JUEVES XVII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 25, 8-9; 40, 16-21. 34-38

Tupã Ñandejára he’i Moiséspe: Pejapo chéve peteĩ Tekoha aiko haguã pende apytépe. Pejapo Jotopa Róga ha hembiporukuéra che ahechaukáta háicha peẽme.”

Moisés ojapo opa mba’e, Tupã Ñandejára he’i haguéicha ichupe. Upéicha, oñepyrũvo áño mokõiha oñesũ hague Egíptogui, ára peteĩha, mes peteĩháme, oñemopu’ã Tekoha Moisés omohenda Tekoha ha omoĩ ipyenda kuéra, omohenda tábla kuéra, omoĩ yvyra pukukuéra, omopu’ã póste kuéra, oipyso ahojakuéra Tekoha ári ha omoĩ hi’ári tóldo kuéra, Tupã Ñandejára he’i haguéicha ichupe.

Upéi Moisés omoĩ ñe’ẽ ñome’ẽ karameguã ryepýpe umi mokõi ita pehẽngue ojehai haguépe Tupã Ñandejára rembiapoukapy. Karameguã ykére omoí yvyra puku kuéra ha hi’ári ijuru mbotyha. Ogueraha karameguã tekohápe, ha omosãingo henondépe poyvi sãingo Tupã Ñandejára he’i haguéicha ichupe.

Arai ojaho’i Jotopa Róga ha Tupä Ñandejára reko mimbipa omoenyhẽ tekoha. Moisés ndaikatúi oike Jotopa Rógape, arai oguapýgui hi’ári ha Tupä Ñandejára reko mimbipa omoenyhẽgui Tekoha.

Arai opu’ã ramo Tekoha árigui, Israelgua omopu’ã hekoha oho haguã hapére. Upe arai nopu’ãi ramo katu, ha’ekuéra avei nomopu’ãi hekoha; oha’arõnte uvei opu’ã meve arai. Israelgua oguata aja pukukue, Tupã Ñandejára arai oĩ tekoha ári arakue, pyharekue katu oĩ hi’ári tata.

Tupã Ñandejára Ñe’ẽ.

SALMO ÑEMBOHOVÁI 83, 3-6a. 8a. 11

Opavave: Ovy’aite va’erãpa umi nde rógape oikóva ha opa ára nde reropurahéiva!

Che py’aite guive che ãho nde tupao róga guýre;
che py’aite guive hi’ãnte chéve apurahéi
Tupã Ñandejára oikovévape. O.

Guyra’i jepe ojuhu hogarã, ha mbyju’i ojaitypo haguã,
nde altar ypy rupi oja haguãme hupi’a,
Tupã, opa mba’e jára, Tupã, che ruvicha guasu. O.

Ovy’aite va’erãpa umi nde rógape oikóva
ha opa ára nde reropurahéiva!
Ovy’a ite va’erãpa umi nde pype ojuhúva pytyvõ
oñepyrũvo oguata nde rape rupi. O.

Aikoseteve peteĩ árante jepe nde róga guýpe,
aiko rangue mil ára oimehápe rei.
Aikoseve nde róga rokẽ rerekuárõ,
aiko rangue iñañáva róga guýpe. O.

ALELUIA Cf. Hech 16,14b

Aleluia.
Tupã Ñandejára, epoko ore korasõre, ikatu haguã rojapyhy nde Ra’y ñe’ẽ.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

13, 47-53

Upe ramo Jesús he’i opavavépe: Ñesãmbyhy Tupã Ñandejáragui oúva niko ojogua avei ku pyaha y guasúpe ojepoívape, ha oitýva opaichagua pira. Henyhẽ vove pirágui, umi pira renohẽhára oguenohẽ y rembe’ýpe ha oguapy upépe oiporavo umi pira. Omoï ajakápe umi iporãvéva ha umi oje’u’ỹva katu omombo.

Péicha avei ojehúta ára pahápe. Tupã Ñandejára remimbou kuéra osẽta oipe’a haguã heko vaíva heko potĩva apytégui, oity haguã tatakua hendývape. Upépe ojahe’o ha omopururũta umi hãi.

Upéi Jesús oporandu ichupekuéra: Peikuaápa mba’épa he’ise ko’ã mba’e?
Ha’ekuéra he’i ichupe: Roikuaa.

Upéi Jesús he’i ichupekuéra: Peteĩ Moisés rembiapoukapy mbo’eha oñemoarandúva hína ñesãmbyhy Tupãgui oúvape, ojogua ku óga járape oguenohẽva ikarameguãgui mba’e ipyahúva ha itujáva. Jesús omombe’upa rire ko’ã ñe’ẽ mbojoja, osẽ oho upégui.

Ñandejára Jesucristo Ñe’ẽ .