Ñahendu Hesu. Jueves Semana 16a TO

Escucha el evangelio y la reflexión en: https://youtu.be/2qEcPCvmmmQ

Jueves Semana 16^a TO                                                   

    Mateo 13, 10 – 17.

Upérõ Jesús disípulokuéra oñemboja hendápe, ha oporandu chupe: — Mba’ére piko káso rupi meménte rembo’e.

Jesús he’i chupe kuéra: — Ñandejára niko peẽmente oikuaauka umi mba’e ñemimby Ñandejára Rréino yvága peguáre. Chupe kuéra katu niko nahániri. Upe heta oguerekóvape, oñeme’ẽvéta ha hembypáta chupe. Upe oguereko’ỹvagui katu, pe michĩmi oguerekóva jepe, ojepe’áta chugui. Ko’ãva niko omaña ramo jepe ndohechái, ha ohendu ramo ndoikéi chupe kuéra iñakãme. Upévare amombe’u chupe kuéra ko’ã káso. Ha péicha ou ojehu chupe kuéra ku proféta Isaías he’i vaekue:

Ko’ãva ohenduve ramo jepe ndoikuaa mo’ãi. Omañave ramo jepe ndohecha mo’ãi.Ko’ãva akãme ndoike véima mba’eve, ijapysa ha hesa omboty.

Péicha ojapo’ỹ rire hikuái ikatu vaerã mo’ã ohecha ha ohendu, térã ojecha kuaa, ha ojere ou che rendápe ha aipohano chupe kuéra.’

Peẽme katu niko Ñandejára pende rovasa. Peẽ niko pende resa tee rupi che recha, ha pende apysa tee rupi che rendu. Añete ha’e peẽme, heta proféta ha heta imarangatúva ohechase vaekue ko peẽ pehecháva ha ndohechái, ohenduse vaekue ko peẽ pehendúva hína ko’ágã ha nohendúi. 

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ ningo la itavýva, ndoikuaái ha ndopilláigui la oikóva opytáva pytũmbýpe, ha oĩ katu oñembotavýva, oikuaa porãva hína, ha oiko ku nohendúi ha ndoikuaáiramo guáicha. Umíva ári hína Hesu omboguejy proféta Isaías ñe’ẽngue, he’iramo guare: “Ko’ãva akãme ndoike véima mba’eve, ijapysa ha hesa omboty.”

Ha upéicha Hesu oñemoñe’ẽ ha ombo’e vove umi hénte kuérape káso rupive, oĩumioñembotavýva Hesu he’ívagui, ndopillái gua’u, ndohejaséi iguata tuja ha ojavy Ñandejára grásia. Ndaha’éi hína Hesu ndoikuaakaséiva ichupe kuéra. Ha’e kuéra hína la oñembotavýva. Ndoikéi hese kuéra vála.

Umi ndopillái ha oikuaaséva añete niko ou oporandu Hesúpe ha ha’e omyesakã ichupe kuéra. Upévare ningo Hesu he’iumi oñemoaguĩva hese, oguatáva hendive, umíva ohupyty véta ha okakuaáta, ochovíta Ñandejára mba’e porãgui, ha umi ombotýva ijapysa ha ipy’a katu ojavýta pe Ñandejára grásia, ha ipahápe opytáta nandi vera.

Sapy’ánte ñande ave che reindy ha nde che irũ, ikatu japyta pytũmbýpe ha ndajapillapái mba’etépa upe Ñandejára ohechaukaséva ñandéve. Upéicha jajetopáramo ikatu jajerure, ñaporandu Hesúpe ñembo’épe, tañane rekombo’e, tañande resape’a ha tomyenyhẽ ñande rekove imba’e porãgui.

Pa’i Alberto Luna.