ARETE GUASU TUPÂSY OJEHUPIHA YVÁGAPE

LECTURA PETEÎHA:

Ko’ágã ñahendúta Tupã Ñandejára ñe’ẽ Apocalípsis arandukápe oî háicha 11, 19a; 12, 1-6a. 10a

Ha upévo ojepe’a Tupã Tupao oĩva yvágape, ha upe Tupaópe ojehecha karameguã iñe’ẽ me’ẽ rehegua. Ha ojekuaa pe árare ambue mba’e rechaukaha: peteĩ kuña oñemondéva kuarahýpe ijaópe ramo guáicha, jasy ipyguýpe ha peteĩ koróna 12 mbyja guigua
iñakãre. Upe kuña hye guasu, ha osapukái imemby potaitégui.

Upéi ojekuaa pe árare ambue mba’e rechaukaha: peteĩ teju jagua pytã, iñakãva 7, hatĩ 10, ha koróna peteĩ-teĩ iñakãre. Huguáipe ombotyryry mbohapýgui peteĩ pe mbyja retakuégui, ha omombo yvy ári. Pe teju jagua opyta pe kuña imembýtava renondépe, ho’u haguã pe imemby ou vove. Ha upe kuña imemby kuimba’e, ha upéva oisãmbyhy vaerã opa tetã yvy ári guápe mbaretépe. Ha upe imemby ojepe’a chugui ha ojereraha Tupã ha iguapyha renondépe; ha upe kuña okañy yvy ojeiko’ỹháme, Tupã ombosako’i haguépe chupe hendaguã.

Ha upévo ahendu peteĩ ñe’ẽ hatã oúva yvágagui, he’íva: “Oguahẽma pysyrõha ára, oguahẽ ñane Tupã pu’aka ha iñesãmbyhy, ha Hemimbou pu’akapa.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 44, 10b-12. 15b-16
Opavave: Nde ykére Ñandejára oñembo’y la Rréina.

Upe nde rembojeroviavéva, nde ykére oñembo’y,
óro porãme ojeguapa.

Che rajy, ehendu ko’ã mba’e ha’éva ndéve.
Ne retãgua, nde ru ha nde sýgui eñembyesarái.
Mburuvicha guasu iñakã raku ramo nde rehe,
ejapo he’íva ndéve. Ha’e nde jára hína.

Umi kuñataĩ nguéra chupe omoirũva hapykuéri.
Vy’a pópe mburuvicha guasu rógape oñemoinge.

LECTURA MOKÕIHA:
Ko’ágã ñahendúta kuatiañe’ẽ peteîha San Pablo ohai va’ekue Corinto guápe 15, 20-27a

Añetehápe katu, che pehengue kuéra, Cristo oikove jey. Ha’e niko koga’a oñemono’õ tenondéva. Pe tenonde oikove jey vaekue. Peteĩ yvypóra rupi ou haguéicha ñemano, ambue rupi ou pe omanóva jeikove jey.

Adán rupi opavave omano ramo, Cristo rupi opavave oikove jey vaerã. Peteĩ-teĩ hendaguãme, hembiapokuerakue ojerureháicha: Cristo tenonderã, upéi, Cristo ou jey vove, umi heseguáva.

Upévo oguahẽta pe ára paha, Cristo ohundipahápe opaichagua pu’aka ha mburuvicha, ha ombohasa ñesãmbyhy Tupã, ñande Ru, pópe. Cristo oisãmbyhy va’erã opa ija’e’ỹva hese oñemoĩmba peve ipyguýpe. Ha pe ipahaite oñehundítava, upéva hína pe ñemano. Tupã omoĩtagui opa mba’e Cristo pyguýpe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA

Aleluia
Tupãsy María ojehupi yvágapeOvy’a joa Ánhel kuéra oĩ háicha.
Aleluia.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha 1,39-56
Opavave: Romomba’e guasu ndéve, Ñandejára.

Umíva umi árape, pya’ete María osẽ oho peteĩ puéblope opytáva sérro pa’ũme Judápe. Oikévo Zacarías rógape, omomaitei Isabélpe. Ha ohendúvo María maitei, Isabel oñandu mba’éichapa pe mitã omýi hyépe.

Upépe, Isabel henyhẽ Espíritu Sántogui. Ha osẽ he’i Maríape: — Ñandejára niko nde rovasave ndéve opa kuña apytégui. Ha ohovasa ne memby ave. Máva piko che, nde Ñandejára sy, reju haguã che rendápe. Ahendúvo nde che momaiteívo, che memby omýi vy’águi che ryépe. Ñandejára nde rovasa rerovia haguére oikotaha umi mba’e ha’e he’i vaekue ndéve.

Ha María he’i: — Che py’aite guive amomba’eguasu Ñandejárape. Che ánga rugua guive aguerohory Tupã, che salvadórpe. Ñandejára omoĩ hesa che rehe, che niko hembiguaimínte.

Águi rire opavave he’íne chéve: «María, Ñandejára nde rovasa». Ñandejára Ipu’akapáva niko mba’e guasuete ojapo che pype. Ha’e niko imarangatu.

Ñandejára oiporiahuvereko opa ára umi chupe omomba’e guasúvape. Ha ipyapy mbarete rupive ohundi umi ojejapóvape. Poguasúpe oity iguapyhágui ha heko mirĩvape katu ohupi. Umi iñembyahýivape omyenyhẽ mba’e porãgui, ha po nandi orrepunta umi imba’e retávape.

Oipytyvõ hetã Israélpe. Oiporiahuvereko chupe ha ndahesaráiri chugui. Péicha voi he’i va’ekue ojapotaha ñande ru kuéra ypykuépe, Abraham ha iñemoñarépe. María opyta oiko Isabel ndive mbohapy mése rupi. Upéi katu oho jey hógape.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.