LECTURAS: VIERNES III DE CUARESMA

LECTURAS: VIERNES III DE CUARESMA

Ko’ágã   ñahendúta Tupã Ñandejára ñe’ẽ Oseas arandukápe oĩ háicha       14, 2-10

Tupã Ñandejára he’i:

Ejevýke Israel Tupã nde Járape, re’a va’ekue niko ne rembiapo vaikuére!

Tapeho jevy Tupä Ñandejára rendápe ha peje ichupe: Eheja reíkena oréve ore rembiapo vaikue, ha ehendu ore ñe’ẽ.

Asiria ndaikatúi orepe’a ivaívagui, kavaju ári jepe norokañy mo’ãi.

Ndoro’e mo’ãvéi “Ore Jára”, mba’eve rojapo va’ekuépe ore po rupi. Nde mante voi, ore Jára, reiporiahuverekóva tyre’ỹme.

Tupä Ñandejára he’i: “Aipohanóta ichupe kuéra heko pu’ãségui. Ahayhúta ichupe kuéra, iñaña ramo jepe, ojeíma ichugui  kuéra che pochy.

Israelpe guarã che ysapýichata, ha ha’e asusénaicha ipotýta, hapo imbaretéta, Líbano yvytýicha.

Hakã nguéra ojepysóta, olívo rakã porãicha ha hyakuãta, kuri’y Líbanope guáicha. Israel che pepo guýpe oñemo’ã jevýta, upérõ ha’e kuéra trígotýicha okakuaáta, parraltýicha ipotýta ha herakuã mombyrýta Líbano pegua vínoicha.

Efraín he’íta upérõ: ‘Ndaikuaase véima mba’eve tupã gua’úgui’.

Che voi añangareko che retãguáre ha ahayhu ichupe kuéra!

Che pype ojuhúta opa oikotevẽva”.

Umi iñarandúva ha iñakã guapýva, toikuaa ko’ã ñe’ẽ: Tupä Ñandejára rape naikarẽi, ha umi imarangatúva, upe rupi oguata, iñañáva katu upe rupi tuicha oñepysãnga.

Tupã Ñandejára Ñe’ẽ.

SALMO ÑEMBOHOVÁI   80, 6c-11ab. 14. 17

R. Nga’u ñahendu ko árape Tupã  Ñandejára ñe’ë

Ahendu oñe’ẽ ha he’íva: Che aipe’a mba’e pohýi nde apégui

ha nde po ojei opyta umi mba’e pohýigui.

Che renói rejejopy vai jave ha che roipytyvö.  R.

Ambohovái ne mba’e jerure ára sunu ryepy guive

nde che mbopochy ramo jepe Meribá ýpe.

Ehendúke che retäygua. Che añe’ëta pende rehe,

¡nga’u che rendu ko árape Israel!  R. 

Nde reguereko mo’äi ambue tupä ndojekuaáiva

ne remomba’e mo’äi tupä pytagua:

Che hína Tupã nde Jára, Roguenohẽ va’ekue Egíptogui. R.

Che rendunga’u ra’e umi che retãgua,

ha Israel oiko che aipota háicha.

Che amongarúne che retäyguáme umi trigo iporävévape

ha amohyvatäne eíra ka’aguýpe.  R.

VERSÍCULO ANTES DEL EVANGELIO Cf. Jl 2, 12-13

Pende py’aite guive pejevy che rendápe che mba’e porä ha aporoiporiahuverekóre.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u      12, 28b-34

Upe ramo peteĩ Moisés rembiapoukapy mbo’eha, ohendu va’ekue ichupe kuéra oñoñe’ẽ apírõ, oñemboja hese ha oporandu ichupe: Mávapa umi Tupã Ñanejára rembiapoukapy apytégui pe mba’e guasuvéva?

Jesús he’i ichupe: Pe tembiapoukapy tuichavéva hína: ‘Ehendúke, Israel, Tupã Ñandejára niko peteĩnte. Ehayhu Tupã nde Járape nde py’a ite guive, ne ánga rugua guive ha ne arandukue reheve, ha ne mbaretekue reheve. Upe rire oúva he’i kóicha: ‘Ehayhu nde rapichápe rejehayhu háicha nde’. Ndaipóri tembiapoukapy mba’e guasuvéva ko’ãvagui.

Upe Moisés rembiapoukapy mbo’eha he’i ichupe: Iporã ite, mbo’ehára. Añete upe eréva: Peteĩnte oĩ Tupã Ñandejára ha ndaipóri ambue. Ha jahayhu ramo Tupã Ñandejárape ñande py’a ite guive, ñane ñe’ã ha ñane mbaretekue reheve, ha jahayhu ñande rapichápe ñande jupéicha, iporãve opa mymbahapy ha mymbajuka altárpe oñekuave’ẽ vagui.

Jesús, ohechávo pe tembiapoukapy mbo’eha he’i porã hague, he’i ichupe: Namombyrýi reime Tupã Ñandejára sãmbyhýgui.

Ha avave noporandusevéi ichupe.

Ñandejára Jesucristo Ñe’ẽ.