LECTURAS DEL DOMINGO 23 FEBRERO
23 febrero, 2020LECTURAS DEL MARTES 25 DE FEBRERO
25 febrero, 2020LECTURAS DEL LUNES 24 DE FEBRERO
PRIMERA LECTURA:
Ñahendúta Tupã Ñandejára Ñe’ẽ Santiago ohai va’ekue 3, 13-18
Che pehẽnguekuéra:
Oĩrõ pende apytépe iñarandu ha oikuaapáva, to hechauka heko marangatu rupi ha ojejapo’ỹre, iñaranduha.
Pende py’aro ramo ha pejapo opa mba’e peñombohovái haguã, upéicharõ ndapereko mo’ãi mba’eve peje va’erã pende rehehápe ha ndaipóri mo’ãi pende pype upe añetegua.
Péichagua arandu ndoúi Tupã Ñandejáragui, upéva yvy ariguánte ha añágui oúva. Pene peẽntese ramo ha pepu’ã ojuehe, oĩta sarambi ha opaichagua teko aña. Umi oguerekóva arandu Tupã Ñandejáragui oúva katu heko potĩ, ndaipochy kuaái, ipy’a porã ha iñe’ẽ rendu kuaa. Upéicha avei, oporoporiahuverekokuaa, iñe’ẽ añete, ndahova mokõiri ha ojapo iporãva. Ha umi oñeha’ãva oporomoingo porã haguã, ku oñotỹva ramo guáicha py’aguapy omono’õ ichugui teko joja.
Tupã Ñandejára Ñe’ẽ.
SALMO ÑEMBOHOVÁI 18, 8-10. 15
R. Tupã rembiapoukapy ndaijojahái, ñane mbopy’a rory.
Tupã Ñandejára rembiapoukapy ndaijojahái, ñane mbopy’a rory.
Tupã Ñandejára rembiapoukapy ijeroviaha, oikuaa’ỹvape. R.
Tupã Ñandejára rembiapoukapy oĩ heko itépe, ñane mbovy’a.
Tupã Ñandejára rembiapoukapy hesakã, ñande resape’a. R.
Tupã Ñandejára Ñe’ẽ naimeguãi ha ndahekoviái.
Tupã Ñandejára rembiapoukapy ijeroviaha, opavave oĩ heko itépe. R.
To guahẽ porã ite ne rendápe, Ñe’ẽ osẽva che jurúgui
ha arekóva che py’a pýpe, che Jára che mo’ã ha che renohẽva jejopy vaígui. R.
ALELUIA Cf. 2Tim. 1, 10b
Aleluia.
Ñandejára Jesucristo ñane Pysyröhára ipu’aka manóre
ha ombojajái tekove oñembyai’ÿva, Marandu porä rehe ae.
Aleluia.
EVANGELIO
Ko’ágä ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese? 9, 14-29
Upe ramo guare ou jeývo Ñandejára oĩháme hemimbo’e kuéra, ohecha peteĩ aty guasu ojeréva hese kuéra ha Moisés rembiapoukapy mbo’eha oñoñe’ẽ apíva hendive kuéra. Ohechávo Jesúspe opavave oho pya’e huguãitĩvo ha ohecha ramo ichupe.
Ha’e oporandu ichupe kuéra: Mba’ére piko peñoñe’ẽ api hendivekuéra?
Peteĩ ha’e kuérava he’i: Ápe aru ndéve che ra’y, oguereko niko peteĩ mba’e pochy omoñe’ẽngúva ichupe. Mamo ha’e oĩháme pe mba’epochy oity ichupe yvýre, ijuru ryjuipa, omopururũ hãi nguéra ha hatãmba opytávo. Ajerure neremimbo’e kuérape omosẽ haguã ichugui pe mba’epochy ha ndaikatúi omosẽ.
Jesús he’i: Háa, tekove jerovia’ỹ! Araka’e peve piko aiméta pene ndive, araka’e peve piko aikóta pende reheve? Peru chéve pe mitã rusu.
Ogueraha hikuái pe mitã rusu Jesús rendápe. Pe mba’e pochy ohechávo Jesúspe katu, oityvyro pe mitã rusúpe ha upéva ho’a ojapajeréi yvýre, ha ijuru ryjuipa.
Jesús oporandu itúvape: Araka’e guive piko ojehu ichupe kóva?
Itúva he’i: Imitã guive.
Ha heta jevy pe mba’epochy oity va’ekue ichupe tatápe ha ýpe ojuka haguã. Oĩrõ ikatúva rejapóna ore poriahuvereko ha ore pytyvõmi.
Jesús he’i ichupe: Mba’ére piko ere ‘ikatúrõ’? Opa mba’e ikatu ojeroviáva peguarã!
Upérõ pe mitã rusu ru osapukái: Che ajerovia. Che pytyvõna ajeroviave haguã!
Jesús ohechávo hetaveha umi oñemboatýva, oja’o pe mba’epochýpe he’ívo:
-Espíritu Ñe’ẽngu ha rehendu’ỹva, ha’e ndéve resẽ haguã pe mitã rusúgui ha anive haguã reike pype.
Pe mba’epochy osapukái ha oityvyro jevy pe mitã rusúpe. Upéi osẽ ichugui ha oheja omanóva ramo, ha upévare heta oĩ he’íva omano hague. Jesús katu ipóre ipojáivo, omopu’ã ichupe ha pe mitã rusu oñembo’y.
Upéi Jesús oike peteĩ ógape ha hemimbo’e kuéra oporandu ichupe ha’eñoháme: Mba’ére piko ndaikatúi ra’e ore romosẽ pe mba’epochy?
Ha Jesús he’i ichupe kuéra: Koichagua mba’epochy, ñembo’e rupi ha karu’ỹme jehasa rupi mante ikatu oñemosẽ.
Ñandejára Jesucristo Ñe’ẽ