Ñahendu Hesu. Miércoles Semana X TO

Escucha el evangelio y la reflexión en: https://youtu.be/FUZwrtHAdT4

Miércoles Semana 10^a TO                                           

       Mateo 5, 17 – 19

Upéro Jesús he’i idisípulokuérape: Ani peimo’ã che ajuha amboyke haguã Moisés mandamiénto, térã umi mba’e proféta kuéra ombo’éva ymaite guive. Nahániri. Ndajúi amboykévo umíva. Aju katu umíva ojehupa haguã hekoitépe.

Añetéko ha’e peẽme. Yvága ha yvy oĩ aja, mba’evete asy ndojepe’a mo’ãi Moisés mandamiéntogui, ojehupa peve pe ipype oĩva. Upévare, pe omboykéva Ñandejára mandamiénto ha ojapo’ỹva pe michĩvéva jepe, térã omboligáva hapichápe péicha ojapo haguã, upévata hína pe michĩvéva Ñandejára Rréinope.

Ha pe Ñandejára mandamiénto ojapóva haombo’éva hapichápe katu, péva tuicháta hína Ñandejára Rréinope.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            9 de junio 2010 omano raka’e Monseñor Ismael Rolón, Arzobispo Paraguaygua. Ñanemandu’ávo hese jaguerohory ñande py’aite guive hekove johéi pyre.

Jaguerohory hapykuere, jahechakuaa hetaite mba’e porã Ñandejára ñanembo’e va’ekue ko karai guasu marangatu rupive. Añete hápe ikatu ja’e hese pe Hesu he’íva: Upe Ñandejára mandamiento ojapo ha oporombo’éva, upéva tuicháta Tupã Ñandejára Rréino pe.

            Añete hápe avei he’i háicha Hesu, ha’e oñeha’ã va’ekue ojejapo haguã hekópe ñande léi yvy arigua, ojepy’apy jovái Ñandejára léi ha yvypóra léire, ohechakuaa rupi mokõivéva tekotevẽha oguata ojoykére. Monseñor Rolón ñanembo’e va’ekue ñambojerovia ramo Ñandejára léi, ñembo’e, tupao, ndaikatúi ñane pokarẽ ha jaiporu vai yvy arigua léi ñamo’ã haguã monda, japu, mbarete ha tekove vai.

            Oñandu pypukúgui upe Hesu oipotáva Monseñor Rolón nda’ipyta ryrýi va’ekue ombohovái haguã Stroessner jepe. Noñakãitýi henondépe. Ipy’aguasu va’ekue oñanduka haguã chupe ivaiha pe ojapóva omosẽvo Paraguáigui hetápe, ojukaukávo campesínope, omoingekávo cárcelpe ha oñemboharáivo heta tapicha mboriahúre.

            Monseñor Rolón ñanembo’e va’ekue cristiano ñañeha’ã vaerãha ñamboguejy pe Ñandejára léi ñanembo’éva, ñande rekovépe. Ñañeha’ã upe kuévo jajapo paite hekópe ñane retã léi, ani oĩ ñande apytépe opyrũva hapicháre, ani oĩ oñembo’ykéva. Upéva rangue jaheka jaiko py’aguapy ha teko jojápe oñopehenguéicha.

            Mba’épa che irũ ha nde che reindy ehecha ko ñane retãme ojejapo vaerã ha ndojejapóiva. Mba’épepa lo mitã opyrũ upe léire ha noponderái hapicháre. Ha mba’épa eñandu nde ñande cristiano tekotevẽ ñañeha’ã mbareteve oñemoañete haguã umi ñane retã léipe oĩmava, jaiko haguã Ñandejára oipota háicha.

Pa’i Alberto Luna.