Ñahendu Hesu. Viernes Semana IX TO

Escucha el evangelio y la reflexión en: https://youtu.be/MMw2mnFp7Qc

Viernes Semana IX TO                                        

              Marcos 12, 35 – 37.

Jesús ombo’e hína Tupaópe, ha osẽ ha’e oporandu umi chupe ohendúvape:

— Mba’ére piko umi Moisés léi ombo’éva he’i pe Mesías, ou vaerãha David ñemoñare kuéragui. David voi niko, Espíritu Santo rupi, he’i vaekue:  “Tupã he’i pe Mesíaspe ‘Eguapy che ykére, amoĩ meve ne pyenda ramo umi nde rayhu’ỹva.’”

Mba’éreiko David he’i Ñandejára pe Mesíaspe. Mba’éicha piko aipórõ pe Mesías, David ñemoñaréta upéicharõ.

Heta oĩ umi ijatýva ha ojapysakáva Jesús rehe. Ha oguerohory joa umi mba’e he’íva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Ñane mitã ramo niko ñaha’ã oñondive mávapa ipu’akave. Ñañotenta, ha jaiko vai sapy’ánte oñondive ndajaipotáigui avave opyrũ ñande rehe. Oĩ avei omboligáva ñorairõ, he’íva: nderepokói chéne péva nambíre, nderepokói chéne hováre. Ha péicha oikéma ojupe sókope lo mitã. Oĩ avei ñorairõme umi jeroviaha: “péva che gallo”, he’íva lo mitã, “anichéne avave opu’ã hese”, ha umícha.

            Jakakuaapáma ramo ha’etéku jahekáva avei mávapa ñande jeroviaha. Mávapa la gallo hatã osapukáiva korapýpe, oñe’ẽ hatãva, ivale, ikatupyrýva, mávapa upe oĩva opavave ári, mávapa imba’e guasuvéva, pévare jajepokã ha jajerovia haguã.

            Hesu ohechakuaa umi judío kuéra ndojeroviaiete voiha hese, ndojapoiha chupe mba’éramo. Ha’e kuéra niko ojerovia Rey Davíre, karai guasu, ha noimo’ãi ete voi Hesu ha’éne haguã David ñemoñare. Upéma ramo Hesu he’i chupe kuéra David, karai guasúramo jepe, noñemomba’e guasúi Ñandejára renondépe. Ha’e oñakãity ha iñe’ẽrendu va’ekue Ñandejárape. Ha ñande jaikuaa Rey David tuicha ojavýramo guare, ohechakuaa hembiapo vai hague ha itindy ohóvo ojerure perdón Ñandejárape.

            Péichape niko Hesu he’i hina umi judío kuérape: Naiporãi niko ñande py’a ratã ñande rapicha renondépe. Naiporãi jajererovu, ñanetĩpu’ã ha jajeguaru pe oúva ñane rendápe py’a porã reheve oñemongeta haguã ñanendive, omombe’úvo ñandéve Ñandejára rembipota, ndaha’éiramo jepe peteĩ karai guasu. 

Pe tuicháva añete niko oñemomichĩ va’erã Ñandejára renondépe, ha oñemoĩ va’erã hapicha ykére guata jojápe. Ñande niko peteĩchapánte, ha ñame’ẽ va’erã ojupe ñane mba’éva. Ndaipóri niko mba’érepa máva oñemoĩ haguã avave akã ári, ha oñemo hembe jere haguã hapicha renondépe. Mba’épa nde, che irũ ha che reindy, reñandu.

Pa’i Alberto Luna.