Ñahendu Jesús Ñe’ẽ. Domingo Semana 21º TO

Escucha el evangelio y la reflexión en: https://youtu.be/YGBWX3iVqGg

Domingo 21a TO. Ciclo A.           

                                        Mateo 16, 13 – 20.    

Jesús oguãhẽmbotávoma Cesaréa Filípope, oporandu idisípulokuérape:— Mba’éiko oje’e che rehe upe rupi. Mavaha che piko he’i hikuái.

He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva ndeha Jeremías térã ambue proféta.

Jesús oporandu chupe kuéra: — Ha peẽ piko mba’e peje. Mávaiko che.

Ha Simón Pedro he’i chupe: — Nde hína pe Mesías, Ñandejára oikovéva Ra’y.

Jesús he’i chupe: — Ñandejára ta nde rovasa ndéve Simón. Ndejeheguínte ndereikuaái va’erã mo’ãi kuri péva, che ru yvagapegua ndoikuaaukái rire ndéve. Ha ha’eve ndéve Pedro, nde réra niko he’ise ita. Ko ita ári amopu’ãta che iglésia, ha mano jepe nda’ipu’aka mo’ãi hese. Nde pópe amoĩta Ñandejára Rréino rokẽ reipe’a haguã. Ha opa mba’e nde emosãva ko yvy ári oñemosãta avei yvágape. Ha opa mba’e nde reheja reíva ko yvy ári, yvágape avei ojeheja reíta.

Upéi Jesús he’i idisípulokuérape ani haguã omombe’u avavépe ha’eha upe Mesías, Tupã rembiporavo.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñande niko sapy’ánte ñaporandu mba’épa oje’e ñande rehe. Mba’épa he’i lo mitã upérupi. Imandu’a porãpa ñande rehe térãpa mba’e. Ko’agã ningo ojejapo avei upe “evaluación” ojehecha haguã mba’épa opyta ñane rembiapokuégui, osẽpa upe jaipota háicha, ñande “objetivo” kuéra hamba’e, térãpa jajapi otroládo ha nosẽi upe jahekáva.

Hesu avei ojapo peteĩ evaluación karape ijapóstol kuéra ndive. Jahechápa mba’e opyta hikóni upe iñe’ẽnguégui, hembiapo kuégui, mba’épa he’i hese umi hénte upérupi.  Ñande avei ikatu jajapo upéva ñande válle, ñande comunida rupi.

Jahecha mba’épa he’i lo mitã ñande iglesia rehe, ñande kapilla, ñande katesímo, ñande celebraciónkuéragui. Mba’épa opyta, mba’épa he’i ñande rehe umi ñande recháva, ñane rendúva, ñande jeregua. Péva ikatu ñanepytyvõ jahecha haguã jaka’api porãpa hína térãpa ikarẽ la ñane líño.

Ipahápe katu Hesu oporandúma apóstolkuérape mba’épa he’i hese hikuái. Ha upéva, che reindy ha nde che irũ, oporandu ñandéve avei hína ko’ágã Hesu. Ha ndaha’éi hína ere haguã nde katekísta, pa’i, hermána, nde paíno, nembo’e va’ekue. Nahániri. Ko’ápe Hesu oikuaase mba’épareñandúva hese nde py’aite guive. Mávapa Hesu ndéve guarã. 

ÑAÑEMBO’E OÑONDIVE

Ñandejára Hesukrísto, nde niko eiporavo ha emoĩ vaekue itáicha San Pédrope, emboguapy haguã iñakã ári nde iglesia. Emohatãkena ore jerovia nde rehe, ani haguã ipu’aka ore rehe mba’eveichagua mba’e vai ko yvy ári. Ha taimbareteveore apytépe nemborayhu. Amén.

Pa’i Jasy.