Ñahendu Hesu. Domingo Semana 29ª TO

Escucha el evangelio y la reflexión en: https://youtu.be/OtmN69K1Og8

Domingo 29ª TO Ciclo A

Mateo 22, 15 –21

Peteĩ ára umi fariséo kuéra oñembyaty ombopakova pire hag̃ua Jesúspe. He’ikase chupe
hikuái mba’e he’i’ỹ vaerãva, omoĩ vai hag̃ua chupe. Omondo hikuái idisípulokuéra, ha umívandi umi Herodes rapykuéri oiko hatãva. He’i chupe hikuái: — Mbo’ehára, roikuaa niko nandejapuiha.

Hekoitépe niko eporombo’e Tupã rape. Roikuaa avei nerepenaiha umi mba’e nderehe oje’évare. Ha upéi ave, neremañái avavére rehecha hag̃ua mba’eichaguápa ha’e. Ore roikuaase mba’épa nde ere. Oĩ porã piko japaga impuésto Césarpe, térãpa nahániri.

Jesús katu ohecha kuaa omoñuhãseha chupe hikuái. Osẽ he’i: — Peẽ tekove ahẽ, rova
mokõi. Mba’éreiko pe che moñuhãse. Pehechauka chéve pe níkel peme’ẽva jepi.

Ha ombohasa chupe hikuái peteĩ. Jesús omaña hese, ha oporandu chupekuéra: — Máva
ra’ãnga ha máva réra piko ko oĩva hese.

Ha’ekuéra he’i chupe: — César.

Jesús he’i chupekuéra: — Néi, peme’ẽ Césarpe upe imba’éva, ha Tupãme upe imba’éva.
Ohendúvo upéva okirirĩmbaite. Oheja chupe, ha osẽ ohopa hikuái.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Umi mburuvicha omyakãva táva, departamento, tetã, ndaha’éi hína oiko haguã iñakãre. Ojapo va’erã hembiaporã léi ha constitución he’i háicha. Ha ñande jaikóva peteĩ távape, peteĩ tetãme, niko ñame’ẽ impuesto repy ikatu haguãicha upévagui ojejapo tape, escuela, centro de salud ha hetave mba’e ñaikotevẽva. Ñamomba’e ha ñaipytyvõ va’erã niko mburuvicha, ojapo haguã hekópe hembiapo. Ha ndojapóiramo ñañatõi ojapo haguã.

Umi Hesúpe oityséva niko ou gua’u oporandu ojepaga va’erãpa impuesto mburuvicha Rróma guápe. Jaikuaa niko mburuvicha Rromaygua ojopyha tetã Israélpe ha omoĩha hi’ári impuesto pohýi. Hesu he’íramo ojepaga va’erãha, opyta vaíta hetãgua ndive ha he’íramo ahániri katu ohóta hína ojagua hese hikuái mburuvicha Romayguápe.

Hesu katu ndo’ái ñuhãme. Opyta mbytépe, póncho jurúicha. Ha ñanembo’e japaga va’erãha impuestokuéra ha ñame’ẽ va’erãha umi léi he’i háicha. Upéicha che reindy ha nde che irũ. Ñande ruvicha kuéra apytépe oiméramo jepe omondáva, ñande jajapo va’erã hekópe upe otokáva ñandéve, ikatu haguãicha upéi ñarreklama upe ndojapóivape.

ÑAÑEMBO’E OÑONDIVE

Ñandejára Hesukrísto, nde niko rejúvo ko yvy apére reñeha’ã va’ekue ejapo paite upe ne
retã léi kuéra he’i háicha. Ore avei roñeha’ãse rojapo paite hekópe roiko haguã oñondive
peteĩ tetã opavave oiko porã hápe, Ñandejára oipota haichaite. Amén.

Pa’i Jasy