MIÉRCOLES 10º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue mokõiha Corintos guápe 3, 4-11

Che pehẽnguekuéra: Ajeroviávo Tupã Ñandejára rehe Cristo rupi, aikuaa porã kóva. Ndaha’éi niko che jehegui ikatúva ajapo mba’eve. Upéva rangue opa ikatúva ajapo Tupãguinte ou. Ha’e niko che mbokatupyry aiko haguã Ñe’ẽ Ñome’ẽ Pyahu rembijokuáirõ.

Upe Ñe’ẽ Ñome’ẽ Pyahu ndoguapýi tembiapoukapy ári, Espíritu pokatu ári katu. Pe tembiapoukapy reheguáva niko oporojuka, pe Tupã Espíritu reheguáva katu oporomoingove.

Pe tembiapoukapy oporojukáva ha ojehai va’ekue ita pehenguére oñemoerakuã ypy ramo guare, ojejapo va’ekue mimbipápe. Ha umi Israelgua ndaikatúi va’ekue oma’ẽ Moisés rováre, hendy mbarete etereígui upe mba’e mimbipa, ogue jevy va’erãva voínte.

Ñe’ẽ Ñome’ẽ Pyahu ñemoerakuã katu, oguapýva Espíritu ári, ko’ýte omimbipa va’erã. He’ise, omimbipa va’ekue ramo pe tembiapoukapy ñemoerakuã oĩva ñande juka haguã, ko’ýte omimbipáta, pe Tupã Ñandejára ñane mboheko jojaha ñemoerakuã.

Upe teko mimbipa yma guare ndaha’e véima mba’eve oñembojoja ramo pe Ko’ágã guáre, omimbi etevéva ichugui. Ha omimbipa va’ekue ramo upe ogue jevy va’erãva, ko’ýte omimbipavéta upe opa ára guarãva.

Tupã Ñandejára Ñe’ẽ

SALMO ÑEMBOHOVÁI 98, 5-9

Opavave: Tupã Ñandejára imarangatu hína.

Pemomba’e guasu Tupã Ñandejárape.
Peñesũ henondépe pemomba’e guasúvo,
Tupã Ñandejára imarangatu hína! O.

Moisés ha Aarón Tupã Ñandejára pa’i kuérava,
Samuel katu peteĩ umi héra ohenóiva.
Oñembo’e Ñandejárape, ha ha’e ohendu ichupekuéra. O.

Tupã Ñandejára oñe’ẽ hendivekuéra arai ñembo’y guive,
ha ha’e kuéra ojapo hembiapoukapy,
ha’e ome’ẽ va’ekue ichupekuéra. O.

Tupã ore Jára, nde rejapo va’ekue opa mba’e ha’e kuéra
ojejuréva ndéve ha heta jevy reheja rei hembiapo vaikue.
Upéicha remyengovia ichupe kuéra hembiapo vaikuére. O.

Peropurahéi Tupã Ñandejárape.
Pemomba’e guasu ichupe ijyvyty marangatúpe,
Tupã Ñandejára imarangatu! O.

ALELUIA Sal 24, 4b.5a

Aleluia.
Tupã Ñandejára ehechauka mína chéve umi nde rape, che mboguata tape vy’a reheguáre.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 5, 17-19

Upe ramo Jesús he’i hemimbo’ekuérape: Ani peimo’ã che aju hague amboyke haguã Moisés rembiapoukapy térã umi mba’e maranduhárakuéra oporombo’e va’ekue.

Che ndajúi amboykévo umíva, aju umíva ojehupa haguã hekoitépe. Añete ha’e peẽme, yvága ha yvy oĩ aja, mba’evete asy ndojepe’a mo’ãi Moisés rembiapoukapýgui, ojehupa peve umi mba’e ipype oĩva.

Upévare, upe omboykéva Tupã Ñandejára rembiapoukapy ha ojapo’ỹva pe michĩvéva jepe, ha oporombo’éva péicha ojejapo haguã, upévata pe michĩvéva Tupã Ñandejára oporosãmbyhyhápe yvágape.

Upe Tupã Ñandejára rembiapoukapy ojapo ha oporombo’éva katu, tuicháta Tupã Ñandejára oporosãmbyhývo yvágape.

Ñandejára Jesucristo Ñe’ẽ.