DOMINGO VIGÉSIMO OCTAVO DURANTE EL AÑO

LECTURA PETEÎHA:
Ko’ágã ñahendúta Tupã Ñandejára ñe’ẽ Sabiduría arandukápe oĩ háicha 7, 7-11

Añembo’e, ha oñeme’ẽ chéve jeiko kuaa, ajerure asy ha oguejy che ári, pe arandu espíritu. Mburuvicha guasu guapyhágui ahayhuve, henondépe ndaha’éi mba’eve mba’e reta. Mba’eveichaguaita jeguáre nambojojái, óro jepeve ijyke rehe yvyku’ínte ha pláta katu hovái tuju rei.

Ahayhuve porã ha tesãigui, ha ára resakãgui ahayhuve avei, pe hendykue araka’eve ndopáigui. Chéve hendive ou opa mba’e porã, ipópe oguerekóva ndojepapakuaái.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 89, 12-17

Opavave: Ñandejára ore myenyhẽkena ne mborayhúgui.

Ehechauka oréve ore rekove mbykyha ikatu haguã ore akã guapy.
Ore Jára, eju ore rendápe! Araka’e peve piko reñeha’arõukáta?
Ore poriahuverekóna, ore niko ne rembiguái hína. O.

Ára ko’ẽ rehe ore myenyhẽ ne mborayhúgui
ikatu haguã orepy’a rory roikove aja pukukue.
Umi ára nde orembohasa vai hague rehe,
umi áño orejopy vai hague rehe, emyengovia oréve ára porãme. O.

Ne rembiguáikuéra apytépe tojehecha ne rembiapo,
ha ita’ýrakuéra apytépe nde reko mimbipa.
Ñandejára imba’e porãva ta ñande rovasa ha ta ñane pytyvõ
ñasẽ porã haguã opa mba’épe. O.

LECTURA MOKÕIHA:

Ko’ágã ñahendúta kuatia ñe’ẽ ojehai va’ekue Hebreoskuérape 4,12-13

Che pehenguekuéra: Ñandejára Ñe’ẽ niko oikove ha ipu’aka. Hãimbeve kyse puku hãimbe jováivagui, ha ojasuru ñande py’a ha ñande espíritu ipypukuvehápe, ñande py’apy okañyvehápe, ha oipyguara ñane remiandu ha ñande py’a oipotáva.

Ndaipóri okañýva Ñandejáragui, opa mba’e hesakã ichupe, ha ohechapa ñane rembiapo.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 5,3
Aleluia.
Ovy’a va’erã umi ohecha kuaáva imboriahuha ipy’apýpe, ichupekuéra guarã hína Ñandejára Rréino.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 10, 17-30

Jesús oguata jave ohóvo hína, odipara ou hendápe peteĩ kuimba’e. Oñesũ henondépe ha oporandu chupe: — Mbo’ehára marangatu, mba’éiko ajapo va’erã ahupyty haguã jeikove opave’ỹva.

Jesús he’i chupe: — Mba’éreiko ere che rehe che marangatuha. Peteĩnte niko oĩ imarangatúva, ha upéva Ñandejára. Reikuaapa porã niko Ñandejára mandamiénto. “Ani reporojuka, ani reporomyakã ratĩ, ani remonda, ani eñe’ẽ rei nde rapicháre, ani nde japu, ha emomba’e nde ru ha nde sýpe.”

Pe kuimba’e he’i chupe: — Opa umíva niko ajapóva voínte che mitã guive. Ha Jesús oma’ẽ porã hese. Ipy’aho hese. He’i chupe: — Peteĩ mba’énte rejapove va’erã. Tereho evendepa opa erekóva ha hepykue eme’ẽ mboriahúpe.

Péicharõ nde rríkota yvágape. Upe rire, eju che moirũ. Upéva ohendúvo, tuicha oguapy pe karia’ýre. Ñembyasýpe osẽ oho, kuimba’e
nde rríkova niko ha’e. Jesús ojere he’i idisípulo kuérape:— Ajépa hasy umi irríkovape oike haguã Ñandejára Rréinope.

Upéva ohendúvo hikuái, idisípulokuéra oñemondyipa. Jesús katu he’i jey voi chupekuéra: — Hasýko hína jaike haguã Ñandejára Réinope. Péicha-péichanteniko ndajaikéi. Ndahasyive vaerã ñambohasa ju resa rupi kavaju, irríkova oike rangue Ñandejára Rréinope.

Upéva ohendúvo hikuái katu, ko’yteve opondera joa, ha he’i ojupe:— Péicharõ piko máva ojesalváta.

Jesús oma’ẽ hesekuéra, ha he’i: — Yvypórape ijeheguínte, ndaikatúi.

Ñandejárape guarã katu ndaipóri mba’eve ikatu’ỹva.

Upémarõ Pedro he’i chupe: — Ore niko rohejapa opa mba’e ndéve romoirũ haguã.

Jesús he’i chupekuéra: — Añete ha’e peẽme, oĩ ramo ohejáva oimeraẽ mba’e che rehehápe, péva ohupytýta heta mba’e. Pe ohejáva hóga térã tyvýra, térã teindýra, túva, sy, hembireko, ita’ýra térã ijyvy, umi mba’e ohejáva rendaguépe oñembojo’áta chupe 100ve. Oikove aja voi oñeme’ẽta chupe opa umi mba’e.

Umíva pa’ũ rupi jepe oĩta oñemboharáiva hese. Omano rire katu, ohupytýta jeikove opa’ỹva.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesukrísto.