Ñahendu Jesús. Domingo 19º Durante el Año

Escucha el evangelio y la reflexión en: https://youtu.be/xwp8wd3XXtI

Domingo 19º Durante el Año Ciclo B Juan 6, 41 – 51

Jesús he’i haguére “Che niko hína pe pan yvágagui oúva” oĩ judío kuéra oñepyrũva oñe’ẽ vai hese. He’i hikuái: — Kóva piko ndaha’éi Jesús, ku José ra’y. Jaikuaa niko mávapa isy ha itúva. Mba’éicha piko ko’ágã oúta he’i oguejy hague yvágagui.

Jesús he’i chupe kuéra: — Nápy pekirirĩ. Anive pengururu. Avave niko ndoúiri che rendápe ndoguerúi ramo chupe che Ru, pe che mbou vaekue. Ha oĩ ramo oúva, che amopu’ã jeýne chupe ára pahápe. Proféta kuéra kuatiápe niko he’i: “Ñandejára oheko mbo’éta opavavépe.” Aipóramo, oĩ ramo ohendúva che Rúpe ha ohejáva ha’e ohekombo’e
chupe, umíva oúne che rendápe.

Kóva nde’iséi oĩha ohecháva che Rúpe. Nahániri. Chénte, upe Tupãgui voi ajúva, pe ahecha vaekue chupe, ha ndaipóri avave. Añetéko ha’e hína peẽme. Pe ojeroviáva che rehe oikovéta opa ára guarã. Che niko hína pe pan oporomoingovéva. Pende ru kuéra ypykue niko ho’u vaekue mana pe desiértope, ha omano jeýnte vaekue hikuái. Che niko añe’ẽ hína peẽme ku pan rehe oguejýva yvágagui. Maymáva ho’úva upéva nomanói chéne.

Che niko pe pan oporomoingovéva, oguejýva yvágagui. Upéva pe pan ho’úva oikovéta opa ára guarã.
Pe pan che ame’ẽtava peẽme niko che rete voi hína. Ha che ame’ẽta opavave rehehápe, oikove haguã.
Ñandejára Jesucristo ñe’ẽ

ÑAMBOGUEJY ÑANDE REKOVÉPE…

“Apytáma mesaguýpe”. He’i ningo umi itapykuéva ha tembyre mante ohupytýva. Jagua ha mbarakaja niko umi opytáva jepi mésa guýpe ha opeskáva tembyrére py.

Ñandejára katu ndoipotái japyta mesaguýpe. Ha upévare ombou ñandéve Jesús yvágagui ñanemongaru haguã peteĩ tembi’u porãme. Péva ndaha’eihína ñanderyénte omyenyhẽva.

Nahániri. Jesús omoyguatã ñande py’a ha ñane korasõ. Pe pan Jesús ome’ẽva ñandevehína Ñandejára mborayhu, ojapóva ñande hegui ita’ýra ha tajýra. Péva ha’e tekove añete.

Jesús ombojoja hekove pan rehe. Ha’e ome’ẽ ha omboja’óva opavave oipotáva ha oñembojáva peguarã hese. Ohendúva iñe’ẽ, ojeroviáva hese, oguatáva Jesús irũramo, péva ohupytýta Jesús-gui tekove opave’ỹva. Ndopytamo’ãi mesaguýpe araka’eve. Péva pe pan Jesús ohejava’ekue oñemboja’o haguã ñandéve misahápe, che irũ ha che reindy, eucaristía-pe. Ñanemandu’ávo hese komunida ñembo’épe, ñande rapichakuéra apytépe.

ÑAÑEMBO’E OÑONDIVE

Ñandejára ore ru nde py’a porãitéva, ore rayhúgui eme’ẽva nde grásia opavavépe ohupyty haguãicha, ore rekombo’ekena roñembojávo misahápe rokaru Jesús ndive imesápe, roñeha’ã haguã avei ani haguã ore rapichakuéra opyta mesaguýpe. Amén.

Pa’i Alberto Luna.