Ñahendu Hesu. Domingo 4º de Cuaresma

Escucha el evangelio y la reflexión en: https://youtu.be/gE9kA-P-5mo

Domingo 4º Cuaresma Ciclo B

Juan 3, 14 – 21

Upérõ Jesús he’i Nicodémope: Ku Moisés, pe desiértope omopu’ã haguéicha yvate pe mbói ra’ãnga, upéicha avei che añemopu’ã vaerã ágã. Ha umi che rehe ojeroviáva, oikovéne opa ára.

Ñandejára ohayhu etereígui opa yvypórape, ome’ẽ vaekue ta’ýra peteĩete, ani haguã omano umi hese ojeroviáva, oikove haguã uvei opa ára. Ñandejára niko nomboúi ta’ýra yvy ári ohundi haguã yvypórape. Ombou chupe, ha’e rupi yvypóra ojesalva haguã.

Pe ojeroviáva Ñandejára Ra’ýre noñehundi mo’ãi. Pe ojerovia’ỹva katu oñehundíma, ojerovia’ỹ haguére Ñandejára Ra’ýre. Kóicha niko oñehundi umi ojerovia’ỹva: Che aju ko yvy ári ahesape haguã opavavépe ha yvypóra kuéra hembiapo vaígui, oikoseve pytũmbýpe.

Opa hembiapo vaíva niko ndoikoséi hesakãháme. Pytũmbýpente oikose, ha noñemo’aguĩséi hesakãháme ani haguã ojehecha hembiapo vaikue. Umi oikóva Ñandejára oipotaháicha katu oñemo’aguĩ hesakãháme ojehecha haguã hesekuéra oikoha Ñandejára oipotaháicha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Nañanepohãvéima, farmásiakuéicha”. He’i ningo lo mitã, ivai eterei jepéramo la ñande kuádro ha ndaikatuvéima ramo ñasẽ térã ñarremedia ñande jehegui. Noiméiramo ohechakuaáva ha oúva ñande sokorre ningo jaisu’úta mante irokuete. Upéva la hembýva.

Ha péva ningo pe Hesu he’íva Nicodémope. Ko karai arandu hudiokuéra apytépe niko ou oporandu Hesúpe mba’éichapa ikatu ñambopyahu ñande rekove Ñandejára oipota háicha, ha ñasẽ pe ñande pekádokuéra javorái kuágui. Ha Hesu he’i ichupe, péva ndaikatúi voínte jajapo ñande yvypóra ñande jehegui.

Nañanepohãi voínte ñande jehegui ñasẽmba haguã pe ivaívagui ñanemosã mbarete ha ñane apytĩ su’úva ymaite guive.

Ñaikotevẽ pytyvõ mbarete ani haguã ñañehundi ha jaha jachyryry Aña retãme. Ha Ñandejára ndoipotái ñañehundi, ha ñande rayhu etereígui, ombou ita’ýra Hesukrísto ñande sokorrévo. Ha’e ohupi paite hi’ári umi ñande káusa ro ha ñande pekádo hetakuére. Ha nombyasýi hekove jepe opaga haguã opaite umi ñane rembiapo vaikuetáre.

Pe kurusúre ha’e omosaingo paite ñande pekádo ñane perdona ha ñanemopotĩ haguã.

ÑAÑEMBO’E OÑONDIVE

Ñandejára Hesukrísto, nderejúi va’ekue orekondena ha orekastiga ore pekádokueraita reheve. Emongakuaa kena ore pype jerovia, ha roma’ẽvo nde rehe kurusúre resaingóva ore rayhupápe, torojuhu ne mborayhúpe pe pohã mbarete ore mongueráva.
Amén.

Pa’i Alberto Luna.