LUNES 10º TIEMPO DURANTE EL AÑO

LECTURA PETEÎHA:

Kuatia ñe’ẽ mokõĩha San Pablo ohai va’ekue Corintos guápe 1, 1-7

Pablo, Cristo Jesús apóstol, Tupã Ñandejára rembipota rupi, omomaitei ipehẽngue  Timoteo ndive, Tupã Ñandejára iglésia oĩva táva Coríntope, ha opa ambue ipehẽnguekuéra Acaya tuichakue. Tupã ñande Ru ha Ñandejára Jesucristo to hekuavo ipytyvõ ha ipy’aguapy pende ári.

To jererohory Tupã, Ñandejára Jesucristo Ru, ha’e niko ñande poriahuvereko ha ñane mbovy’a mantéva. Ha’e ñane mbovy’a opa ñande rembiasa asýpe, ikatu haguã avei ñambovy’a umi ohasa asývape, ñame’ẽvo ichupekuéra upe vy’a ha’e ome’ẽva ñandéve. Pe Cristo jehasa asykue ñane moenyhẽmba ite háicha ha jahasa asy hendive, upéicha avei Cristo rupi ñane renyhẽmba ite vy’águi.

Ore rohasa asy ramo, upéva peẽ pereko haguã vy’a ha pesẽ jejopy vaígui. Ha Tupã Ñandejára ore mbovy’a ramo, upéva avei peĩ pevy’a haguã ha ikatu haguã peropu’aka kyre’ỹ umi jehasa asy ore rohasáva. Rojerovia mbarete pende rehe roikuaágui, pehasa háicha umi ivaíva, upéicha avei perekoha upe vy’a.

Tupã Ñandejára Ñe’ẽ.

SALMO ÑEMBOHOVÁI    33. 2-9

Opavave: Peha’ã ha pehecha Tupã Ñandejára imba’e porãha.

Amomba’e guasúta opa ára Tupä Ñandejárape, ichupe aropurahéita tapiaite.

Tupã Ñandejára ombovy’a che rekove, imboriahúva to hendu ha tovy’a! O.

Oñondive ñamomba’e guasu Tupã Ñandejárape,héra jaropurahéi oñondivepa.

Tupã Ñandejárape añembo’e, ha’e che rendu,

ha oipe’apa che hegui umi mba’e che mongyhyjéva. O.

Umi Tupã Ñandejára rehe ojeroviáva vy’águi ojajaipáne,

ha hova noñomi chéne ñemotïgui. Che, tekove poriahu, Tupã Ñandejárape añembo’e. O.

Tupã Ñandejára remimbou oñangareko

ha oguenohẽ jejopy vaígui opa umi hese ojeroviávape.

Peha’ã ha pehecha Tupã Ñandejára imba’e porãha.

Ovy’a rasa upe hese ojeroviáva. O.

ALELUIA Mt 5, 12

Aleluia.

Pende rory ha pevy’áke, peẽme ojehepyme’ẽta haguére yvágape.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha    4, 25-5, 12

Upe ramo Ñandejárape ohenduséva ha oikoséva iñe’ẽme ou va’ekue opa hendáguio, oĩ oúva Galiléagui, Jerusaléngui, Judéagui ha Transjordaníagui avei.

Ohechávo Jesús hetaha umi ijatýva, ojupi peteĩ yvytymíme ha upépe oguapy. Hemimbo’e kuéra oñemboaty ijerekuévo, ha Jesús oñepyrũ ombo’e ichupe kuéra he’ívo: “Ovy’a va’erã umi ohecha kuaáva imboriahuha ipy’apýpe, ichupe kuéra guarã hína ñesãmbyhy yvágagui oúva.

Ovy’a va’erã umi ohasa asýva, Tupã Ñandejára voi omoangapyhýta ichupe kuéra.

Ovy’a va’erã umi ojejapo’ỹva, Tupã Ñandejára ome’ẽta ichupekuéra yvy imba’e teerã.

Ovy’a va’erã umi Tupã Ñandejára rembipotánte oipotáva ojehu, ha’e ome’ẽta ichupe kuéra opa oikotevẽva.

Ovy’a va’erã umi oiporiahuverekóva hapichápe, Tupã Ñandejára oiporiahuverekóta ichupekuéra.

Ovy’a va’erã umi ipy’a potĩva, ha’e kuéra ohecháta Tupã Ñandejárape.

Ovy’a va’erã umi oporomoingo porãva, Tupã Ñandejára oguerekóta ichupe kuéra ita’ýra ha itajýra ramo.

Ovy’a va’erã umi ohasa asýva Tupã Ñandejára rembipota ojapógui, ichupe kuéra guarã hína ñesãmbyhy yvágagui oúva.

Pevy’a va’erã pejeja’o ha pehasa asy ramo, ha oje’e ramo pende rehe opa mba’e vai, che ndive peikógui. Pevy’a ha pende py’a rorýke, tuicha jopói oñeme’ẽtagui peẽme yvágape. Peẽicha avei, maranduhára kuéra ohasa asy va’ekue peẽ mboyve.”

Ñandejára Jesucristo Ñe’ẽ.