LECTURAS JUEVES SEMANA XI TO

LECTURAS JUEVES SEMANA XI TO

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha   48, 1-14

Opu’ã maranduhára Elías tatáicha, iñe’ẽ ohapy tata rendýicha.

Ha’e ogueru hi’árikuéra ñembyahýi, ha ipochýgui omombovy ichupe kuéra.

Iñe’ẽ rupi Tupã Ñandejára nomongyvéi, ha mbohapy jevy omboguejy tata yvágagui.

Ajépa nde tuicha ite va’ekue, Elías, ne rembiapópe!

Mávapa ikatúta he’i ne mbojoja hague?

Nde remombáy va’ekue, peteĩ tetekue ha omanóva retãgui reru jevy va’ekue, upe Yvatetegua ñe’ẽ rupi, remongúi va’ekue mburuvicha guasu kuérape, ha poguasu kuérape reity va’ekue hupágui.

Rehendu va’ekue Sinaípe jeja’o, ha Horébpe ñenupã oútava.

Remoingo va’ekue mburuvicha guasu kuéra, omyengovia haguã heko ahẽvape iñaña nguére, ha maranduhára opyta haguã ne rendaguépe.

Yvytu ratã tata guiguáva nde reraha yvate kárro tatápe.

Nde rehe ojehai va’ekue reimeha reju jevy haguãicha rembovevyivévo Tupä Ñandejára pochykue, oguahẽ mboyve hi’ára, remoingo porã haguã túva ha ta’ýra oñondive remoatyrõ jevy haguã Israel retã.

Ovy’a ite va’erãpa umi nde recháva omano mboyve ha ko’yteve nde, reikovéva!

Elíaspe ogueroveve va’ekue yvytu tata, ha ijespíritu Eliséope opyta mbohapýgui mokõi.

Ha’e oikove aja ndaipóri va’ekue mburuvicha oguerekóva ichupe ápe ha pépe, ha ndaipóri hese ipu’akáva.

Ndaipóri ichupe guarã mba’eve ikatu’ỹva, ityvy guive jepe ojapo techapyrã.

Mba’e hechapyrãva oikove aja ha’e ojapo, ha omano rire mba’e ñaimo’ã’ỹva.

Tupã Ñandejára Ñe’ẽ.

SALMO ÑEMBOHOVÁI  96, 1-7

R. Tovy’ake hekojojáva Tupã Ñandejára renondépe.

Tupä Ñandejára mburuvicha guasu hína.

Ko yvy tuichakue tovy’a, umi yvy y mbyte rupi oĩva to vy’a.

Arai ypytũ oñuãmba ichupe, teko hekopegua ha teko joja

Iguapyha ramo oguereko. R.

Tata rendy oho henonderã ha ombokusugue ija’e’ỹha opa rupi.

Ára verápe ha’e ohesape opa mba’e,

yvy upéva ohechávo, osusũmba. R.

Umi yvyty araitýicha hykupa Tupä Ñandejára renondépe.

Ha’e opa ko yvy Jára hína, yvága heko joja omoherakuã

ha maymáva ohecha heko mimbipa. R.

ALELUIA   Rm 8, 15bc

Aleluia.

Peë  katu pehupity pe Espíritu ojapo pende hegui Tupã Ñandejára ra’y. Kóva ko Espíritu rehe ae ja’e Tupã Ñandejárape: “Háa che Ru!”

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha   6, 7-15

Upe ramo Jesús he’i hemimbo’ekuérape:

Peñembo’e jave ani pene ñe’ẽ heta rei, ojapo háicha umi Tupã Ñandejárare ojerovia’ỹva. Ha’e kuéra niko oimo’ã oñe’ẽ heta haguére Tupã Ñandejára ohendutaha ichupe kuéra. Ani pejapo ha’e kuéra ojapo háicha. Pende Ru niko oikuaáma voi pene remikotevẽ, peẽ pejerure mboyve ichupe. Upévare, kóicha peñembo’e va’erã:

“Ore Ru yvágape reiméva, to ñemomba’e nde réra marangatu.

Eju ore sãmbyhy, to jejapo ne rembipota yvy ári yvágape guáicha.

Eme’ẽ oréve ore rembi’urã ko árape guarã.

Eheja rei oréve ore rembiapo vaikue, ore roheja rei háicha opavave ore rehe ojapo vai va’ekuépe. Aníkena rehejátei rojepy’a ra’ã.

Ore pe’a uvei ivaívagui”.

Peẽ peheja rei ramo pende rehe ojapo vaívapa, pende Ru yvágape oĩva oheja reíta avei peẽme ivaíva pejapo va’ekue hese. Nda pehejái rei ramo katu, umi pende rehe ojapo vaíva, pende Ru oĩva yvágape ndoheja rei mo’ãi peẽme pene angaipa.

Ñandejára Jesucristo Ñe’ẽ.