LECTURAS MIÉRCOLES SEMANA 24º DURANTE EL AÑO

LECTURAS MIÉRCOLES SEMANA 24º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Corintos guápe   12, 31-13, 13

Che pehẽnguekuéra:

Peẽ peipota va’erã umi mba’e kuaa iporãvéva. Che ahechaukáta peẽme peteĩ tape iporãvéva.

Añe’ẽ ramo opaichagua yvypóra ñe’ẽme, ha ta ñe’ẽ jepe ra’e umi Tupã Ñandejára remimbou ñe’ẽme, ha ndaporohayhúi, che ita pararã reínte térã umi ña’ẽmbe hyapupáva. Ha aporomomarandukuaa ramo, ha aikuaa opa Tupã Ñandejára rembipota ñemi, ha aikuaapa opa mba’e, ha ajerovia ramo ku yvyty jepe amomýi haguãicha, ha ndaporohayhúi, che ndaha’éi mba’eve.

Amboja’o ramo mboriahu kuérape opa mba’e arekóva, ha ame’ẽ ramo che rete jepe areko haguã mba’érepa añembotuicha, ha ndaporohayhúi, naiporãi chéve mba’evépe.

Japorohayhu he’ise jaropu’aka kuaa, ñande py’a porã, nañane mba’e potái, ndajajejapói ha nañañe mbotuichái, nañane tie’ỹi ha nañandénteséi, nañande pochýi ha nañande py’a rasýi avave ndive, ndajavy’ái mba’e vai apóre, javy’a teko jojáre. Japorohayhu he’ise jarohasa opa mba’e, jarovia opa mba’e, ñaha’arõ opa mba’e, jaropu’aka opa mba’e.

Mborayhu ndopa mo’ãi araka’eve. Peteĩ árape marandu oúva Tupã Ñandejáragui opáne, noñeñe’ẽvéi chéne ñe’ẽ ojekuaa’ỹvape, ha natekotevẽvéi chéne pe mba’e kuaáre. Marandukuaa ha mba’ekuaa niko naiporãmbái, ha opa va’erã oguahẽ vove pe iporãmba itéva.

Yma che mitã’íme añe’ẽ, aimo’ã ha ajepy’a mongeta va’ekue  mitã’ícha. Akakuaávo katu, aheja che rapykuévo umi mba’e mitã reheguáva. Ko’ágã  jahecha vai vai, ku ñane ra’ãnga jahechahápe jahecha ramo guáicha. Peteĩ árape katu jahecháne ha’e háicha ite. Che mba’e kuaa Ko’ágã  noĩmbái, ha oguahẽta ára ahechataha Tupã Ñandejára, ha’e che kuaa haguéicha opa ára guive.

Mbohapy mba’e oime opa árape guáva: jaroviáva, ñaha’arõva ha mborayhu. Ha pe tuichave mba’éva mbohapyve apytépe, mborayhu hína.

Tupã Ñandejára Ñe’ẽ.

SALMO ÑEMBOHOVÁI     32, 2-5. 12. 22

Opavave: Ovy’a upe tetã oguerekóva Tupã Ñandejárape ijára ramo.

Pemomba’e guasu Ñandejárape mbaraka púpe, árpa púpe, pepurahéi ichupe.

Purahéi pyahu pehenduka ichupe.

Pembopu porãke ha peguerosapukái ichupe. O.

Upe Tupä Ñandejára he’íva niko añete,

ha opa mba’e ojapo teko jeroviápe.

Ha’e ohecha ramo teko joja ha opa mba’e hendápe ojejapóva.

Yvy niko henyhẽ chovi imborayhúgui. O.

Ovy’a upe tetã oguerekóva Tupã Ñandejárape ijára ramo,

upe tetã ha’e oiporavo va’ekue  imba’e teerã.

Tupã Ñandejára, ne mborayhu ta ore añuãmba, upéva roha’arõ nde hegui. O.

ALELUIA Cf. Jn 6, 63c.68c

Aleluia.

Ne ñe’ẽ Ñandejára Jesucristo hína Espíritu ha Tekove;

Nde reguereko ñe’ẽ Tekove opa araguáva.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha      7, 31-35

Upe ramo Jesús he’i: “Mba’e rehépa ambojojakuaa yvypóra ko’ágägua? Mba’épepa ojogua? Ojogua umi mitã oguapýva oñemboharái pe okápe ha osapukáiva iñirũ nguérape: ‘Ore rombopu mimby, ha peẽ ndapejerokýi. Ropurahéi ñembyasýpe, peẽ katu napenerasãi.’

Ou niko Juan Bautista, ndokarúiva ha ndo’úiva vino, ha peẽ peje hese oguerekoha mba’epochy. Upéi aju che, yvypóraicha aju va’ekue, akarúva ha ha’úva vino, ha peẽ peje che rehe che karu ha che ka’uha, aikoha umi heko añáva ndive ha umi viru omono’õva Romape guarã ndive. Tupã Ñandejára arandu niko ojehechauka ñane rembiapokue rupi.”

Ñandejára Jesucristo Ñe’ẽ