MARTES 10º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue mokõiha Corintos guápe 1, 18-22

Che pehẽnguekuéra:

Tupã Ñandejára oikuaa porã nda che rova mokõiri hague pene ndive. Jesucristo Tupã Ra’y, upe Silvano, Timoteo ha che romoerakuãha pende apytépe, ndahova mokõiri va’ekue.

Tupã Ñandejára, Jesucristo rupi, ome’ẽ va’ekue iñe’ẽ opa árape guarã, ipype niko oiko opa umi ñe’ẽ Tupã Ñandeajára ome’ẽ va’ekue.

Upévare ñamomba’e guasúrõ Tupã Ñandejárape ja’e “Amén” Cristo Jesús rupi. Tupã Ñandejára hína upe oréve ha peẽme, ñane mombaretéva ñane mopeteĩvo Cristo ndive ha ñane mboykéva imba’erã. Oheja ñande rehe imba’e rechaukaha ha omoĩ ñande py’ápe Espíritu Santo, jajerovia haguã upe jahupitývare.

Tupã Ñandejára Ñe’ẽ.

SALMO ÑEMBOHOVÁI 118, 129-133. 135

Opavave: Tupã Ñandejára, emaña che rehe.

Ne rembiapoukapy niko mba’e neporãmba jepéva,
upévare ajapo ipype he’i háicha.
Umi ne ñe’ẽ jaikuaávo, ñande resape,
ha omoarandu umi mba’eve oikuaa’ỹvape. O.

Aipe’a che juru, ha puku che pytu araha,
upéicha umi ne rembiapoukapy che ra’ã.
Emaña che rehe ha che poriahuvereko
upéicha rejapógui voínte umi nde rayhúva ndive. O.

Che mboguata ne ñe’ẽ he’i háicha,
ani haguã mba’eve ivaíva ipu’aka che rehe.
Ehecha kuaa kena chéve,
ha ehechauka chéve ne rembipota. O.

ALELUIA Mt 5, 16

Aleluia.
Péicha aveíke pehesape va’erã maymave renondépe pe tesape oĩva pende pype, upéicha ramo umi yvypóra ohecháta pene rembiapo porãha ha pemomba’e guasu Tupã ñande Ru oĩva yvágape.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 5, 13-16

Upe ramo Jesús he’i hemimbo’ekuérape: Peẽ niko jukýicha hína ko yvy ári. Juky nahe’ẽvéi ramo niko ndaikatu véima oñemohe’ẽ jevy, naiporã véima mba’everã. Upévare, okápe oñemombo ha oñepyrũmba hese.

Peẽ niko mba’e rendýicha hína ko yvy ári. Peteĩ táva oĩva yvyty ru’ãme niko ndaikatúi ndojehecháivo. Avave niko nomyendýi mba’e rendy ha upéi omoĩ mbayru guýpe térã tupa guýpe. Yvate katu oñemoĩ, ohesape haguã óga ryepýpe oĩvape.

Péicha aveíke, peñeha’ã peẽ pehesape opavave renondépe. Ha ha’ekuéra ohechávo pene rembiapo porãngue, omomba’e guasúta pende Ru, yvágape oĩvape.

Ñandejára Jesucristo Ñe’ẽ