Ñahendu Jesús Ñe’ẽ. Sábado 19º Durante el Año

Escucha el evangelio y la reflexión en: https://youtu.be/G5hdv3PmzVM

Sábado 19º Durante el Año. Mateo 19, 13 – 15

Upérõ ogueraha hikuái mitã mimi Jesús rendápe, ha’e omoĩ haguã ipo iñakãre ha oñembo’e haguã hesekuéra. Umi idisípulokuéra katu, omongavaju umi mitã oguerúvape.

Jesús he’i chupekuéra: — Peheja umi mitã tou che rendápe. Ani pejoko. Umi ha’ekueraichaguápe guarã niko hína Ñandejára Rréino. Ha omoĩ ipo iñakã árikuéra. Ha upéi katu ha’e osẽ oho upégui.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Oikóramo aty guasu upérupi ha oñeporandúramo hetápa umi ijatýva, sapy’ánte ñahendu oje’eramo: Sa’i la hénte, mitã meme la oĩva. Ha’ete voi ningo mitã ndaha’éiramo guaicha hénte, mba’éveramo guáicha. Ja’e voi ningo ave: mitã tavy piko mba’e ikatúta he’i. Ha upévare nañahendúi chupe kuéra, nañaporandúi voi katu sapy’ánte mba’épa oreko he’i haguã, mba’épa oñandu.

Jaikuaa ha ñahendu avei heta mitãre ojejahéi, ojereko asy ha oñembotapykueha. Oĩ avei omomba’apóva kakuaáramo guáicha mitãme, ha ohupíva ijapére ikatu’ỹva gueteri ohupi. Ha jaikuaa avei kakuaa tie’ỹ oiporúva mitãme hendape’ỹva ojapo haguã hesekuéra.

Mitã ikangýgui ha nda’ipuakáigui tuichavévare ombohovái ha ojehekýi haguã, ojeporu vai, oñenupa, oñembo’yke, ha ndoje’apói mávaramo. Ha Jesús ko’ápe oñemoĩ umi ikangyvéva ykére ha omoirũ chupekuéra, omoĩ ipo iñakã ári, omokunu’ũ, oañua ha ombojerovia chupe kuéra, oja’o apóstolkuéra omosẽséva ichupekuéra ha ipochýva mitãnguéra ndive.

Ñande jajapo háicha avei sapy’ánte. Mitã tepoti hamba’e niko oje’e ichupekuéra. Jesús katu he’i apóstolkuérape ani iñe’ẽ pohýi ha oja’o mitã haguérente, oheja haguã mitã nguéra oñemboja hese.

Jesús ohechauka ñandéve ñañemoĩ va’erãha mitã ikangyvéva ykére. Oikotevẽvéva, oñembo’ykéva, umíva ñande ñamoirũ vaerãha ha’e ojapo haguéicha. Ha he’ive avei ñandéve. Jaiko va’erãha mitãicha jaikeséramo Ñandejára Rréinope. Ha mba’éichapa ñande ave che reindy ha nde che irũ, ikatúne jaheja umi mitãnguéra, ñande rogagua ha ñande comunidagua, oñemboja Jesús re ha oikuaave ichupe.

Ikatúnepa ñama’ẽve hese kuéra, ñambo’e ichupekuéra oñembo’ekuaa haguã, jaraha Jesús rendápe omoĩ haguã avei ipo iñakã árikuéra ha ohovasa. Jahecha mávapa ikatu ombo’e ichupekuéra Ñandejára rape. Ani oikopa rei ñande hegui upérupi.

Pa’i Jasy.