Ñahendu Jesús Ñe’ẽ. Lunes I de Cuaresma

Escucha el evangelio y la reflexión en: https://youtu.be/1esgYwlla98

Lunes I Cuaresma Mateo 25, 31 – 46.

Upérõ Jesús he’i: Ágã che ajuha ára mburuvicha guasúicha, aju va’erã Ñandejára ángelkuéra ndive. Ha ajúne aguapy karai guasúicha. Ha héntekuéra opa hendágui oúne oñembyaty che renondépe. Ha upépe che aipe’áta ojuehegui umi heko porãva heko vaívagui, ku ovecha rerekua oipe’aháicha ojuehegui ijovecha ha ikavara.

Umi heko porãva amoĩne che akatúa gotyo ha umi heko vaíva katu che asu gotyo. Upépe che ha’éta umi heko porãvape, “Peju, peẽme niko che ru pende rovasa. Peju ha peñemomba’e Ñandejára Rréinore, ha’e voi niko ojapo vaekue peẽme guarã iñepyrũmbýpe. Che ñembyahýi ramo guare niko, peẽ che mongaru va’ekue.

Che yuhéi ramo, peẽ che mboy’u. Ha aiko ramo mombyrygua ramo, peẽ che moguãhẽ va’ekue pende rógape. Che opívo ramo, peẽ che monde vaekue. Che rasy ramo, peẽ che andu. Préso ajereraha ramo, peho va’ekue che rendápe.”

Upévo, umi heko porãva he’íne chéve, “Ñandejára, araka’e piko rohecha neñembyahýi ramo ha romongaru. Araka’e piko rohecha nde yuhéi ha romboy’u.

Araka’e piko romoguãhẽ mbohupa ramo ore rógape. Araka’e piko nde opívo ha romonde. Araka’e piko ndéve rohecha nde rasy ramo, térã rejeapresa ramo ha roho ne andúvo.” Ha che ha’éne, “Añete ha’e peẽme, opa mba’e pejapo vaekue che ryvykuéra michĩvévare, che rehe pejapo ramo guáicha va’ekue.”

Upéi katu ha’éne umi heko vaívape, “Pejei chehegui. Ñandejára ojahéima pende rehe.
Tapeho pe tata ogue’ỹvape oñembosako’i va’ekue Aña ha iñirũ nguérape. Che ñembyahýi ramo, na che mongarúi va’ekue peẽ. Che yuhéi ramo, na che mboy’úi.

Che retãgui asẽ ramo, na che moguãhẽi vaekue pende rógape. Che opívo ramo, na che mondéi va’ekue. Che rasy ramo ha ajeapresa ramo, na che andúi vaekue peẽ.”

Upépe ha’ekuéra he’íne chéve, “Ñandejára, araka’eve niko ndorohecháiva neñembyahýi ramo, térã nde yuhéi ramo. Araka’eve ndoroikuaái resẽ hague ne retãgui térã nde opívo hague, térã nde rasy, térã reho hague préso.”

Ha che ha’éne chupekuéra, “Añete ha’e peẽme, opa umi mba’e ndapejapói vaekue peteĩva umi michĩvévare, che rehe ndapejapói ramo guaréicha.” Opa umi heko añáva oñehundíta aña retãme. Umi heko potĩva katu oguerekóta tekove opa’ỹva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jaikuaáma ñande rapicha ohasa asýva jatopáva ñande rapépe ha’eha Ñandejára Jesukrísto osẽ ramo guáicha ñane renondépe. Jajereréramo ha ñañembotavy chugui, Jesúgui jajere ha ñañembotavy ramo guáicha.

Ñama’ẽmína che reindy ha che irũ mávapa umi jaikuaáva apytépe oime oikotevẽvéva hína ñaipytyvõ, jaha jahecha, ñañandumínte jepe. Ikatúko péva hína upe ajúno térã upe peniténsia iporãvétava hína ñandéve guarã ko kuarésma rapére jahávo Semána Sánta gotyo. Ñambovevúi ñande rapichápe ijehasa asy, ha upekuévo ñambovevúi avei ñande
pekádo ha jajapo ñandéve guarã voi yvága rape.

Pa’i Alberto Luna.