DOMINGO XXI DEL TIEMPO ORDINARIO

DOMINGO XXI DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Josué arandukápe oĩ háicha 24, 1-2a. 15-17. 18b

Upérõ ohenói Josué opa karaikuérape, mburuvicha, myakãhára ha ñorairõhára ruvichakuérape. Ha maymáva Israel ñemoñare oñembyaty Siquémpe, Ñandejára renondépe. Ha he’i ichupekuéra Josué: Na pemomba’e guasuséi ramo Ñandejárape katu, ko’ágã peje va’erã mba’eichagua tupãmepa pemomba’e guasúta.

Pemomba’e guasútapa umi tupã pende rukuéra ypykue omomba’e guasu va’ekue oiko ramo guare Éufrates ysyry rupi, térãpa ko’ágã peikóguima ko’ã amorreo yvýpe pemomba’e guasúta itupãnguérape? Che ha maymáva che rogagua romomba’e guasúta Ñandejárape.
Maymáva Israel ñemoñare he’i: Mba’eveichave ramo noromboyke mo’ãi Ñandejárape ha noromomba’e guasu mo’ãi ambue tupã.

Tembiguái ramo roiko va’ekue Egíptope ha Tupã ore Jára ore guenohẽ va’ekue oréve ha ore ru kuéra ypykuépe upégui. Heta mba’e techapyrã ojapo va’ekue ore rehehápe. Mamo tetã roikoha rupi térã mamo rohoha rupi, ha’e oñangareko va’ekue ore rehe. Ore avei romomba’e guasúta Tupäme. Ha’e niko ore Jára.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 33, 2-3. 16-23

Opavave: Ñandejára oguenohẽ jejopy vaígui hembiguáikuérape.

Amomba’e guasúta opa ára Ñandejárape,
ichupe aropurahéita tapiaite.
Ñandejára ombovy’a che rekove.
Imboriahúva tohendu ha tovy’a! O.

Ñandejára oñangareko umi ijohéi pyréva rehe,
ha ohendu umíva ñembo’e.
Heko vaívagui katu ndoikuaaséi mba’eve,
umíva opa va’erã tesaráipe. O.

Ñandejára ohendu umi ijohéi pyréva ñembo’e
ha oguenohẽ ichupekuéra upe ojejopy vaihagui.
Ñandejára oñemboja umi ohasa asýva rehe
ha oguenohẽ umi ikangypávape jejopy vaígui. O.

Heta mba’e vai rupi imarangatúva ohasa,
ha Ñandejára oguenohẽ ichupe umívagui,

oñangareko ikãngue rehe, peteĩnte jepe nopẽi chéne. O.

Iñañávape ojuka iñañangue, ha oñemyengoviáne umi ndaija’éivape imarangatúva rehe.
Ñandejára oguenohẽ jejopy vaígui hembiguáikuérape,
ha mba’eve ivaíva ndojejapói chéne umi hendápe oguahẽva rehe. O.

LECTURA MOKÕIHA:
Ko’ágã ñahendúta kuatiañe’ẽ San Pablo ohai va’ekue Éfeso guápe 5, 21-33

Che pehenguekuéra: opavavéke pejapo oje’e háicha peëme, pehechauka haguã pemomba’eha Ñandejárape. Peẽ kuña omendáva, pejapóke pene ména he’íva peẽme, pejapo háicha Ñandejára he’íva peẽme. Ménakuéra niko tembireko akã hína, Cristo ha’e háicha pe iglésia akã. Cristo iglésia niko Cristo rete hína, ha ha’e katu ipysyrõhára. Ha pe Cristo iglésia ojapo háicha Cristo he’íva, tembirekokuéra avei ojapo va’erã iménakuéra he’íva ichupekuéra.

Peẽ ménakuéra, pehayhúke pene rembirekópe, Cristo ohayhu haguéicha pe ijiglésiape, ha ome’ẽ hese hekove. Péicha, ha’e omboyke pe ijiglésia Ñandejárape guarã, omopotĩ rire ýpe ha iñe’ẽ rupi, Cristo voi oguereko haguã henondépe peteĩ iglésia, porãgui ojajaipáva, imarã’ỹva ha icha’ĩ’ỹva ha mba’eve ãichagua oguereko’ỹva, imarangatúva uvei katu, ha mba’eve ivaíva oguereko’ỹva.

Péicha avei, ménakuéra ohayhu va’erã hembirekokuérape, ha’ekuéra ojehayhu háicha ijupe voi. Upe hembirekópe ohayhúva, ojehayhu ijupe voi. Avave niko ndojahéiri hetére. Ñamongaru uvei ha ñañangareko hese. Péicha avei Cristo ojapo umi ijiglésia rehe, upéva Cristo retégui hína. Ha ñande niko upe hete rehegua.

Ñandejára Ñe’ẽme niko he’i: “Upéva rehe, kuimba’e oheja va’erã itúva ha isýpe, ha ojoaju hembireko ndive ha oiko mokõivégui peteĩ tekovénte”. Mba’e guasuete ha ojekuaa’ỹva niko pe ko’ápe oje’éva, ha che añe’ẽ Cristo ha ijiglésia rehe. Opáichavo, ménakuéra to hayhu hembirekópe ojehayhu háicha ijupe voi, ha tembirekokuéra to momba’e iménape.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Jn 6, 63c. 68c

Aleluia.
Tupã Espíritu pe oporomoingovéva. Ne ñe’ẽ niko umi oporo moingovéva opa ára guarã.
Aleluia.

EVANGELIO

Marandu porã Ñandejára Jesucrísto rekove ha hemimbo’e San Juan omombe’u háicha 6, 60-69

Opavave: Romomba’e guasu ndéve, Ñandejára.

Upérõ heta oĩ Jesús disípulokuéra apytépe ohendúva umi mba’e Jesús ombo’e va’ekue. Osẽ he’i hikuái: — Ko’ã mba’e he’íva niko ijetu’u etereíma. Mávaiko openáta hese.

Jesús ohecha kuaa ndo’aporãiha umi mba’e he’íva idisípulokuéra apytépe.

Upévare he’i chupekuéra: — Ko’ã mba’ére piko pembopo’ise. Mba’e pejapóne che rechárõ ajupi jey ramo yvágape aju haguégui. Ñandejára Espíritu niko pe ñane moingovéva, ñande ro’o katu naiporãi mba’everã. Opa umi mba’e che amombe’úva peẽme niko ogueru peẽme Ñandejára Espíritu ñane moingovéva.

Oĩ jepe gueteri pende apytépe ndogueroviáiva umi mba’e che ha’éva. Iñepyrũmby guive voi niko, Jesús oikuaa vaekue máva-mávapa umi
ndojerovia mo’ãiva hese. Oikuaa ave mávatapa hína upe otraisionátava chupe.

Upéi katu he’i chupekuéra: — Upévare niko che ha’e peẽme, avave ndoumo’ãiha che rendápe, ndohejái ramo chupe che Ru.

Upe guive, heta oĩ umi hendive oiko va’ekue ombopo’íva, ha ndoikovéi hendive. Jesús oporandu umi 12 idisípulokuérape:— Peẽiko pehopáta avei.

Simón Pedro he’i chupe: — Mbo’ehára, máva rendápe nga’u piko rohóta. Ne ñe’ẽ niko ñane moingove. Ore niko roguerovia umi mba’e eréva, ha roikuaa ndeha hína Ñandejára ra’y marangatu.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.