Ñahendu Jesús Ñe’ẽ. Domingo de Ramos

Escucha el evangelio y la reflexión en: https://youtu.be/xamgwD0zv5c

Domingo de Ramos Ciclo A Mateo 21, 1-11.

Upérõ Jesús ha idisípulo kuéra oñemo’aguĩvo Jerusalénre, oguahẽ Monte de los Olívospe, Betfagé rovái. Upégui Jesús omondo mokõi idisípulope henonderã. He’i chupekuéra: — Tapeho peg̃uahẽ amóva amo puéblope.

Upépe pejuhúta peteĩ vúrro oñeñapytĩva hína, imemby reheve. Pejora ha pegueru. Ha oĩ ramo pende jokoséva peje chupe: “Ñandejára oikotevẽ hese”, ha ohejáta peẽme pegueru.

Ko’ã mba’e ojehu oiko hag̃ua ku proféta he’i va’ekue: Peje umi Jerusalénpe oikóvape: “Péina pépe pende rréi oúva hína vúrro ári. Ojejapo’ỹre ou hi’ári”.

Idisípulo kuéra oho, ha ojapo Jesús he’i haguéicha chupekuéra. Ogueraha hikuái pe vúrro imemby reheve Jesúspe. Ijapére katu omoĩ hikuái umi ijao ha Jesús ojupi hi’ári.

Jesús raperãme katu maymáva omyasãi ijao. Oĩma katu oikytĩva yvyra rakã hamba’e, ha oitýva hapépe. Umi henonderã ha hapykuépe ohóva katu oñemoĩ osapukái: Osána. Tojehovasa ko Ñandejára rérape oúva.
Toñemomba’e guasu Ñandejára rérape oúva. Ñandejára toñemomba’e guasu.

Jesús og̃uahẽvo Jerusalénpe, umi upépe oikóva ipy’a tarovapa. Heta oĩ oporandúva: — Mávaiko ko oúva.
Ha umi Jesús ndive ohóva katu he’i: — Kóva niko Jesús, ku proféta ou va’erãva Nazaret, Galiléagui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe vúrro ári oikova niko mboriahúguintema péicha oiko. Oreko rire kavaju térã áuto mba’e ndoho mo’ãi hína vúrro ári hénte apytépe. Ha mba’épa oiméne raka’e Hesu ohechaukase ojerurévo idisípulo kuérape peteĩ vurríto, oike haguã Herusalénpe.

Jaikuaa ningo ñande umi ikontrário kuéra ojerepaitemaha hese ojuka haguãicha. Tuicha jehasa asýpe oikéta hína Herusalénpe.

Ha’e katu oike Ñandejára rérape. Py’a porã ha mborayhu reheve ohenonde’a umi oúva ohundi haguã ichupe. Ha’e niko mboriahúicha ikangy, ndaikatúi voi omuña ha oguerosapukái avavépe mbarete ha ñorairõme. Ñanembo’e upéicha chirũ ha che reindy ñande avei ñane kangýramo jepe, ñambohovái va’erãha Ñandejára rérape pe kontrário vai mba’asýicha oúva ñandéve ñande reity haguã. Ñembo’e, jerovia, py’a porã ha mborayhu rupive mante ikatúta ñande pu’aka Aña rymba rehe.

ÑAÑEMBO’E OÑONDIVE

Ñandejára Jesukrísto, nde reñemopeteĩ vaekue umi imboriahu ha ikangyvéva ndive. Ejumi jeýna, ymave guaréicha, eike ore apytépe, ore róga ha ore vállepe. Eipe’a ore apytégui ñorairõ ha pochy, opaichagua mba’asy, ha ehechauka oréve mborayhu ha ñepytyvõ rape, ore rapicha rayhupápe, nde rejapo haguéicha. Amén.

Pa’i Alberto Luna.