JUEVES 28º SEMANA DURANTE EL AÑO

JUEVES 28º SEMANA DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Éfeso guápe   1, 1-10

Che Pablo, Ñandejára Jesucristo Apóstol, ha’e oipota rupi, pomomaitei peẽme ha mayma oguerovíava Cristo Jesúspe. To guahẽ peẽme py’aguapy ome’ẽva Tupã ñande Ru ha Ta’ýra Jesucristo.

To ñemomba’e guasu Tupã, Ñandejára Jesucristo Túva. Cristo rupi niko ha’e ñande rovasa va’ekue  opaichagua jehovasápe yvágagui oúva reheve. Cristo rupi niko Tupã Ñandejára ñande poravo va’ekue  opa mba’e ojapo mboyve, jaiko haguã henondépe, ichupe oñemboyke va’ekue  ha imarã’ỹ vaicha.

Ha ha’e ñande rayhúgui, yma ite guive voi ñande poravo va’ekue, ñande rereko haguã ta’ýra tee ramo Jesucristo rupi, upéicha ojaposégui ha oipotágui.

Upéicha ha’e ojapo, opa árape ñamomba’e guasu haguã Tupã Ñandejárape imborayhu tuicha itére, ha heseve ñande rovasa haguére Ta’ýra ohayhu etéva rupi. Cristo rupi, ha rei ete huguy oñohẽ haguére, ñane pysyrõ ha ojeheja rei ñandéve ñane angaipa.

Tupã Ñandejára niko imba’e porã eterei ñane ndive ha ohekuavo ñande ári imborayhu. Ome’ẽ ñandéve arandu ha akã porã, ha oikuaauka ñandéve upe ha’e ojapótava ha avave oikuaa’ỹva. Ha’e imba’e porãgui, oñemoĩ va’ekue  ojapo haguã ko’ã mba’e Cristo rupi, ha omoĩ ára oguahẽ haguã hu’ãme upe ha’e oipotáva. Ha pe Tupã Ñandejára oipotáva niko kóva: Omboatypase Cristo poguýpe opa ite mba’e oĩva yvágape ha yvýpe.

Tupã Ñandejára Ñe’ẽ.

SALMO ÑEMBOHOVÁI     97, 1-6

Opavave: Tupã Ñandejára ohechauka ipokatu

Pepurahéi Tupã Ñandejárape purahéi pyahu,

mba’e hechapyrãva ojapógui ha’e.

Ipyapy mbarete ha imarangatúgui ipu’aka opa mba’ére. O.

Tupã Ñandejára ohechauka ipokatu, opa tetãme heko jojaha.

Imandu’a imborayhu ha heko jeroviaháre tetã Israel ndive.

Yvy jerekuévo ojehecha.

Tupã Ñandejára ipu’akaha opa mba’ére. O.

Yvy jerekuévo ojehecha Tupã Ñandejára ipu’akaha opa mba’ére.

To jererohory Ñandejára yvy jerekuévo, purahéi rory tosoro ha tojevy’a. O.

Árpa púpe Tupã Ñandejárape to jepurahéi,

mbaraka púpe ichupe to jepurahéi.

Turu ha trompéta púpe to jepurahéi Tupã Ñandejára,

ñande ruvicha guasu renondépe. O.

ALELUIA Jn 14, 6

Aleluia.

Ñandejára Jesucristo he’i:

“Che hína pe Tape, Añetegua ha Tekove.

Avave ndohói che Túva rendápe ndaha’éi ramo che rehe ae”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 11, 47-54

Upe ramo Jesús he’i fariséokuérape:

“Pejererekóke peẽ, pemopu’ãva ityvyrã umi maranduhárape, pende ru kuéra ypykue ojuka va’ekuépe. Péichape peẽ peikuaauka hína peimeha umi pende ru ypykuerakue ojapo va’ekue  ndive. Ha’ekuéra ojuka va’ekue umi maranduhárape, ha peẽ pejapo ityvyrã.”

Upévare, arandu guasuetépe he’i va’ekue  Tupã Ñandejára: ‘Amondóta peẽme maranduhára ha apóstol, ha oiméta pejukáva ha ambue peikóva pemuña.’

Umi yvypóra ko’ágã guápe, Tupã Ñandejára ojeruréta hepykue umi maranduhára ruguýre, oñeñohẽ va’ekue  oúvo ojejapo ñepyrũ guive ko yvy. Abel ruguy guive, Zacarías ruguy peve, ojejuka va’ekue  pe altar ha Tupã Ñandejára koty pa’ũme.

Aipórõ ha’e peẽme, Tupã Ñandejára ojeruretaha hekove kuéra repykuére opavave Ko’ágã  oikóvagui.

“Pejererekóke peẽ, Moisés rembiapoukapy mbo’eha, perekóva pende pópe peikuaa haguã Tupã Ñandejára, ha peẽ voi ndapeikuaái ha ndapehejái avavépe oikuaa ichupe.”

Jesús osẽvo upégui, umi Moisés rembiapoukapy mbo’eha ha umi fariséo ipochyeterei ha oñepyrũ oñatõi ichupe porandúpe. Omoñuhãse ichupe oity haguã ichupe iñe’ẽngue rupi voi.

Ñandejára Jesucristo Ñe’ẽ