Ñahendu Jesús Ñe’ẽ. Sábado 26º Durante el Año

Escucha el evangelio y la reflexión en: https://youtu.be/l3MXd5G3mV8

Sábado 26º Durante el Año

Lucas 10, 17 – 24.

Upérõ umi 72 disípulo ou jeývo, tuicha ovy’a hikuái. He’i Jesúspe:— Mbo’ehára, nde rérape roñe’ẽ ramo chupe kuéra, umi demóño jepe ojapo ro’éva.

Jesús he’i chupe kuéra: — Ahecha niko Sataná ho’a ramo yvágagui ku aratirícha.

Ame’ẽ vaekue niko peẽme pu’aka pepyrũ hag̃ua mbói ha alakran rehe. Ha amoĩ pende poguýpe pende rehe ija’e’ỹva. Mba’evéko ndojehu mo’ãi peẽme. Anínte pevy’a umi demóño ojapo haguére pejéva chupe kuéra. Pevy’a uvei pende réra ojehaíma haguére yvágape.

Upe javete Jesús henyhẽ sapy’a vy’águi oúva Espíritu Sántogui. Ha he’i: Romomba’e guasu che Ru. Yvága ha yvy niko ne mba’e. Romomba’e guasu reñomi haguére ko’ã mba’e umi iñarandu ha imba’e kuaávagui, ha reikuaauka haguére umi
heko mirĩ ha iñarandu’ỹvape. Upéicha voi che Ru nde reipota va’ekue ojehu.

Upéi Jesús ojere he’i opavavépe: — Che Ru niko omoĩ che pópe opaite mba’e. Avave ndoikuaái Ñandejára Ra’ýpe, Túva añónte. Ha avave ndoikuaái Túvape, Ñandejára Ra’y añónte, ha umi ojekuaaukávape Ñandejára Ra’y.

Ha ojerévo idisípulokuéra gotyo, he’i chupekuéra año: — Ovy’aite vaerãnepa umi ohecháva ko peẽ pehecháva hína ko’ág̃a. Añetéko ha’e peẽme, heta proféta ha rréi hamba’e ohechase ha ohenduse vaekue ko peẽ pehecháva hína ko’ág̃a. Chupekuéra katu nda’ijái va’ekue ohecha térã ohendu.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…
Oñondive jahupytýramo ha ñamohu’ãramo peteĩ tembiapo porã tuichave javy’a. Opavave oguatáva oñondive oikuaa, lo mitã opuka, hory, okasea joa mba’éichapa oiko.

Osapukái, ojepete pete, onohẽ foto oñondive, opyta mandu’arã ha ñemongetarã heta araguarã. Tuichave javy’a oñondive osẽ porãramo ñane rembiapo. Ha upéicha avei ningo umi Jesús disípulo ha’e ojokuaiva’ekue ojerévo ojotopa jey, oraharire Ñandejára ñe’ẽ opárupi ha oñembo’erire hapichakuérare.

Tuicha ovy’a oúvo ha omombe’u joa vy’a pópe opa mba’e ojapova’ekue. Ha péva avei mbovy’aiterei Jesús pe, ohechapype mba’éichapa Ñandejára ojevale tuichaháicha iñirũnguéra rehe, ndaha’éiva karai guasu arandu, ndaha’éiva mburuvicha térã poguasu.

Karai guasu ha kuñakarai arandukuéra apytépe ningo ojeporueterei jepi téra, apellido, huláno ojapo, hulána oikuaa rupi, mburuvicha ikatupyry rupi, ha mba’e.

Jesús ko’ápe ohechauka ñandéve mba’éichapa Ñandejára rembiapo oñemboguata ñemoirũme. Upépe ndaipóri chénte ajapo.

Upépe jaguata oñondive ha Ñandejára omba’apo upe comunidad rehe ae ha ombokatupyry ipa’ũme umi imirĩvape. Ha pevahína la vy’a paha ijapyra’ỹva, he’i Jesús: Jahecha ha ñahendu Ñandejára Reino oguahẽva umi mboriahu ha naiñarandúiva apytépe, ojeroviáva Jesús re ha omoirũva ichupe, ohovasa ha omombe’úva Ñandejára ñe’ẽ opavavépe.
Reñandúmapa che reindy ha nde che irũ pe vy’a Ñandejáragui oúva, umi mboriahu ha iñarandu’ỹva rupi.

Pa’i Jasy.