Ñahendu Hesu Ñe’ê. Viernes III de Cuaresma

Escucha el evangelio y la reflexión en: https://youtu.be/Dub3GJ8vEJc

Viernes III Cuaresma Marcos 12, 28 – 34

Upérõ peteĩ Moises léi ombo’éva ojapysaka hína ra’e umi mba’e saduséokuéra he’ívare Jesúspe. Upéi ha’e oñemboja Jesús rendápe ha oporandu chupe: — Mavaite piko hína pe mandamiénto tuichavéva opavavégui.

Jesús he’i chupe: — Pe mandamiénto tuichavéva niko he’i, “Ehendúke, Israel, Tupã Ñandejára niko peteĩnte. Ehayhu Ñandejárape nde py’aite guive, ne ánga rugua guive, ne ñe’ã guive, ha ne mbaretekue reheve.” Ha upéva riregua he’i kóicha, “Ehayhu nde rapichápe nde rejehayhuháicha”. Ndaipóri mandamiénto tuichavéva ko’ãvagui.

Upe Moises léi ombo’éva he’i chupe: — Oĩ porã maéstro. Añetéko upe eréva.
Ñandejára niko peteĩnte, ndaipóri ambue. Ha jahayhu vaerã Ñandejárape ñande py’aite
guive, ñane ñe’ã guive, ñane mbaretekue reheve, ha jahayhu vaerã ñande rapichápe ñande jupéicha. Umíva umi mandamiénto niko tuichave opa sacrifício jajapóva ha ofrénda ñame’ẽvagui.

Jesús, ohechávo pe Moises léi ombo’éva ombohovái porã hague chupe, he’i:
— Namombyrýi reime Ñandejára Rréinogui.
Upe rire avavéma noporandusevéi chupe mba’eve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’éichapa ojekuaáta ñande rehe jaikoha cristiano añetéicha. Ikatu ja’e: Ha jaha ramo tupaópe, mísa hápe térã celebración oiko jave. Ikatu avei ja’e, ñamyataindy ramo sánto kuérape ha ñamohunción hi’árape, jaguerohory ramo Tupãsy, ñañembo’e rosário. Jahayhu ramo karai Papa. Oiméne he’íva, jaike ramo grupo tupao guápe, movimiento kuérape. Ha katuete oje’éne avei: ñañemombe’u mante ha ñañemboja ramo ñakomulga ñande cristiano porã hína. Japurahéi térã jalee ramo Ñandejára ñe’ẽ misa hápe, ñaipytyvõ ramo ñande rapichápe, hamba’e.

Heta mba’e niko jajapóma ha jajapovéta gueteri hína cristiano rapére jaikóvo.

Ndaikatúi jepe niko jajapopa, tekotevẽ jaiporavo. Ha upévare ikatu porã ñande avei
ñaporandu, ou haguéicha Hesu rendápe ko tapicha oporandu, mba’épa añete upe ñamotenonde vaerãva, mba’épa hína pe tekotevẽva ha ndaikatúiva okañy ñande hegui.

Hesu ñanemomandu’a mba’etépa upe Ñandejára léi karaku: Ehayhu Ñandejárape nde py’aite guive, ne ánga ha ne arandukue reheve, ha ehayhu nde rapichápe ejehayhu háicha nde.

Péva jajapo ramo jajapopáma. Ha upévare imandu’a avei San Juan he’i ramo guare ndaikatuiha ja’e jahayhuha Ñandejárape, ndajahecháiva, ndajahayhúi ramo ñande rapicha jahechávape. Ha ndépa che irũ ha che reindy, mba’ete ndéve guarã hína pe Ñandejára léi tuichavéva ha emotenondéva nde rekovépe.

Pa’i Alberto Luna.