chupe: — Jesús, Tupã Yvagapegua Ra’y, maerãiko eju che myangekói. Ñandejára rérape ajerure ndéve, ani che mbohasa asy.

Jesús he’i chupe: — Mba’éicha nde réra.

Ha’e he’i: — Regimiénto che réra. Ha ore reta hína ore.

Ha ojerure Jesúspe ani haguã omosẽ chupe kuéra upe oikohágui. Ha namombyrýi upégui, pe sérro guýre, oĩ heta kure okarúva hína.

Umi demóño he’i Jesúspe: — Ore mondóna umi kurépe. Roikéta ipypekuéra.

Jesús oheja chupe kuéra oho. Ha umi demóño osẽ pe kuimba’égui ha oike umi kurépe.

Ha oĩ amo 2.000 kure rupi. Ha hetakue oho ojepoi ýpe, ha omanomba.
Jesús ojupi jeýtavo ikanóape, upe okuera vaekue ojerure chupe oheja haguã oho

hendive. Jesús katu ndohejái, ha he’i chupe: — Terehónte nde rógape. Tereho emombe’u nde rogaguápe mba’épa Ñandejára ojapo nde rehe, ha mba’éichapa imba’e porã nendive.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ajépa niko che irũ ha nde che reindy, pe Aña oikéramo ñande rekovépe, sarambikue ojapo ñande hegui. Ñanemoingo vai, ñanemoñorairõ, ñanembotarova, ñanembohasy ha yvýre ñanemopoñy. Péicha oiko pe kuimba’e oúva Jesús ojuhu pe sementério pe.

Jesús niko oñemboja ñande rehe, ou ñane rendápe heta tapére. Ha’e ou oike pe ñande javoráipe. Ñande reka. Ou ñane renohẽ haguã tujukuágui. Ñahendu iñe’ẽ, ñañembo’e ichupe, jaguata hendive ñane irũnguéra ndive komunidápe. Ha’e ñande joráta ohóvo umi demóño ñane apytĩvagui. Taheta heta háicha umi kure, ha’éva ñande vísio, ñane máña ha ñane rembiapo vaikue. Ha’e omosẽ ohóvo. Jesús ñanepohãno.

Omohenda ohóvo ñande rekove ha ñande reja py’aguapýpe ñane irũnguéra ndive.

Pa’i Jasy.