Ñahendu Jesús Ñe’ẽ. 6 agosto: Ñandejára mimbipa ára
6 agosto, 2024Ñahendu Jesús. Domingo 19º Durante el Año
10 agosto, 2024
Escucha el evangelio y la reflexión en: https://youtu.be/NCTbgapON1Q
Miércoles 18º Durante el Año Mateo 15, 21 – 28
Upérõ Jesús osẽ Genesarétgui ha oho oiko Tíro ha Sidón jerére. Ha peteĩ kuña Canaangua, upe rupigua, oñemboja Jesús rendápe. Osapukái chupe:- Karai, ndéko hína ku Mesías. Che poriahuverekóna. Che membykuña niko oĩ
demóño poguýpe, ha oguereko vai eterei chupe.
Jesús katu nopenái hese. Upémarõ idisípulokuéra oñemboja hendápe, ha he’i chupe:— Ehechána mba’épa oipota pe kuña. Osapukái niko oúvo ñande rapykuéri.
Upépe Jesús he’i chupe kuéra: — Ñandejára niko che mbou Israelguápente. Umíva niko ku ovecha herekua’ỹvaicha oiko.
Upe jave katu pe kuña oguãhẽ ha oñesũ Jesús renondépe, ha he’i chupe:— Karai, che pytyvõna.
Jesús he’i chupe: — Na’iporãi niko jaipe’a mitã jurúgui tembi’u ha ñame’ẽ jaguápe.
Pe kuña katu he’i chupe: — Añete niko pe eréva. Péicharõ jepe, jaguánte avei niko ho’u pe tembi’u rembyre ho’áva ijára meságui.
Upémarõ Jesús he’i chupe: — Tuichaite piko rejerovia che rehe. Pévare, toiko ndéve pe rejeruréva. Ha upete jave okuera imemby kuña.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Mitã hasyvove niko pe sy, térã aguéla pe oikovéva oñangareko hese. Ou ha oho, oheka ha ojapo pohã, oraha hospitálpe, oipohano, ojapichy, oñembo’e hese hamba’e.
Peteĩ kuña ndaha’éiva Israelgua oñemboja ojerurévo imemby kuña hasýva rehe, Jesús omonguera haguã. Jesús katu nopenái hese tenonderã.
Umi apostolkuéra katu omosẽse voi ichupe upégui. Kuña ningo oñemboykéva voínte ymaite guive ha ko’ýte kóva ko kuña ndaha’éiva judio-kuéra rehegua. Kóva ko kuña katu ndoguevíri ha ou ohenonde’a Jesús pe. Oñesũ voi henondépe ha ojerure ichupe oma’ẽ haguã hese pe imemby rehehápe.
Jesús oñe’ẽ pohýi imíramo jepe ichupe, pe kuña nosẽi upégui ha ojerure jevy jevy ichupe oipohano haguã imembýpe. Upépe ohechágui tuichaha pe kuña jerovia Jesús ome’ẽ ichupe pe ojeruréva. Ipu’aka hese ko sy imemby rayhupápe ojerure asýva.
Ko kuña py’a guasu ñanembo’e ñandéve che reindy ha nde che irũ, ñañorairõva’erãha ojehechakuaa haguã ñandéve ñane remikotevẽ hekoitépe guáva.
Ñamyangekoiva’erã Ñandejárape jepe ha ñande rapichakuérape avei jaguevi’ỹre, jajehova apíramo jepe, jahupyty peve pe ñanemba’éva. Jajeroviava’erã ikatuha japoko Ñandejára ha ñande rapicha py’áre ohechakuaa ha ome’ẽ haguã ñandéve upe ñande derecho, ha upe ñaikotevẽva.
Pa’i Alberto Luna.