MIÉRCOLES SEMANA 27º DURANTE EL AÑO

MIÉRCOLES SEMANA 27º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Galacia guápe        2, 1-3. 6-14

Che pehẽnguekuéra:

Aha jevy Jerusalénpe Bernabé ndive, ha araha che ndive Títope. Aha, Tupã Ñandejára ohechaukágui chéve aha va’erãha. Ha upépe, ha’eñoháme umi oñemomba’e guasuvévape, amoesakã ichupe kuéra pe marandu pyahu amoasãiva umi judio’ỹva apytépe, ani haguã oimo’ã hikuái umi che ajapóva térã ajapo va’ekue  ajapo reiha.

Upéva rangue, ohecha kuaa hikuái Tupã Ñandejára ome’ẽ hague chéve che rembiaporãrõ amoasãi haguã pe marandu porã umi judio’ỹva apytépe. Pédrope oheja haguéicha hembiaporã omoasãivo umi judío apytépe.

Tupã Ñandejára voi niko omondo va’ekue  Pédrope apóstol ramo judíOkuérape, che mondo háicha avei apóstol ramo umi judio’ỹvape. Santiago, Cefas ha Juan, ojererekóva Tupã Ñandejára iglésia ruvicha ramo, ohecha kuaa hikuái Tupã Ñandejára ome’ẽ hague chéve ko tembiapo. Ha ohechaukávo ore rerekoha iñirĩ ramo, ore popyhy, che ha Bernabépe. Ha ojuhu porã hikuái ore rohóvo romba’apo umi judio’ỹva apytépe, ha’e kuéra omba’apo aja umi judío apytépe. Ojerurénte oréve ore mandu’a haguã mboriahúre, che ajapóva voínte.

Cefas oguahẽvo táva Antioquíape, ahova api ichupe ivaígui pe ojapóva. Ha’e iñepyrũrã okaru umi judio’ỹva ndive, oime peve oguahẽva Santiago remimboukuéra. Ha upépe oñepyrũ ojei ichugui  kuéra, okyhyjégui umi jeapi’oukáre oñemohatãvagui.

Ha umi ambue Tupã Ñandejára reroviaha judíova, Pédroicha avei hova mokõiva, oho hapykuéri, ha Bernabé jepeve oho hendivekuéra. Upévare, ahechávo ha’e kuéra ndoikoiha marandu porã añeteguáva rekópe, ha’e Céfaspe opavave rovake: “Nde, judíova, reiko hína ndaha’éiva ramo guáicha judío, mba’ére piko aipórõ, rejopyse umi judio’ỹvape oiko haguã judio ramo guáicha?”

Tupã Ñandejára Ñe’ẽ.

SALMO ÑEMBOHOVÁI      116, 1-2

Opavave: To momba’e guasu Tupä Ñandejárape

To momba’e guasu Tupä Ñandejárape

Tetã nguéra, maymáva to mbotuicha ichupe. O.

Ñande rayhu eterei niko ha’e, heko jeroviaha opa árape guarã.

Tupä Ñandejára to ñemomba’e guasu. O.

ALELUIA Rom 8, 15b

Aleluia.

Oñeme’ë va’ekue peëme ta’ýranga espíritu

he’iukáva ñandéve Tupã Ñandejárape ¡Abbá!, ¡ore Ru!.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha  11, 1-4

Peteĩ jevy Jesús oñembo’e hína peteĩ hendápe. Oñembo’epávo, hemimbo’e peteĩ he’i ichupe: Ore Jára, ore mbo’éna roñembo’e haguã, Juan ombo’e haguéicha hemimbo’ekuérape.

Jesús he’i ichupekuéra: Peñe mbo’évo, peje: Che Ru to ñemomba’e nde réra marangatu.

Eju ore sãmbyhy, ko’ẽ ko’ẽre kena eme’ẽ oréve ore rembi’urã.

Eheja rei oréve ore angaipa, ore roheja rei háicha opavave ore rehe ojapo vai va’ekuépe.

Aníkena rehejátei rojepy’a ra’ã!

Ñandejára Jesucristo Ñe’ẽ