Ñahendu Jesús Ñe’ẽ. Martes 24º Durante el Año

Escucha el evangelio y la reflexión en: https://youtu.be/4dIlR42K0Jg

Martes 25º Durante el Año

Lucas 7, 11 – 17

Upérõ Jesús ha idisípulokuéra oho Naínpe. Heta ave umi ohóva hendive. Ha og̃uahẽvoma, ohecha oguerahaha hikuái oñotỹ hag̃ua peteĩ viúda memby kuimba’e peteĩmi.

Umi upepegua ohopa joa hapykuéri. Jesús ohechávo upéva, tuicha oiporiahuvereko pe kuña ha’eñomíme. Ha osẽ he’i chupe: — Anivétei ne rasẽ.

Pya’ete oñemboja ha opoko pe omanóva rupáre. Umi ogueraháva hína katu opytapa.

Jesús he’i pe omanóvape: — Nde mitãrusu, ndéve ha’e. Epu’ã.

Upévo pe omanóva oguapy sapy’a, ha oñepyrũ oñe’ẽ. Upéi katu Jesús ogueraha chupe isy rendápe. Ohechávo upéva umi upépe oĩva, oñemondyipa joa. Ha oñepyrũ omomba’e guasu Ñandejárape. He’i hikuái: — Oĩ nimbo ra’e proféta guasu ñande apytépe.

Ñandejára oúma ñane pytyvõ. Ha Judá tuichakue herakuã umi mba’e Jesús ojapóva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ipyahu ha imitãva ningo jahecháramo ha jahayhu. Ha’ekuéra ningo ikyrỹi asy, iporã, ikyre’ỹ, ogueru ñande apytépe vy’a ha tory. Mitã pyahu akã ári ningo ñamboguapy tuicha esperanza. Ha ajépa niko tuicha oguapy ñande rehe jahechávo mitã térã mitakuña pyahu ojavy hape, osẽ vai ha oñehundíramo.

Ñahendu Jesús ojuhu hapépe peteĩ viúda ha’eñóva, oraháva hína oñoty imemby peteĩete omano va’ekue. Túicha upe ñembyasy, ha heta oĩ omoirũva pe kuñakaraimíme. Pe imemby kuimba’e omanóvo niko opaitéma iñesperanza isýgui. Ha’eñoite opyta.

Ndaipu’akavéima oha’ã haguã heta mba’e ha ndaipóri mávaguipa oha’arõta. Heta sy ha túva ko oĩ upéva ohasáva hina. Ndaha’éi katuete omanógui ichugui imemby. Oĩ sy ndoikuáaiva mba’épa ojapóta imemby pyahu omba’apo térã ostudia haguã, ndorekói mba’éichapa. Ha sapy’ánte upéva ári jey ohecha imemby oho ichugui húnta vai rapykuéri, oike dróga, ka’u, monda térã ambue tape karẽre. Oipytyvõ rangue ichupe ombopohýi hekove, omyenyhẽ kevrántogui.

Hesu oñemboja pe kuñakaraíre ha he’i chupe anive haguã hasẽ. Opoko pe mitã pyahu rete ojepyso hápe ha he’i ichupe opu’ã haguã. Pe mitã pyahu opu’ã ha oñepyrũ oñe’ẽ. Ha Jesús ome’ẽ jevy pe mitãrusu isýpe.

Mba’épa rehecha, che reindy ha nde che irũ, ko Jesús ojapóva: Ohendu, omoirũ, oñandu, opoko. Oime piko ñande ave ñañemboja vaerã umi mitã pyahukuéra oiko hárupi, jaikuaa hemiandu ha hemikotevẽ. Mba’épa la imúndokuéra, la onda oikoha hikuái. Ñahendu isy ha ihéntekuérape. Ñaipytyvõ opu’ã haguã, ñambojerovia, ñañemoirũ hese ha jareko chupe kuéra ñande apytépe. Mba’épa reñandu.

Pa’i Jasy.