LECTURAS DOMINGO 24º DURANTE EL AÑO

LECTURAS DOMINGO 24º DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 50, 5-9a

Ñandejára oipe’a che apysa ha che ndajokói ichupe ha ndagueviri. Amoĩ che ape che nupãsévape ha che rendyva’óvagui nda kyhyjéiri. Che rovapete ha che rova rehe ondyvúvagui che rova ndaipe’a mo’ãi.

Ñandejára katu ou che pytyvõ haguã, upéva rehe nañandúi ajehova api ramo, añemohatã itáicha, aikuaa rupi nañemotĩ mo’ãiha. Aguĩ oime upe che yke rehe ojepytasóva tekojojápe: Mávapa oguereko he’i vaerã che rehe. Jaha ñaño mbojovake. Máva piko upe opu’ãva che rehe. Toguahẽ che rendápe.

Ñandejára ou ramo che pytyvõ haguã, máva piko che moĩ vaita?

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 114, 1-6. 8-9
Opavave: Ñandejára rape rehe aikóne

Ahayhu Ñandejárape ha’e ohendúgui che rembijerure.
Ha’e ojapysaka che rehe
ichupe añembo’e vove. O.

Mano niko isãme che jura, yvy kua vaípe che jopy,
jepy’apy ha vy’a’ỹme ajecha.
Upéma ramo Ñandejárape añembo’e,
ichupe ajerure che renohẽ haguã jejopy vaígui. O.

Ñandejára heko joja ha ipy’a porã,
ha’e hína Ñandejára oporo poriahuverekóva.
Ñandejára oñangareko imirĩva rehe.
Che niko vaípe ajecha va’ekue ha ha’e che pytyvõ. O.

Ha’e ndohejái amano, térã che resa henyhẽ tesaýgui, térã añepysãnga.
Ñandejára rape rehe aikóne,
oikovéva apytépe aiko aja. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ Santiago kuatiañe’ẽpe oĩ háicha 2,14-18

Che pehẽnguekuéra, mba’épe piko iporã ja’e jajeroviaha ha ndajajapói mba’eve iporãva? Ikatu nga’u piko peichagua jerovia ñane renohẽ ivaívagui? Oĩ ramo peteĩ ñane pehẽngue ijao’ỹva ha oguereko’ỹva ho’u va’erã upe árape, ha peteĩ peẽva he’i ichupe: “Toho porãite ndéve. Eñeñuã ro’ýgui ha ekaru” ha nome’ẽi ichupe upe oikotevẽva, mba’épe piko iporã upéva? Upéicha avei jerovia añónte, ojechauka’ỹva
tembiapokue rupi, výro rei.

Ikatu jepe oĩ he’íva: “Nde rejerovia ha che katu ajapo iporãva”. Ehechauka chéve aipo ramo, nde jerovia rejapo’ỹre mba’eve, ha che ahechaukáta ndéve che jerovia che rembiapokue rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Gál 6, 14

Aleluia.
Che katu, mba’eve rehe ndajejaposéi, Ñandejára Jesucrísto kurusu rehénte.
Cristo kurusu rupi niko, ko yvy omano chéve guarã, ha che amano ko yvýpe guarã.
Aleluia.

EVANGELIO

Marandu porã Ñandejára Jesucrísto rekove ha hemimbo’e San Marcos omombe’u háicha 8, 27-35
Opavave: Romomba’e guasu ndéve, Ñandejára.

Upérõ Jesús ha idisípulo kuéra oho Cesaréa Filípope. Tapére Jesús oporandu chupekuéra: — Mavaha che piko pehendu oje’eha.

He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva nde profetaha.

Jesús oporandu chupe kuéra: — Ha peẽiko mba’e peje, mávaiko che.

Pedro he’i chupe: — Nde hína pe Mesías. Ha Jesús he’i idisípulokuérape ani haguã omombe’u avavépe. Jesús oñepyrũ omombe’u chupe kuéra mba’épa ojehúta chupe. He’i, “Heta ahasa asýta hína.

Umi mburuvicha, pa’ikuéra ha umi Moises léi ombo’éva ndoikuaase mo’ãi che hegui mba’eve. Che jukátarõ jepe hikuái, aikove jeýta 3 ára haguépe”.

Omyesakã porã chupekuéra ko’ã mba’e. Upépe, Pedro ogueraha chupe ha’eñoháme, ha he’i chupe anive haguã péicha oñe’ẽ. Jesús katu ojere, oma’ẽ idisípulokuérare ha oja’o Pédrope: — Na che reja Sataná. Ndereikuaái pe Ñandejára oipotáva. Nde niko rejogua opavavépe.

Upe jave Jesús ohenói idisípulo kuérape, ha opa umi oĩva ijerére, ha he’i chupekuéra:— Peẽ che moirũsérõ, peñembyesarái umi mba’e peẽ pejaposévagui. Pehupi

pende kurusu pende apére, ha peju che moirũ. Pe hekovére hakate’ỹva, omanóta. Pe omanóva che rehehápe ha che ambo’éva rehehápe katu, ojesalváta.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.