Ñahendu Jesús Ñe’ẽ. Domingo 1º Cuaresma

Escucha el evangelio y la reflexión en: https://youtu.be/A2Ba-pqV5dc

Domingo 1º Cuaresma Ciclo A Mateo 4, 1 – 11

Upérõ Espíritu Santo ogueraha Jesúspe desiértope. Upépe, Aña oipy’a ra’ãta hína chupe. Ohasa rire 40 ára ha pyhare ho’u’ỹre mba’eve, Jesús oñandu iñembyahýi.

Upépe Aña oñemboja Jesús rendápe oipy’a ra’ã hag̃ua chupe, ha he’i: — Nde ramo añete Ñandejára ra’y, ere ko’ã itágui toiko pan.

Jesús katu ombohovái chupe:— Ñandejára Ñe’ẽme niko he’i, “Ndaha’éiko tembi’úgui añónte yvypóra oikovéva. Oikotevẽ avéko hikuái Ñandejára Ñe’ẽ.”

Upéi katu Aña ogueraha chupe Jerusalénpe, ha ohupi chupe pe tupao ru’ãme. He’i chupe: — Nde ramo añete Ñandejára ra’y, ejepoi oakãvo. Ñandejára Ñe’ẽme niko he’i: “Ñandejára omboúta hi’ángel kuéra oñangareko hag̃ua nde rehe. Ipópe nde rupíta hikuái ani hag̃ua reñepysãngánte jepe.”

Ojere Jesús he’i chupe:— Ñandejára Ñe’ẽme niko he’i avei, “Ani reipy’a ra’ã Tupã Ñandejárape.” Ipahápe, Aña ogueraha chupe peteĩ sérro yvate ru’ãme. Upégui ohechauka chupe opa tetã yvy ári oĩva, ha mba’e-mba’épa oĩ pype. Ha he’i chupe: — Ame’ẽmbáta ndéve umíva, reñesũ ramo che renondépe ha che momba’e guasu.

Jesús katu he’i chupe:— Eguata tereho ko’águi Sataná. Ñandejára Ñe’ẽme niko he’i, “Tupã Ñandejára año renondépente reñesũ vaerã, ha chupe añónte remomba’eva’erã”.

Upépe Aña oheja chupe. Ha og̃uahẽ Jesús rendápe Ñandejára ángelkuéra oipytyvõ chupe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’épa nde py’apy ha oraha nde py’a. Oimépa tembi’u, ao, óga, sogue. Mba’épa ndohejái emopa’ũmi ha ehendu Ñandejára Ñe’ẽ, eñembo’e ha eguata nde rapichakuéra ndive jerovia pópe. Ndaha’éi ko tyguatã añónte, ndaha’éiko plata heta, ao ha óga porã
añonte ñanemoingovéva he’i Jesús. Upe ñanemoingovéva añete hína ñahendu pe Ñandejára he’íva ñandéve ha ñapena hese.

Pe Aña niko ndaha’éi vícho mánso che reindy ha nde chirũ. Ha’e niko ñanera’ã ipy ha ipópe. Omboguejýta ñandéve yvága ñande resa renondépe ha ñanembojuru he’ẽta ñanemonge ha ñande reity haguã ivosápe. Ñandejára, Ánhel ha sánto kuéra jepe oĩ háicha ohenóita ñande kupylia haguã. Ñande jeheguínte hasy nunga jajehekýi haguã ichugui.

Ñahendu mba’éichapa Jesús oñemohatã Ñandejára ñe’ẽme, ha upéicha ombohovái Añáme oúva oityse ichupe. Ko Cuaresma pe ñande Iglésia ñanekonvida hína ñañembohapo mbarete Ñandejaŕa ñe’ẽrendúpe, ha upéicha ikatu ñande pu’aka ñande avei ha jajehekýi
Añágui, Jesús ojapo haguéicha.

Pa’i Alberto Luna.