Ñahendu Jesús Ñe’ẽ. Domingo 5º Pascua

Escucha el evangelio y la reflexión en: https://www.youtube.com/watch?v=eaSDupv1JKk

DOMINGO 5º Páskua Ciclo B Juan 15, 1 – 8.

Jesús oñandúvo oguãhẽmaha ára ha’e ohejávo ko yvy oho haguã túva rendápe, he’i idisípulokuérape: Che niko ku parral máta ha’etéva, che ru katu iñangarekohára. Umi che rakã hi’a’ỹva ha’e oikytĩ. Hi’a ramo katu omopotĩ hi’ave haguã. Peẽ niko pene potĩmbáma umi mba’e ha’e vaekue peẽme rupi. Pejoaju che rehe, che ajoajuháicha pende rehe. Yvyra rakã niko ndahi’ái ha’eño rei, ndojoajúi ramo imátare.

Péicha avei peẽ, ndaikatu mo’ãi pejapo mba’eve ndapejoajúi ramo che rehe. Che niko pe parral máta, peẽ katu umi hakã. Pe ojoajúva che rehe ha che hese, upéva heta hi’áne. Che rehe’ỹ katu, peẽ ndaikatúi mo’ãi pejapo mba’eve. Pe ndojoajúiva che rehe oñemombóta umi yvyra rakã pirukuéicha oñembyatýva ojehapy haguã.

Peẽ pejoaju ramo che rehe ha napemboykéi ramo che ñe’ẽ, pejerure pejerureséva ha oñeme’ẽne
peẽme. Péicha ojehecháta che Ru tuichaha, peẽ pejapo ramo mba’e iporãva ha peiko ramo che disípulo
teéicha.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Pe ñande celular ningo ideprovécho ñandéve heta mba’erã, ajépa. Ikatu ñahenói ñane hénte mombyry oĩva ára ko’ẽre, térã katu ha’ekuéra ñanerenói. Ñañomomaitei, jajoecha, jaikuaa ojuehegui. Ñambohasa mensaje, foto, ta’anga’ikuéra ha mba’e. Ñanepytyvõ jajoaju haguã oñondive. La ivatería jepe ningo ndaitiro pukuetéi. Tekotevẽ jakarga meme, ani haguã ogue ñande hegui ñande volsíllope.

Jesús he’i ha’eha upe parral mátaicha ha ñande katu umi hakãicha. Jajoajúramo hese mante ikatúta hi’a porã ñande rekove. Ndajajoajúiramo hese katu ndaipóri káso. Ndajaha pukúi. Oguéta ñane rakã ha ipirúta. Ogue háicha ñande celular ndajakargáiramo pe elektrisida.

Mba’éichapa reñandu che reindy ha nde che irũ ikatuneha ejoaju Jesús re. Mba’éichapa ikatúne ha’e okarga ndéve la nde batería. Ani haguã nde pila’i nde jeroviápe, ani haguã ne kangy ejoaju haguã Ñandejára rapére comunidad-pe, nde rapichakuéra apytépe.

Oĩ ningo peteĩ mba’e Jesús he’íva tuicha ñanemboyvytúva: “Pejoaju che rehe, che ajoaju háicha pende rehe,” he’i. Ha’e ojoaju jepéma ñande rehe, he’i. Ojoaju mbarete ha ndopoi mo’ãi ñande hegui araka’eve. Ñande rehéntema oĩ jajoajuséramo hese. Ha’e oime ñanera’arõ. He’i háicha kuatia Apocalipsis (3,20) pe: “Péina ko aime ambota ne rokẽ ha roha’arõ. Reipe’áramo chéve aikéta ha jakarúta oñondive.”

ÑAÑEMBO’E OÑONDIVE

Ñandejára Jesucristo reiméva ore ykére opa araite, rejoaju mbaretéva ore rehe tuichaite ore rayhúgui, aníkena eheja rojei ha rojepo’o nde hegui. Toropyta katu nendive ore rekove hi’a porãite haguã. Amén.

Pa’i Alberto Luna.