MIÉRCOLES CUARTO DE PASKUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha    12, 24 – 13, 5

Ñandejára ñe’ẽ iñasãive ohóvo ha oñemoerakuã opa rupi.

Bernabé ha Saulo omohu’ã rire hembiapo Jerusalénpe, ojevy oguerahávo hendive Juan, Marcos avei héravape.

Antioquía pegua iglésiape oĩ maranduhára ha mbo’ehárakuéra. Umíva Bernabé, Simón (oñembohérava avei Kamba), Lucio Cirenegua. Menahem (okakuaa va’ekue Herodes, upe Galilea sãmbyhyhare ndive) ha Saulo.

Peteĩ ára, omomba’e guasu aja hikuái Ñandejárape ohasa jave hikuái karu’ỹme, Espíritu Santo he’i: “Pemboyke chéve Bernabé ha Saulo. Areko niko hembiaporã nguéra.”

Ha ñembo’e ha karu’ỹme ohasa rire, omoĩ hikuái ipo hi’árikuéra ha omondo.

Espíritu Santo omondógui ichupekuéra Bernabé ha Saulo oho Seléuciape. Upégui oho Chipre gotyo. Oguahẽvo upe yga  oñembojaha, Salamínape, oñepyrũ hikuái omoerakuã Ñandejára Ñe’ẽ umi judío tupaoha rupi. Juan oho avei hendivekuéra ipytyvõha ramo.

Tupã Ñandejára Ñe’ẽ.

SALMO ÑEMBOHOVÁI 66, 2-3. 5-6. 8

Opavave: Tupã Ñandejárape to purahéi opa tetã nguéra

O bien:

Aleluia.

Tupã Ñandejára ta ñande poriahuvereko, ha ta ñande rovasa, to ma’ẽ ñande rehe.

To jekuaa opa rupi hembipota,

ha opa tetã rupi ha’e oporope’aha jejopy vaígui. O.

To purahéi vy’a pópe tetãnguéra, resaimbyhýgui opavave

teko jojápe, hekopete remboguata tetãnguéra yvy ári. O.

Háa Tupã Ñandejára! Maymáva ta ne momba’e guasu,

ta ne momba’e guasu maymáva.

Tupã Ñandejára ta ñande rovasa, ha to ñemomba’e ichupe ko yvy jerekuévo. O.

ALELUIA Jn 8, 12

Aleluia.

Ñandejára Jesucristo he’i:  “Che hína pe yvy tuichakue hesapeha;

pe che moirüva orekóta tesapeha Tekovéva”.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha                                                      12, 44-50

Upe ramo Jesús hatã oñe’ẽ ha he’i: Pe che rehe ojeroviáva, ndaha’éi che rehe añónte ojeroviáva. Upéva ojerovia avei che Ru che mbou va’ekuére. Pe chéve che recháva, ohecha avei pe che mbou va’ekuépe.

Che, pe oporohesapéva, aju ko yvy ári ani haguã opyta pytũmbýpe umi che rehe ojeroviáva. Pe che ñe’ẽ ohendúva ha ojapo’ỹva katu, nda che mo’ãi upe ohundítáva ichupe. Che ndajúi va’ekue yvy ári ahundi haguã yvypórakuérape, aju va’ekue aipysyrõ haguã ichupekuéra.

Pe ojahéiva che rehe ha ndojapóiva che ñe’ẽ, oguerekóma mávapa ohundíta ichupe. Che ñe’ẽngue voi ohundíta ichupe ára pahápe. Che niko nañe’ẽi che jehegui reínte.

Che Ru, pe che mbou va’ekue, ha’e he’i chéve mba’épa ha’e ha aporombo’e va’erã. Che aikuaa che Ru rembipota ogueruha tekove opa’ỹva. Upévare, che amombe’u umi mba’e che Ru he’i va’ekue chéve ha’e haguã.

Ñandejára Jesucristo Ñe’ẽ.