LECTURAS LUNES SEMANA 28º DURANTE EL AÑO

LECTURAS LUNES SEMANA 28º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Galacia guápe     4, 22-24. 26-27. 31-5,1

Che pehẽnguekuéra:

He’i Abraham ita’ýra hague mokõi: ijypykue peteĩ hembiguáigui, ha pe ambue katu hembireko teégui, ndaha’éiva hembiguái. Upe hembiguái memby ou yvypóra rekópe. Ha pe hembiguai’ỹva memby katu ou oiko haguã pe Tupã Ñandejára oñe’ẽ me’ẽ hague. Oime hína mba’épa he’ise upéva.

Umi mokõi kuña he’ise mokõi ñe’ẽ ñome’ẽ. Peteĩ, pe yvyty Sinaípe guare, upéva hína Agar, ha iñemoñarégui oikóva tembiguái.

Pe Jerusalén yvága pegua katu noĩri avave poguýpe, ha ha’e ñande sy hína. Tupã Ñandejára ñe’ẽ niko he’i: “Evy’áke nde kuña ikatu’ỹva ne memby, esapukái vy’águi, nde, na ne membýi va’ekue  araka’eve.

Pe kuña ojeheja rei va’ekue  imemby hetavéta kuña imena va’ekuégui.”

Ha upéicha, che pehẽnguekuéra, ñande ndaha’éi tembiguái memby, tembiguai’ỹva memby katu.

Cristo rupi ñane sãsõ. Aipórõ, peñe mohatãke upe sãsõme ha anive pe’a tembiguái reko, yvyra pohýi guýpe.

Tupã Ñandejára Ñe’ẽ.

SALMO ÑEMBOHOVÁI  112, 1-7

Opavave: Tupã Ñandejára réra to ñemomba’e guasu.

Tupã Ñandejára rehe ojeroviáva to momba’e guasu ichupe, to guerohory héra.

Tupã Ñandejára réra to ñemomba’e guasu, ko’ágä  ha opa ára. O.

Kuarahy osẽ guive oike peve héra to ñemomba’e guasu.

Ñandejára oĩ tetãnguéra ári, imimbikue yvága rehe iñasãi. O.

Tupã Ñandejára ichagua ndaipóri, ha’e oiko amo yvate, ha ojayvy omaña haguã yvága ha yvýre.

Yvýgui ha’e omopu’ã imboriahúvape, ha oikotevẽvape pe oĩ vaivehágui. O.

ALELUIA Cf. Sal 94, 8a. 7d

Aleluia.

Ani pemohatä pene korasö, pehendu uvei

Tupã Ñandejára ñe’ẽ.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 11, 29-32

Upe ramo ohechávo Ñandejára heta hetave ohóvo hese oñembojáva, ha ha’e oñepyrũ he’i ichupekuéra: “Tekove ahẽ ko’ágã guánte ojerure ohecha haguã mba’e hechapyrãva. Ndojehechauka mo’ãi peẽme mba’eveichagua mba’e hechapyrãva.

Tupã Ñandejára ohechaukáta peẽme maranduhára Jonás rehe ojapo haguéicha. Pe Jonáspe ojehechauka va’ekue  niko Nínivepe guarã mba’e hechapyrãva va’ekue. Upéicha avei che, yvypóraicha aju va’ekue, mba’e hechapyrãva hína opavavépe guarã.

Ñembojovakeha árape, oĩ marõ Tupã Ñandejára renondépe yvypóra ko’ágãgua, pe mburuvicha guasu kuñáva tetã Sebá pegua, opu’ã va’erã avei mbojovakeha árape, ha pene moĩ vaíta Tupã Ñandejára renondépe pene rembiapo vai haguére. Ha’e niko mombyry mombyryvégui oho va’ekue  ohendu haguã Salomón ñe’ẽ arandu. Ha che ha’e peẽme, peteĩ mba’e guasuvéva Salomóngui oĩhína ko’ápe ko’ágã.

Umi Ninivegua avei opu’ã va’erã pe ñembojovakeha árape, ojepyguarávo yvypóra rekovekue ko’ágä  guápe, pene moĩ vai haguã. Ninivegua niko ojere va’ekue Tupã Ñandejára gotyo ohendúvo Jonás marandu, ha pe ko’ápe oĩva hína mba’e guasuve Jonásgui.”

Ñandejára Jesucristo Ñe’ẽ