Ñahendu Jesús Ñe’ẽ. Viernes 7º Tiempo Durante el Año

Escucha el evangelio y la reflexión en: https://youtu.be/WddczjuZ_jA

VIERNES 7º Durante el Año San Marcos 10, 1-12

Jesús osẽ Cafarnaúmgui ha oho Judea gotyo ha upéi katu ohasa Jordán mboypýri. Upépe heta jeýma umi ijatýva ijerére, ha oñepyrũ jey ombo’e chupe kuéra jepiguáicha. Oĩ mimi fariséokuéra oñembojáva Jesús rendápe ombopakova pireségui chupe hikuái.

Oporandu hikuái Jesúspe ikatúnepa ména kuéra opoi hembirekógui. Jesús he’i chupekuéra: — Mba’éiko he’i Moises léipe.

Ha’ekuéra he’i chupe: — Moises léipe niko he’i ikatuha japoi ñane rembirekógui ñame’ẽma guive chupe kuatia. Upéva reheve ñamosẽ kuaáma ñande rógagui.

Ha Jesús he’i chupekuéra: — Pende py’a hatãguinte Moises oheja vaekue peẽme upéva pe léi. Iñepyrũmbýpe niko Ñandejára ojapo vaekue kuimba’e ha kuña.

Upévare, kuimba’e oheja itúva ha isýpe, ha ojoaju hembireko ndive. Mokõivéva oiko peteĩcha. Ndaha’e véima mokõi. Upévare, umi Ñandejára ombojoaju va’ekue ndaikatúi avave oipe’a ojuehegui.

Oguãhẽ rire hikuái hógape, idisípulokuéra oporandu jey chupe ko’ã mba’ére. Jesús he’i chupekuéra: — Oimeraẽva opoíva hembirekógui ha upéi omenda jeýva, omyakãratĩ hína hembirekópe. Ha peteĩ kuña opoírõ iménagui ha upéi omenda jey, ha’e ave omyakã ratĩ iménape.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Jaikuaa niko oĩha omendáva oikóva oñondive omano meve. Opytáva iñe’ẽme ha oikóva ojuehe omboguata oñondive hóga, ifamilia ha oúva guive. Ha jaikuaa avei nameméi péicha oikoha. Oĩ omendáva tapére ojuejáva, ha opoíva ojuehegui.

Umíva apytépe oime ojavýva añete. Oime avei ojapurágui osẽ vaíva ha oime avei noñeha’ãiva voi opyta iñe’ẽme ha oúramo joavy ha jeiko asy ndoikuaasevéi ha opoi ojuehegui. Itíro mbyky voi ha ndogerreái oñomboguata haguã he’i haguéicha ojapotaha.

Umi ojuejávagui oime omenda jeýva ha oime avei opytáva imembykuéra ndive ha nomendavéi. Jesús he’i Ñandejára oipotaha ména ha tembireko ojoaju ha opyta oñondive hekove pukukue jave. Ha Ñandejára péicha oipota upéva ha’égui heta jehovasa rape ha iporãgui opavavépe guarã. Iporã ména ha tembireko peguarã, iporã ifamilia peguarã, ha iporã opavave ojeréva hese kuéra peguarã avei.

Mba’éicha tamora’e ikatu ñañopytyvõ ani haguã oñembyai ñande hegui ñande rogapy. Mba’éicha tamora’e ikatu jajapo che irũ ha nde che reindy ñaipytyvõ haguã ména ha tembirekópe opyta haguã iñe’ẽme ha ojoaju mbarete haguã ojuehe. Mba’épa reñandu.

Pa’i Alberto Luna.