JUEVES SEMANA 34° DURANTE EL AÑO

JUEVES SEMANA 34° DURANTE EL AÑO

Ñahendúta Tupã Ñandejára Ñe’ẽ Apocalipsis arandukape oĩ háicha              

      18, 1-2. 21-23; 19, 1-3. 9a

Che, Juan, kóva rire, ahecha ambue Tupã Ñandejára remimbou oguejýva yvágagui; tuicha imburuvicha reko reheve ha ko yvy ojehesapepa imimbikuépe. Hatã osapukái:

“Ho’áma, ho’áma pe Babilonia guasu ete!

Oiko ichugui  mba’epochy róga, opaichagua espíritu ky’a rekoha, opaichagua guyra ky’a ha tymba iky’áva ha ñane mbojeguarúva rupa!

Upévo, peteĩ Tupã Ñandejára remimbou ipu’akapáva ohupi peteĩ ita, ha’etéva ita apu’a guasu avati mongu’iháre oĩva, ha opoívo pe yguasúpe, he’i: “Péicha re’áta hína, nde Babilonia, táva guasu, ha araka’evéma nderejehecha mo’ãvéi.

Araka’evéma umi nde okáre noñehenduvéi va’erã, árpa, mimby ha turu pu, ha ndaipóri mo’ã véima mba’eveichagua omba’apóva, ha noñehendu mo’ã véima pe ita avati mongu’iha ryapu.

Araka’evéma na nde resape mo’ãvéi mba’e rendy, ha noñehendu mo’ã véima ku ñemenda rehegua ayvu, jepevénte umi ne ñemuhára, tuichavéva yvy arigua va’ekue, ha opa tetãme rembotavy umi nde paje apópe.

Kóva rire, ahendu heta oñe’ẽ joáva yvágape, he’íva: “Aleluya!

Ñepysyrõ, vy’apavẽ ha pu’aka ñane Tupã Ñandejára mba’e.

Ha’e oporombojovake añetehápe ha heko joja, oinupã niko pe kuña reko vai guasu etépe omongy’áva heko vaípe opa yvypórape; omoengovia pype, umi Tupã Ñandejára rembiguái mano.”

Upéi he’i jevy hikuái: “Aleluya!

Hatatĩngue opa ára ojupi va’erã.”

Pe Tupã Ñandejára remimbou he’i chéve: “Emoĩ kuatiáre: ‘Ovy’a iténe umi ohóva pe Ovecha Ra’y menda karu guasuhápe.’” Ha he’ive: “Ko’ãva he’i Tupä Ñandejára Ñe’ẽ añetegua.”

Tupã Ñandejára Ñe’ẽ.

SALMO ÑEMBOHOVÁI   99, 1-5

Opavave: Ñandejára hína Tupã, ha’e ñande apohare ha ñande imba’e.

Yvy tuichakue pemomba’e guasu Tupä Ñandejárape.

Pejapo vy’a pópe ichupe hembipota,

peguahẽ hendápe sapukái rorýpe. O.

Peikuaa porãke: Ñandejára hína Tupã.

Ha’e ñande apohare ha ñande imba’e,

hetãgua ha ovecha iñu megua. O.

Peike hokẽnguéra rupi pemboaguijévo ichupe, ha hóga guýpe purahéi reheve.

Pemomba’e guasu ha pemomorä Tupã Ñandejárape. O.

Tupã Ñandejára imba’e porãgui.

Imborayhu ndaijapýrai, ha heko jeroviaha opa árape guarã. O.

ALELUIA Lc 21, 28

Aleluia.

Pende py’a guasúke ha pene akärapu’ä,

oguahëtama ára ñañe pysyrö haguã.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha.    21, 20-28

Upe ramo Ñandejára omombe’u hemimbo’e kuérape mba’éichatapa pe ijeju:

Pehechávo Jerusalén rehe ojerepa ñorairõhára aty, peikuaáke voi ete ntema oñehunditaha. Upéva pehecha vove, umi Judéape oikóva pya’éke toho to kañy yvytýre. Ha umi oĩva ñúme, ani oho jevy upépe. Ára oñeporo nupãtaha hína umíva, oikotaha opa he’íva Tupã Ñandejára Ñe’ẽ.

To jererekóke umi kuña, umíva umi árape hye guasúva térã imemby kambúva! Hetáta ñembyasy tetã tuichakue, ha peteĩ ñenupã nde vaíva ho’áta opavavére. Oiméta ojejukáva kyse pukúpe, ha oiméta ojereraháva tembiguáirõ opa tetã rupi. Ha umi heko jeroviaha’ỹva opyrũta Jerusalén rehe oguahẽ peve ichupe kuéra hi’ára paha.

“Heta mba’e ojehu’ỹva ojehecháta kuarahy, jasy ha mbyjakuéra rehe ha yvy ári. Tetã nguéra ipy’a tarovapáta ha oñemondyipáta pe yguasu ryapu vai opu’ã mbávagui. Yvypórakuéra ipy’a manombáta kyhyjégui, ojepy’a mongetávo opa ojehútavare. Ha opa mba’e yvágape oĩva okuchupáta. Ha upépe ojehecháta Tupã Ñandejára ra’ýpe, yvypóraicha ou vaekuépe, ou ramo peteĩ arai ári tuicha pokatu ha mimbipápe. Oñepyrũvo oiko ko’ã mba’e, pejeroviánteke ha pemopu’ã pene akã. Pya’etéma peñe pysyrõtagui.”

Ñandejára Jesucristo Ñe’ẽ.