Ñahendu Jesús Ñe’ẽ. Martes Santo

Escucha el evangelio y la reflexión en: https://youtu.be/gHHVx5gqqhQ

Martes santo                                                      

      Juan 13, 21-33. 36-38.

   Upérõ Jesús tuicha ojepy’apy, ha he’i opavave ohendu haguã: — Añetéko hína ha’e peẽme. Peteĩ oĩva ko pende apytépe che traisionáta hína.

    Jesús disípulo kuéra omañamba ojuehe. Ndoikuaái niko mávarepa oñe’ẽ hína.  Pe idisípulo Jesús ohayhuvéva, oguapy hína Jesús ykére osena aja hikuái.  Simón Pedro oñatõi chupe oporandu haguã Jesúspe mávarepa oñe’ẽ hína.  Oñembojave upémarõ Jesús rehe ha oporandu chupe: — Mbo’ehára, mávaiko hína.

   Jesús he’i chupe: — Amyakỹta pan pehẽngue ko tembi’u rykuépe, ha pe ambohasávape, upéva hína.

Upepete omyakỹ pe pan pehẽngue ha ombohasa Judas, Simón Iscariote ra’ýpe.  Ha Judas ipojáivo pe pan pehẽnguére, Aña oike ipy’apýpe.

Jesús he’i chupe: — Upe rejapótava kena pya’e ejapo.

   Ha umi mesápe oĩva apytégui, avave ndoikuaái mba’érepa Jesús oñe’ẽ Judáspe péicha.  Judas niko upe pláta ryru oguerekóva ijehe. Upévare, oĩ oimo’ãva Jesús he’i hague chupe oho haguã ojogua oñeikotevẽva Páskua areterã, térã oho haguã ome’ẽ mboriahúpe.

   Judas ho’u pe pan pehẽngue. Upéi katu osẽ oho. Pytũ ho’áma upérõ.

  Judas oho rire, Jesús he’i idisípulo kuérape: — Péina oñemomba’eguasúma ko kuimba’épe. Ha che rupi pehecháta Ñandejára oñemomba’eguasu.  Ha ikatúrõ ahechauka peẽme Ñandejára imba’eguasuha, Ñandejára ohechaukáta peẽme che avei chemba’eguasuha. Ha voiete ojapóta.  Che ra’y kuéra, nda che are mo’ã véima pene ndive. Peẽ che rekáne ágã, ha ha’e haguéicha umi poguasukuérape, ha’e avei peẽme ko’ágã. Che ahatahápe peẽ ndaikatu mo’ãi peho.

 Simón Pedro oporandu Jesúspe: — Mbo’ehára, moõ mba’e piko rehóta.

Jesús he’i chupe: — Che ahatahápe niko ndaikatúi ko’ágã reju che ndive. Upe rirénte rejúne ágã.

 Pedro he’i chupe: — Mbo’ehára, mba’ére piko ko’ágã ndaikatu mo’ãi aha nendive. Che niko amanóne nde rehehápe.

 Jesús he’i chupe: — Añetéiko ere remanóne haguã che rehehápe. Ha’éta ndéve peteĩ mba’e. Ágã pyhare gállo osapukái mboyve, mbohapy vése eréta nda che kuaaiha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Ñane kontrário niko ñane ra’ã ñande reity ñuhãme, ñane ra’arõ tape po’ípe, pévagui jakyhyje ha jaiko ñama’ẽ mombyry ani haguã ja’a ipópe. Pe ñande roguaygua, ñane irũ ha ñane hénte kuéragui katu nañaha’arõiete voi umíva, ha péicha hágui jaikuaa mba’éramo ñane irũ, ñande rógaygua opu’ãha ñande rehe kañyháme ñane traisiona, péva tuichaiterei oguapy ñande rehe, ñambyasy ha ñanembohasy.

Hesu oikuaa Judas, iñirũ peteĩ, ovendeha chupe mburuvichakuérape ojejuka haguã, ha péva ombopohyive ijehasa asy, Judas ha’e rupi peteĩ iñirũ ha’ete voi oiporavo ha ohenói va’ekue oiko haguã hendive.

Mba’etekópa hína che reindy ha nde che irũ reñandu reimeha nde jeroviápe. Moõ pevépa reime nde hína remoirũ haguã umi rehayhúva ohasa asy jave.

Pa’i Alberto Luna.