Ñahendu Hesu. Domingo Semana 17a TO

Escucha el evangelio y la reflexión en: https://youtu.be/-u68O8yhPns

Domingo 17^a TO Ciclo A                     

                                           Mateo 13, 44 – 52

Upérõ Jesús he’i opavavépe:Ñandejára Rréino niko ojogua ku pláta yvyguy kokuépe oñeñotỹvape. Pe ojuhúva, oñotỹ jeýnte hendaguépe. Upéi katu, vy’apópe oho ovendepa opa mba’e oguerekóva ha ojogua pe yvy. Ñandejára Rréino ojogua avei ku ita jeguáre oñemúva oikóvo. Iporãve ha hepyvéva rekávo manté oikóva. Ágã ojuhu vove katu, oho ovendepa opa mba’e oguerekóva ha ou ojogua.

Ñandejára Rréino ojogua avei ku rred ýpe japoívape, ha oitýva opaichagua pira. Henyhẽ vove pirágui, ñambotyryry y rembe’ýpe ha upépe jaiporavo umi pira. Ñamoĩ ajakápe umi iporãva ha umi oje’u’ỹva katu ñamombo. Péicha avei ojehúta ágã ára pahápe. Ñandejára ángel kuéra osẽta oipe’a umi heko vaíva umi heko potĩva apytégui. Umi hembiapo vaíva ojeitýta Aña retãme, ha upépe ojahe’óta hikuái ha omopururũta hãi.

Jesús oporandu idisípulo kuérape: — Peikuaa piko mba’épa he’ise ko’ã mba’e.

Ha’e kuéra he’i chupe: — Roikuaa.

Upéi Jesús he’i chupe kuéra: — Opa oñemo’arandúva Ñandejára Ñe’ẽme ha oikéva Ñandejára Rréinope niko ojogua ku óga járape oguenohẽva ikarameguãgui mba’e ipyahúva ha itujáva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta niko jaikuaa ha ñahendúva umi pláta yvyguy ohekáva káso kuéra. Oime ningo umi ohekáva voi, oiko hatãva hapykuéri, ohóva oityka pruéva, ojo’óva voi katu pyharekue, ani haguã ojepilla. Ha oñemombe’u avei ningo umi ndohekáiva káso, ojuhúvanteva hapépe, ojo’óvo póso térã óga simiéntorã, ha oha’arõ’ỹete hágui otopa la imba’erãva ha irrikoite opytávo. Péicha he’i lo mitã: “la suérte ñagueroko’ẽnte”.

Ko’ápe Hesu omombe’u avei  kásope mokõi tapicha peichagua. Peteĩ ojuhu rei guasúvante kokuépe, oheka’ỹ etére ou otopa imba’erãva. Ha pe ambue katu oiko voi raka’e pláta yvyguy rekávo, ha ou ojuhu ñande rapicha. Mokõivévante ovy’a iterei rasa. Oho ovende orekóva guive ha ojogua ijyvyrã. Chéta avei ningo, ikatu ja’e ñande, ajépa che irũ ha che reindy.

Ha mba’épa hína amo ipahápe la jahekáva ha jaikóva ñaha’ã jahecha osẽpa ñandéve. Mba’épa upe nde reikóva hapykuéri ha rehupytysevéva nde rekovépe, nde képe jepe rehecháva. Hesu he’i pe tuichave mba’e -pe pláta yvyguy- ikatúva jajuhu ñande rekovépe hína jajuhu ichupe. Ha ichupe jatopáramo añete hápe, ñañandúramo mba’éichapa ñande rayhu, opa mba’e jareko ha jahupyty vaekue nañambojojái hese.

ÑAÑEMBO’E OÑONDIVE

Ñandejára Hesukrísto, reikuaa porãva mba’éichapa oraha ore py’a umi mba’e ko yvy arigua. Ejetopakami kena oréve roiko hárupi, ore rembiapo apytépe, roñandu pypuku haguãicha ne mborayhu tuichaitéva ha roñemosã mbarete haguã nde rehe. Amén.

Pa’i Alberto Luna.