Ñahendu Jesús Ñe’ẽ. Jueves 9ª Tiempo Durante el Año

Escucha el evangelio y la reflexión en: https://youtu.be/lX5iZ3EaUrM?feature=shared

Jueves 9ª TDA Marcos 12, 28 – 34

Upérõ peteĩ Moises léi ombo’éva ojapysaka hína ra’e umi mba’e saduséokuéra he’ívare Jesúspe. Upéi ha’e oñemboja Jesús rendápe ha oporandu chupe: — Mavaite piko hína pe mandamiénto tuichavéva opavavégui.

Jesús he’i chupe: — Pe mandamiénto tuichavéva niko he’i, “Ehendúke, Israel, Tupã Ñandejára niko peteĩnte. Ehayhu Ñandejárape nde py’aite guive, ne ánga rugua guive, ne ñe’ã guive, ha ne mbaretekue reheve.” Ha upéva riregua he’i kóicha, “Ehayhu nde rapichápe nde rejehayhuháicha”. Ndaipóri mandamiénto tuichavéva ko’ãvagui.

Upe Moises léi ombo’éva he’i chupe: — Oĩ porã mbo’ehára. Añetéko upe eréva. Ñandejára niko peteĩnte, ndaipóri ambue. Ha jahayhu va’erã Ñandejárape ñande py’aite guive, ñane ñe’ã guive, ñane mbaretekue reheve, ha jahayhu va’erã ñande rapichápe ñande jupéicha.

Umíva umi mandamiénto niko tuichave opa sacrifício jajapóva ha ofrénda ñame’ẽvagui.
Jesús, ohechávo pe Moises léi ombo’éva ombohovái porã hague chupe, he’i:— Namombyrýi reime Ñandejára Rréinogui.

Upe rire avavéma noporandusevéi chupe mba’eve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’éichapa ojekuaáta pe ñande religión iporãha, ha’eha peteĩ tape añete hápe ñanemboguatáva hekópe. Mba’éichapa jahechakuaáta ñane ñembo’e, ñane santokuéra ñemyataindy, fiesta patronal, mÍsa, grupo, aty guasu, rretíro, novéna, ha opa umi tembiapo ñamomýiva jerovia pópe oĩha hendápe porã ha naikarẽiha.

Jahayhúgui Ñandejárape ha jaipotágui Hesu ñande rovasa niko heta mba’e jajapo tupaópe, capíllape, ñande rógape voi, ñahenói Ñandejára, Tupãsy ha santokuéra oĩ háicha.

Jahayhu Ñandejárape ha jahayhu ñande Iglesia, ñande religión, ha’e añete peteĩ mba’e iporãva ha tekotevẽva ñande rekovépe. Upéva ha’éta hína peteĩ ñane retyma, ha ikatu haguãicha jaguata hekópe niko ñaikotevẽ mokõi tetyma.

Hesu he’i pe Ñandejára rayhu oñemoirũ va’erãha tapicha rayhu reheve. Ha upépe ojekuaa va’erãha pe ñande jerovia ha ñane ñembo’épa oguata térãpa ikarẽ.

Oiméramo ñahenói rire Ñandejára réra ha ñañembo’e rire ñapu’ã jey ojuehe ha jaiko vai oñondive, upéva pe ñembo’e noiporãi, noĩmbái, ndoikói hekópe.

Ñama’ẽ aipóramo, che reindy ha nde che irũ, ha jahechami noiméipa ñande jerovia opytánte ñembo’épe, ñepomoĩ ha ñemyataindy ñande nícho renondépente.

Térãpa ñanemboguata avei jahayhu ha ñaipytyvõ haguã ñande rapichápe, jahechakuaa haguã oikotevẽvape, ñañembyaty ñamba’apo haguã oñondive. Ñama’ẽmi oimépa Ñandejára rayhu omomýi avei ñande pype ñande rogagua, ñande vesíno ha ñane irũnguéra rayhu tembiapo porã rupive. Upépe jahechakuaáta jaguatápa ñaína jaikóvo añete hápe Hesú rapére.

Pa’i Alberto Luna.