Ñahendu Jesús Ñe’ẽ. Sábado 25º Durante el Año

Escucha el evangelio y la reflexión en: https://youtu.be/TIEg7W_Irro

Sábado 25º Durante el Año Lucas 9, 43b – 45.

Upérõ, opavave opondera joa jave hína umi mba’e Jesús ojapóvare, osẽ ha’e he’i idisípulokuérape:— Pejapysaka porãke ko ha’évare peẽme. Umi che rehe ija’e’ỹva niko che reitýta hína umi che rayhu’ỹva pópe.

Idisípulokuéra katu ndoikuaái mba’épa upe Jesús he’iséva chupekuéra. Noĩri gueteri niko hikuái oikuaa hag̃uáicha. Ha upéi ave, okyhyje hikuái oporandu hag̃ua Jesúspe mba’épa pe he’iséva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Jarekose ñane gente térã ñande rógagua ojeguerohorýva ha ojehayhúva. Pe túva ha sy niko ijuruvy rei ohendúramo oñeñe’ẽ porã ha oñemomba’e guasúramo imemby.

Ha oiméramo ñande róga térã ñande vállegua herakuã vaíva katu ñarokirirĩ ha ñatĩ oĩramo mandu’a hese. Ha’ete voi ku ñande rypýiva upe ojapova’ekue. Iporãramo hembiapo, ñandéma katu ñamombe’u jaikuaaha ichupe, ñane irũha ha mba’e. Ha ikuatia ky’áramo katu ndaipóri mandu’a. Ani haguã oñemboja mba’e ñande rehe.

Ha péva ningo upe ojehúva umi Jesús apóstol-kuérape. Opavave ningo ohecha ramo Jesús ojapóva, ha ovy’aiterei hikuái oñandúgui upe ñemomba’e guasu ha jeguerohory oikóva Jesús re ohupytyha ichupekuéra avei. Jesús oñemomba’e ha ha’ekuérama katu oñembotuicha ha upévantema voi ichupekuerarã.

Jesús katu ndokéi aguara pire ári ha ohecha mombyryve ichuguikuéra. Oikuaa ningo heta oĩha sapy’amínte oguerohorýva ichupe, ivevúi aja upe tapénte omoporãmba.

Oipytyvõ, oipohano ha omongaru aja ichupekuéra ojepopetépa ichupe. Ha upéi oñepyrũvove ipuku ha ipohýi tape katu oĩtama opytáva ha oguevíva. Ha jahavéramo katu oĩtama ojetyvyro ha ipochýva, ombohovái ha ojahéiva hese.

Upévare Jesús he’i porã iñirũnguérape mba’eichatapahína. Ha omombe’u ichupekuéra mba’épa ojehúta tapére. Opaichavo, he’i háicha San Lucas, nahesakãi chupekuéra upe Jesús he’íva.

Ndaipy’ái gueteri ha’ekuéra oikuaa haguãicha upe he’íseva, ha noporanduséi ave. Okyhyje hikuái upe jehasa asýgui. Oipotánte opavave oguerohory ha oñe’ẽ porã hesekuéra.

Ñande avei che irũ ha che reindy, jaipotáva oñeñe’ẽ porãnte ñande rehe ha japyta porãseva opavave ndive, tekotevẽ ñama’ẽ Jesús-re. Ha’e tañanembo’e jaheka haguã pe Ñandejára rembipota. Oiméramo ojepopetéva ñandéve jaha hese, ani jake aguara pire ári. Ha oiméramo ipochýva, jahánte avei hese. Ani ñande pire pererĩ ha jaheja rei, Jesús
ñanembo’e haguéicha.

Pa’i Jasy.