MARTES SEMANA 24º DURANTE EL AÑO

MARTES SEMANA 24º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Corintos guápe 12, 12-14. 27-31a.

Che pehẽnguekuéra:

Yvypóra rete niko, oiko ramo jepe heta mba’égui, peteĩnte. Upéicha avei Cristo. Ha upéichaite avei opavave ñande, judío térã judio’ỹva, tembiguái térã tembiguai’ỹva, ñañe mongarai va’ekue  jaiko haguã peteĩ tete ramo, peteĩ Espíritu año rupi. Ha oñeme’ẽ opa ñandéve jay’u haguã upéva upe Espíritugui.

Ñande rete niko ndoikói peteĩ mba’éguinte, oiko heta mba’égui.

Néi, peẽko hína pe Cristo rete, ha peteĩ teĩ peẽ, umi hete rehegua oguerekóva ojapo va’erã. Tupã Ñandejára oipota va’ekue  heroviaha apytépe oĩ, tenondete, apóstolkuéra. Mokõiháme, maranduhára. Mbohapyhápe, mbo’ehára.

Upéi yvypóra ojapóva mba’e hechapyrãva, ha ambue oporo mongueráva, térã oporopytyvõva, térã oporosãmbyhýva, térã oñe’ẽva ñe’ẽ ojekuaa’ỹvape. Nda opavavéi apóstol, ha nda opavavéi avei maranduhára. Nda opavavéi mbo’ehára ha nda opavavéi ojapo mba’e hechapyrãva, nda opavavéi ipokatu omonguera haguã hasývape.

Ndaopavavéi avei oñe’ẽ ñe’ẽ ojekuaa’ỹvape, ha nda opavavéi ikatu omoesakã umi ñe’ẽ umíva. Peẽ peipota va’erã umi mba’e kuaa iporãvéva.

Che ahechaukáta peẽme peteĩ tape iporãvéva.

Tupã Ñandejára Ñe’ẽ.

SALMO ÑEMBOHOVÁI        99, 1-5

Opavave: Ñande, Tupã Ñandejára retãgua ha ovecha iñu megua.

To guerohory ko yvy Tupã Ñandejárape.

Pejapo vy’a pópe ichupe hembipota, peguahẽ hendápe sapukái rorýpe. O.

Peikuaa porãke: Ñandejára hína Tupã.

Ha’e ñande apohare ha ñande imba’e,

hetãgua ha ovecha iñu megua. O.

Peike hokẽ nguéra rupi pemboaguyjévo

ichupe, ha hóga guýpe purahéi reheve.

Pemboaguyje  ichupe ha héra perohory. O.

Tupã Ñandejára imba’e porãgui.

Imborayhu ndaijapýrai, ha heko jeroviaha opa árape guarã. O.

ALELUIA Lc 7, 16

Aleluia.

Peteï Maranduhára tuicháva osë ñende apytépe ha Tupã  Ñandejára ou ohecha hetäguápe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 7, 11-17

Upe ramo Jesús oho peteĩ táva hérava Naím. Heta oĩ ohóva hendive, ha hemimbo’ekuéra ave. Oguahẽvo upe táva ypýpe, ohecha oguerahaha hikuái oñotỹvo peteĩ omano va’ekuépe, peteĩ imenave’ỹmava memby peteĩ ete.

Heta oho hapykuéri. Ohechávo, Ñandejára oiporiahuvereko ichupe ha he’i:

Ani ne rasẽ. Pya’ete oñemboja ha opoko pe omanóva rupáre, ha umi ogueraháva hína, opyta. Jesús he’i pe omanóvape: Nde mitãrusu, ndéve ha’e: Epu’ã!

Upévo pe omanóva oguapy ha oñepyrũ oñe’ẽ, ha Jesús ome’ẽ isýpe. Ohechávo upéva, maymáva okyhyje ha oñepyrũ omomba’e guasu hikuái Tupã Ñandejárape. He’i hikuái: Peteĩ maranduhára mba’e guasúva ou ñande apytépe.

He’i avei hikuái: Tupã Ñandeajára ou oipytyvõvo hetã guápe. Ha Judá jerekuére ojekuaa opa mba’e Jesús ojapo va’ekue .

Ñandejára Jesucristo Ñe’ẽ