LECTURAS: JUEVES 4º DURANTE EL AÑO

LECTURAS: JUEVES 4º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe     12, 18-19. 21-24

Che pehẽnguekuéra:

Peẽ napeñembojái va’ekue, umi Israel guáicha, peteĩ mba’e ikatúvare ojepoko ha hendy va’ekue hína tatáicha, oĩhápe pytũ ha yvytu ratã. Ha napehendúi avei pe turu pu ha Tupä Ñandejára Ñe’ẽ. Umi ohendu va’ekue upe ñe’ẽ, ojerure asy va’ekue anive haguã oñe’ẽ ichupe kuéra, Ha oporomondýi eterei rupi upe ojehecháva, Moisés voi he’i: “Aryrýi hína kyhyjégui.”

Peẽ katu, upéva rangue, peñemboja yvyty Sión rehe ha pe Tupã oikovéva táva guasúpe, Jerusalén yvágape guápe, ha heta iterei Tupã Ñandejára remimbou oñemboatyhápe. Ha avei umi Tupã Ñandejára ra’y aty tenondeguáre, hérakuéra oĩva yvágape.

Peñemboja Tupã Ñandejárare, opavavépe mbojovakéva, ha umi yvypóra marangatu espíriture, Tupã Ñandejára omoporã añete va’ekuére. Peñemboja Jesús rendápe, oñe’ẽva ñande rehehápe Ñe’ẽ ñome’ẽ pyahurã ha pe tuguy ñane mopotĩvare. Upéva niko ome’ẽta ñandéve tuichave mba’e Abel ruguykue ome’ẽvagui.

Tupã Ñandejára Ñe’ẽ.

SALMO ÑEMBOHOVÁI 47, 2-4. 9-11

R. Ajépa tuicha ite Ñandejára, Tupãme jaropurahéi va’erã.

Ajépa tuicha ite Ñandejára, Tupãme jaropurahéi va’erã, itáva ha ijyvyty marangatúpe.

Ajépa iporã iteyvyty Sión, amo yvate gotyo opu’ãva.

Opa ko yvy niko ombovy’a. R.

Ajépa iporã iteyvyty Sión, amo yvate gotyo opu’ãva.

Opa ko yvy niko ombovy’a, upépe oiko mburuvicha guasu tuichavéva. R.

Tupã Ñandejára omo’ã opa ite hendápe oguahẽvape,

Tupã, óga guasúpe oikóva, kóicha ojekuaauka.

Upe rohendu va’ekue, upéva rohecha, Tupã, Ñandejára ipu’akapáva távape. R.

Tupã Ñandejára, ne mborayhu rehe ore mandu’a tupaópe.

Tupã Ñandejára, opa rupi ne rerakuã, ha maymávante ne momba’e.

Teko joja mante heñói nde pógui. R.

ALELUIA        Mc  1, 15

Aleluia.

Tupä Ñandejára Sambyhy hi’aguï. Peguerovia Marandu Porä.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha   6, 7-13

Upe ramo Ñandejára ohenói umi 12 hemimbo’épe ha oñepyrũ omondo ichupekuéra mokõi mokõi, ha ome’ẽ ichupe kuéra pokatu ipu’aka haguã mba’epochýre. He’i ichupekuéra ani haguã ogueraha mba’eve tapére guarã, yvyra ipo peguánte. Ndoguerahái va’erã ijaviorã térã viru. Ikatu omonde sapatu, ijao jopyrurã katu ani ogueraha.

He’i ichupekuéra: Upe óga peike haguépe peiko haguã, pesẽtaha árape peve peikóta. Ha na pene moguahẽséi ramo térã na pene renduséi ramo katu, pesẽ pe óga térã pe távagui, ha peityvyro pende pýgui pe yvytĩmbo oikuaa haguã upéva maranduha Tupã Ñandejára oinupãtaha ichupe kuéra.

Upérõ osẽ hikuái hemimbo’ekuéra he’i haguã opavavépe ojevy haguã Tupã Ñandejára gotyo. Omosẽ avei heta mba’epochy, ha omonguera heta hasývape omonávo hese kuéra ñandyry.

Ñandejára Jesucristo Ñe’ẽ