Ñahendu Hesu. Santa Marta ára

Escucha el evangelio y la reflexión en: https://youtu.be/C-Q62PigWQw

29 julio: Santa Marta ára                                                                                                                                      Juan 11, 19 – 27.

 Upérõ heta Judeagua oho oñandúvo Marta ha Maríape ikyvy Lázaro omano haguére. Marta ohendúvo Jesús og̃uahẽha oúvo, osẽ huvãitĩvo. María katu opyta hógape. Marta he’i Jesúspe: — Mbo’ehára, reime rire ko’ápe niko che kyvy nomanói vaerã mo’ã. Aikuaa jepe niko Ñandejára ikatúne hag̃ua ome’ẽ ndéve oimeraẽ mba’e chupe rejeruréva.

   Jesús he’i chupe: — Nde kyvy oikove jeýta.

  Marta he’i chupe: — Che niko aikuaa ág̃a ára pahápe oikove jeytaha, opa umi omano vaekue oikove jeývo.

Upépe Jesús he’i chupe: — Chéko hína pe amoingove jeýva opa omanóva. Che rehe ojeroviáva, omano ramo jepe oikovéta. Ha opa oikovéva ha ojeroviáva che rehe, nomano mo’ãi araka’eve. Ndéiko rerovia ko’ã mba’e.

   Ha Marta he’i chupe: — Arovia che Jára. Che arovia ndeha pe Mesías, Ñandejára Ra’y, pe ou vaerãva ko yvy ári.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Oime niko ñande rapicha ñañandúva jahayhu ha ñande rayhúva avei. Jaikéva hógape ñande rógape guáicha, javy’áva oñondive, jaguapýva jaterere, ñañemongeta kyre’ỹ ha jajoecharamóva, ñañohenói ha jajoechaga’úva ndajajoechavéirõ. Nameméi ko upeichagua jajuhu. Ndareíri niko he’i Ñandejára ñe’ẽme: “Pe ojuhúva peteĩ angirũ ikatúvare ojerovia, upéva ojuhu pláta yvyguy” (Eclesiástico 6,14).

Ko árape -oguahẽ mbotávo angirũ kuéra ára- jaguerohory hína Santa Mártape. Ha’e niko María ha Lázaro reindy vaekue, oikómiva oñondive Betániape. Ha’e kuéra niko oguerohoryete ha omoguahẽ jepi Hesúpe hógape, namombyrýi opytáva tupao Jerusaléngui.  Ha Hesu niko ojepokuaaiterei jepe ha ohayhu voi ichupe kuéra. Ha oikuaa pype Hesu ha’e kuéra avei ohayhu ha ojeroviaha hese, oho jepi opyta okaru ha opytu’u upépe ijapóstol kuéra ndive.

Ha la Marta ningo Hesu ou vove hógape ndoikuaái mba’épa ojapóta oguerohory haguã ichupe, ou ha oho, ojapo tembi’u, omopotĩ ichupe koty. Ndaha’éi vaekue kuña opyta ha okirirĩnteva. Ha’e umi omýi ha he’íva rehegua pe oñandúva. Upévare ojeplaguea Hesúpe ikypy’y María noipytyvõiramo ichupe. Ha angete avei ñahendu mba’éichapa Hesu oguahẽvo, Lázaro omano riréma, pya’e voi osẽ henondépe he’i mba’érepa ndoúi hasýramo guare, ani haguã Lázaro omano.

Ha Hesu niko oikuáama Mártape ha la ilája, ndaipochýi hendive, oporandúnte ichupe ojeroviápa. Ha Marta he’i ojeroviaha hese ipy’aite guive. Ha pévante, che reindy ha nde che irũ, topyta ñandéve ko Santa Marta árape: toiko la oikóva, ani ogue ñande py’águi pe jerovia ñane angirũ kuéra rehe, ani ogue ñane korasõgui pe jerovia Hesúre, ñane angiru nañanderejáiva ha ipahápe ome’ẽtava ñandéve tekove opave’ỹva.

Pa’i Alberto Luna.