Ñahendu Jesús Ñe’ẽ. Santo Tomás ára

Escucha el evangelio y la reflexión en: https://youtu.be/uf2Hmuq8UR0

3 julio: Santo Tomás ára

Juan 20, 24-29

Tomás, ku Jesús disípulo Gemelo ojeheróva, niko noĩri va’ekue Jesús ojechauka ramo guare idisípulokuérape. Upéi umi Jesús disípulo he’i Tomáspe: — Rohecha niko Ñandejára Jesucrístope.

Tomás osẽ he’i chupe kuéra: — Ndahechái ramo ipóre umi klávo kuare, ha namoingéi ramo che kuã umi ikuarépe ha pe ijyke ojekutu haguépe, ndarovia mo’ãi.

Upe rire, 8 ára haguépe, Jesús disípulokuéra oñembyaty jeýma hikuái peteĩ ógape, ha Tomás oĩ upépe. Umi okẽ hamba’e oñembotypa. Peichaháguinte, Jesús oike sapy’a ha oñemoĩ mbytépe kuéra. Omomaitei chupekuéra, he’ívo: — Ta pende py’aguapy joaitéke.

Upéi osẽ he’i Tomáspe: — Emoinge ápe ne kuã ha ema’ẽ che póre. Eru nde po ha emoinge ko che yképe. Anive reduda. Eguerovia.

Upépe Tomás he’i: — Nde niko Tupã ha che Jára.

Jesús he’i chupe: — Che recha haguérente piko rerovia. Ovy’aite vaerãnepa ágã umi che rehecha’ỹre ogueroviáva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jesús ohóta vove Jerusalénpe omano haguãicha niko Santo Toma osẽ va’ekue he’i iñirũ apóstolkuérape: “Jaha katu ha ñamano ñande avei hendive”. Eguatamína hina la Toma nde. Arriero py’aguasu voi ra’e. Ha oho hikuái Jerusalénpe.

Upépe Jesús he’i: “Peẽ peiméta chendive che ahatahápe, peẽ peikuaa pe tape. Osẽ Toma he’i: “Ndoroikuaái niko moõpa reho, mba’éicha piko roikuaáta pe tape.” Toma oikuaase la tape. Okañy imi ra’e. Ha upépe Jesús he’i ichupe: “Che hína tape, añetegua ha tekovete”.

Jesús omano ramo guare katu Toma okañy avei, ndaha’éi la ipy’aguasu etereíva ra’e. Ha opyta ha’e avei umi apóstol kuéra ndive okyhyje, oiko ñembotypy. Oikove jevy rire Hesu ou oñemoĩ imbytépe kuéra ha he’i: Ani pe kyhyje, aime penendive. Tomás noiméi upérõ ha upéi nohenduséi hapicha ñe’ẽ, irari, ndoikuaaséi mba’eve. Ajépa ñande jogua.

Upéi ou jeývo hendápe kuéra Jesús he’i ichupe: Eju ko’ápe, epoko pe lánsa kuare che pyti’áre, ha emoinge ne kuã pe klávo kuarépe ha anive nde py’a ratã. Opokóvo hese Toma ojesape’a, oñesũ henondépe ha ojerovia.

Santo Toma niko, ñandéicha avei che irũ ha che reindy, oheka upe tape ha okañy avei sapy’ánte. Ko’ápe katu jahecha Hesu onohẽ ichupe tapépe. Opokouka ichupe umi ijehasa asy rapykuerére, ha upépe ohesape’a ichupe.

Ñande avei ñandepy’a ratãva ikatu ñaikotevẽ hína upe Santo Tomáme omonguera va’ekue: Japoko ñande rapicha sufrimíentore, ñañandu ijehasa asy. Upépe raẽ jaikuaata Ñandejárape, ha upépe ikatúta ja’e Hesúpe Santo Toma he’i haguéicha: “Nde ha’e che Jára, Nde ha’e Ñandejára”.

Pa’i Alberto Luna.