Ñahendu Jesús Ñe’ẽ. Lunes Semana 22° Durante el Año

Escucha el evangelio y la reflexión en: https://youtu.be/mMhDRCSHCL0?feature=shared

Lunes Semana 22° Durante el Año

                                                                          San Lucas 4, 16 – 30

Jesús oho Nazarétpe, upe okakuaa haguépe. Ha pytu’uha árape, ojapo háicha jepi voi, oho tupaópe. Ha oñembo’y omoñe’ẽ haguã Ñandejára Ñe’ẽ, ome’ẽ chupe hikuái proféta Isaías kuatia. Ha oipe’ávo ojuhu he’ihápe: Ñandejára Espíritu ou chéve.

Che poravo haguére araha haguã marandu porã opa imboriahúvape.

Chéve che mbou aipe’ávo jejopýgui umi préso oĩvape, ahesape’ávo umi ohecha’ỹvape, ha ajorávo opa ohasa asýva.

Ha amyerakuã haguã «Oguãhẽmaha ára Ñandejára ñande salva haguã».

Upéi katu Jesús omboty pe kuatia, ombohasa jey pe ome’ẽ vaekuépe chupe, ha oguapy. Ha oñemañamba joa hese.

Upéi oñe’ẽ ha he’i: — Péina ko’ágã ou ojehu upe pehendu va’ekue.

Opavavénte oñe’ẽ porã Jesús rehe ha oguerohory umi mba’e he’íva. He’i hikuái ojupe:— Kóva piko ndaha’éi ku José ra’y.

Jesús he’i chupe kuéra: — Oime vaerã niko pejéta chéve: “Doctor, nde raẽna eñepohano ha ekuera”. Ha upéi ave pejéne chéve: “Umi mba’e rohendu vaekue rejapo hague ndaje Cafarnaúmpe, na ejapo avei ko’ápe, ko reikohápe”.

Jaikuaa niko ndaiporiha proféta ojererohorýva ivállepe. Yma proféta Elías oikovépe, ndokyvéi va’ekue mbohapy áño rasa rupi. Tuicha ñembyahýi ou va’ekue upérõ, ha heta omano. Ha hetárõ jepe kuña viúda Israélpe upérõ, Ñandejára nomondói va’ekue Elíaspe umíva rendápe. Omondo katu chupe peteĩ kuña Sareptagua rendápe, Sidón ypýpe. Umíva umi árape ave, heta va’ekue Israélpe umi lépragui hasýva. Eliseo katu omonguera peteĩmente, Naamánpe, Síriape oikóva.

Umi tupaópe oĩva hína upéva ohendúvo, ipochypa hikuái. Opu’ã ha omosẽ hikuái Jesúspe pe puéblogui. Ogueraha chupe hikuái pe sérro ru’ãme, upégui omyaña ha oity haguã chupe. Jesús katu oñembohape ipa’ũ rupi kuéra ha oguata ohóvo.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

Ñande niko jareko ñande róga, ñande barrio, ñane héntekuéra, ñande kakuaa irũngue hamba’e, ñande válle javy’aha. Jesús avei oreko raka’e iválle ha ihéntekuéra avei. Ha oho ndaje hendápekuéra Nasarépe omombe’u Ñandejára oiporavo hague ichupe omoguahẽ haguã opavavépe salvación, jehovasa tuicha ko’ãgama voi oñepyrũva.

Ha upevaite ha’e he’i hína ñandéve avei che reindy ha nde che irũ. Pe Ñandejára salvación ñande rekovépe, ñande rógape ha ñande vállepe, ndaha’éi ko’ẽrorã. Ndaha’éi uperirerã, ndaha’éi remano rirerã. Ko’ãgaite oñemoĩ hína Ñandejára ko iñe’ẽ rupive, nerenói ha nekonvida ejerovia mbarete haguã Jesúsre. Ehejáma haguã Ñandejára oike nde rekovépe ha ojevale nde rehe. Aníkena ñande jajapo avei upe ojapo va’ekue hese ivallegua, omuña ha ndoikuaaséi va’ekue ichugui mba’eve.

Pa’i Jasy.