LECTURAS JUEVES SEMANA 24º DURANTE EL AÑO

LECTURAS JUEVES SEMANA 24º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Corintos guápe  15, 1-11

Che pehẽnguekuéra: Ko’ágä  aipota pene mandu’a pe marandu aikuaauka va’ekuére peẽme. Kóva ha’e pe marandu porã peẽ pejapyhy porã va’ekue  ha oñemombarete porãhápe pende jerovia. Ko marandu porã rupi avei peñe pysyrõta, pene mbaretérõ ipype, pe che amombe’u haguéicha peẽme.

Upéicha’ỹrõ, perovia gua’u rei ra’e. Tenondete pombo’e va’ekue  pe ikuaapyrã chéve oñemoguahẽ va’ekue  ha’e háichaite: Cristo omano hague ñane angaipáre, he’i háicha Tupã Ñandejára Ñe’ẽ, ha’e oñeñotỹ ha oikove jevy mbohapy ára haguépe, omombe’u háicha avei Tupã Ñandejára Ñe’ẽ, ha ojehechauka hague Céfaspe ha upéi umi 12 hemimbo’épe.

Upéi ojechauka hetave 500gui heroviahápe, opavave nunga oikovéva gueteri, oime jepe omanóma va’ekue. Upéi ojechauka Santiágope, ha upéi apóstolkuérape.

Ipahávo ojechauka avei chéve, ajoguáva ku mitã hi’ara’ỹme ou va’ekuépe ko yvy ári. Che niko pe apóstolkuéra apytépe mba’evetevéva, ha ndaijái voi katu añembohéra apóstol, amuña vai va’ekue  niko Tupã Ñandejára iglésiape.

Opáichavo, che ha’e ko ha’éva, Tupã Ñandejára ipy’a porã rupi che ndive. Ha upe ipy’a porã hague ndopyta reíri. Amba’apo hetave katu ichuguikuéra. Ndachéi jepe, Tupã Ñandejárante, ipy’a porãgui, che pytyvõ va’ekue. Amo ipahápe niko, ta che ra’e, térã taha’e kuéra, kóva ha’e pe rombo’e va’ekue  ha peẽ perovia va’ekue .

Tupã Ñandejára Ñe’ẽ.

SALMO ÑEMBOHOVÁI      117, 1-2. 16-17. 28

Opavave: Pemomba’e guasu Tupã Ñandejárape, ha’e niko ipy’a porã

Pemomba’e guasu Tupã Ñandejárape, ha’e niko ipy’a porã ha imborayhu ndopái araka’eve.

Mayma Israelgua te’i:

“Tupã Ñandejára mborayhu ndopái araka’eve.” O.

Tupã Ñandejára ipyapýgui tuicha mba’e ojapo,

Tupã Ñandejára ipyapy mbarete, tuicha mba’e ojapo: che namanói chéne

aikovéta amoherakuã haguã upe Ñandejára ojapóva. O.

Nde niko Tupã che Jára, aguyjeve me’ë ndéve,

upévare romomba’e guasu.

Nde hína Tupã Ñandejára upévare rombotuicha. O.

ALELUIA Mt 11, 28

Aleluia.

Ñandejára Jesucristo he’i:

“Peju che rendápe mayma ikane’ö ha ojepy’apýva, ha Che pomombytu’úta”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 7, 36-50

Upe ramo peteĩ fariséo ojerure Jesúspe oho haguã okarúvo hógape, ha ha’e oho. Oguapy hína mesápe, ha peteĩ kuña reko vai oikóva upe távape voi, ha oikuaa va’ekue Jesús ohoha okarúvo pe fariséo rógape, oguahẽ peteĩ mbayru ipópe henyhẽva mba’e ryakuã porãgui. Ojahe’o ha oñesũ Jesús renondépe, ha oñepyrũ ojohéi umi ipy hesaýpe.

Upéi omokã jevy iñakã raguépe, ohetũ ha omona hese pe mba’e ryakuã porã.

Pe fariséo ojerure va’ekue  Jesúspe oho haguã okaru, ohechávo upéva, he’i ijupe: “Ko kuimba’e, maranduhárarõ añete, ohechakuaáta mba’éichagua kuña reko vaípa hina pe opokóva hese.”

Upépe Jesús he’i pe Fariséope: Simón, areko peteĩ mba’e ha’eséva ndéve.

Pe fariséo he’i ichupe: Ere katu chéve, mbo’ehára.

Jesús he’ive: Mokõi karia’y omoengovia va’erã peteĩ viru oiporuka va’ekuépe. Peteĩva ome’ẽ va’erã ichupe 500, ha pe ambue katu, 50. Ha ndaikatúigui ome’ẽ hikuái, pe viru porukaha oheja rei mokõivépe. Ko’ágä  ere chéve: mávapa umi mokõigui ohayhuvéne ichupe?

Simón katu he’i: Chéverõ guarã pe hetave oheja reí va’ekue  ichupe.

Jesús he’i ichupe: Añete ere.

Aipórõ, oma’ẽvo pe kuñáre, Jesús he’i Simónpe: Rehechápa ko kuña? Aike kuri nde rógape ha nereme’ẽi chéve y ajepyhéi haguã. Ko kuña katu, ombojahu che py hesaýpe ha omokã jevy iñakãraguépe. Nde na che retũi che momaiteívo.

Ha’e katu, aike guive ohetũ ha ohetũ che py mokõive. Neremoĩri che akãre mba’e ryakuã porã, ha’e katu oñohẽ mba’e ryakuã porã che pýre. Upévare ha’e ndéve umi heta heko vaikue ojeheja reipaha ichupe, oporohayhu eterei haguére. Pe heko vaikue ojeheja rei michĩvéva, sa’ive ohechauka imborayhu.

Upéi he’i pe kuñáme: Nde reko vaikue ojeheja reipa ndéve.

Umi ambue ojejerure hague oho haguã okarúvo, oñepyrũ oporandu ojupe:

Máva piko kóva angaipágui jepe oporopysyrõva?

Jesús katu he’ive, ojerévo pe kuña gotyo: Rejerovia rupi, reñepysyrõ. Tereho py’a guapýpe.

Ñandejára Jesucristo Ñe’ẽ