DOMINGO XVIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 16, 2-4. 12-15

Opa Israelgua oñe’ẽ vai upépe Moisés ha Aarón rehe. He’i joa hikuái: ¡Romanonga’u ra’e Ñandejára po rupi Egíptope!

Upépe roguapy jepi ore ólla jerére, ro’u so’o ha mbujape ore ryguatã meve. Peẽ katu ore reru ko yvy ojeiko’ ỹháme ore jukapa haguã ñembyahýigui.

Ñandejára he’i Moiséspe: Amondóta peẽme mbujape yvágagui. Peteĩ teĩ tosẽ to mbyaty arako’ẽ rehe hembi’u upe árape guarã. Upéicha aikuaáta ha’ekuérapa oikóta che aipota háicha.

Ahendu Israelgua oñe’ẽ vai ramo. Ere ichupekuéra: “Ka’aru vove pe’úta so’o ha pyhareve pene ryguatãta pángui. Ha upéicha peikuaáta cheha Tupã pende Jára”.

Upe ka’aru voi ou guyra kuéra ynambu joguaha ha omyenyhëmba upe ha’ekuéra oikoha. Ha pyhareve ojejaho’ipa ysapýpe upe ha’e kuéra oikoha, opa ijerekuévo.

Ysapy ikã rire, ojekuaa yvy perõ ári akytã mimi mba’e ra’ỹicha, ysapy rypy’a joguaha. Israelgua ohechávo upéva he’i joa ojupe: “Mba’éiko kóva?” ndoikuaáigui mba’épa.

Moisés katu he’i ichupekuéra: Kóva hína mbujape ome’ẽva peẽme Ñandejára.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 78, 3-4bc. 23-25. 54

Opavave: Ñandejára omongaru ichupekuéra yvágagua tembi’úpe.

Umi mba’e rohendu ha roikuaáva, ha ore rukuéra ypykue omombe’u va’ekue
noromokanýi chéne ore ra’ykuéragui.
Umi ou va’erãme romombe’úne, Ñandejára reko mimbipa ha ipokatu. O.

Tupã katu oñe’ẽ araípe amo yvate ha oipe’a yvága rokẽ.
Omongy hi’árikuéra maná hembi’urã,
tembi’u yvága guápe ichupekuéra omongaru. O.

Ho’u hikuái mbujape Tupã remimbou rembiapokuéva,

hyguatã meve okaru hikuái.
Ijyvy marangatúpe ichupe kuéra ogueraha,
ha upe yvyty rehe ha’e oñemomba’e. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ San Pablo ohai va’ekue Éfeso guápe 4, 17. 20-24

Che pehenguekuéra: Kóicha ha’e ha ajerure peẽme Ñandejára rérape: Anive peiko umi Tupãre ojerovia’ỹva oiko háicha. Umíva niko iñakãme oúvante ojapo.

Peẽ katu, Crístogui na pehendúi va’ekue péicha peiko haguã. Oiméramo ichupe pe hendu ha hese pejehekombo’e raka’e, upe añete gua Cristo reheguávape.

Upévare, pejeheja pende reko tujágui ha anive peiko yma guaréicha. Péicha peiko hague niko pende tujupa va’ekue, pehejágui teko ky’a pene mbotavypa.

Pembo pyahupa itéke pende py’a ha pene akãme perekóva, ha pemoñepyrũ pende reko pyahu, Tupã ojapo va’ekue ijoguaha ramo, peiko teko joja ha teko marangatu añeteguávape.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 4, 4b
Aleluia.
“Ndaha’éi tembi’u añónte oikotevẽva yvypóra oikove haguã, opa ñe’ẽ Ñandejára jurúgui osẽva rehe avei oikotevẽ”.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha

6, 24-35

Opavave: Romomba’e guasu ndéve, Ñandejára.

Upe jave umi hénte ohechávo ndaiporiha upépe Jesús térã idisípulokuéra, ojupipa jey hikuái ikanóape ha oho Cafarnaúmpe Jesús rekávo.

Ha oguãhẽvo hikuái pe lágo mboypýri, ojuhu hikuái Jesúspe ha oporandu chupe:— Mbo’ehára, araka’éiko reju ra’e ápe.

Jesús he’i chupekuéra: — Chéverõ guarã, peẽ chereka peikóvo pekaru haguére pene ryguãtã meve, ha ndaha’éi peikuaágui mba’épa he’ise umi milágro ajapo va’ekue. Ani pejepy’apýtei tembi’u oñehundi vaerãre. Pejepy’apy uvei tembi’u oñehundi’ỹ vaerãre ha ome’ẽ vaerãva peẽme jeikove opave’ỹva.

Upéva pe tembi’u che ikatu ame’ẽ peẽme, Ñandejára che Ru omoĩgui che pópe. Oporandu hikuái Jesúspe: — Mba’éiko upe Ñandejára oipotáva ore rojapo.

Jesús he’i chupekuéra: — Ñandejára niko che mbou chéve, ha oipota pejerovia che rehe.

Upépe osẽ oporandu ichupe hikuái: — Mba’e milágro piko rejapóta roguerovia haguã umi mba’e eréva. Ehechauka oréve. Ore rukuéra ypykue niko ho’u va’ekue mana desiértope.

Ñandejára Ñe’ẽme niko he’i: “Yvágagui omboguejy chupekuéra pan ho’u haguã”.

Jesús katu he’i chupekuéra: — Ha’éta peẽme peteĩ mba’e. Ndaha’éi Moisés upe ome’ẽ va’ekue peẽme pan yvagapegua. Che Ru hína upe ome’ẽva peẽme pan yvagapegua. Upe pan che Ru ome’ẽva niko hína pe oguejýva yvágagui ha omoingove opavavépe.

Ha’ekuéra he’i chupe: — Karai, eme’ẽmona oréve upéva upe pan ára ko’ẽre.

Jesús he’i chupekuéra: — Che niko hína upe pan oporomoingovéva. Upe che rendápe oúva naiñembyahýi chéne araka’eve. Ha upe che rehe ojeroviáva, nda’ijyuhéi mo’ãi araka’eve.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.