Ñahendu Jesús Ñe’ẽ. Domingo 27º Durante el Año

Escucha el evangelio y la reflexión en: https://youtu.be/HVA7zCSDEvg

Domingo 27º Durante el Año Ciclo B

Marcos 10, 2 – 16

Upérõ oĩ mimi fariséo kuéra oñembojáva Jesús rendápe ombopakova pireségui chupe hikuái. Oporandu hikuái Jesúspe ikatúnepa ménakuéra opoi hembirekógui. Jesús he’i chupekuéra: — Mba’éiko he’i Moises léipe.

Ha’ekuéra he’i chupe: — Moises léipe niko he’i ikatuha japoi ñane rembirekógui ñame’ẽma guive chupe kuatia. Upéva reheve ñamosẽ kuaáma ñande rógagui.

Ha Jesús he’i chupekuéra: — Pende py’a hatãguinte Moises oheja va’ekue peẽme upéva pe léi. Iñepyrũmbýpe niko Ñandejára ojapo va’ekue kuimba’e ha kuña. Upévare, kuimba’e oheja itúva ha isýpe, ha ojoaju hembireko ndive. Mokõivéva oiko peteĩcha.

Ndaha’e véima mokõi. Upévare, umi Ñandejára ombojoaju vaekue ndaikatúi avave oipe’a ojuehegui.

Oguãhẽ rire hikuái hógape, idisípulo kuéra oporandu jey chupe ko’ã mba’ére. Jesús he’i chupekuéra: — Oimeraẽva opoíva hembirekógui ha upéi omenda jeýva, omyakãratĩ hína hembirekópe. Ha peteĩ kuña opoírõ iménagui ha upéi omenda jey, ha’e ave omyakã ratĩ iménape.

Upe jave ogueraha hikuái mitã mimi Jesús rendápe opoko haguã hesekuéra. Umi idisípulokuéra katu omongavaju umi mitã oguerúvape. Jesús ohechávo péva ipochychupekuéra, ha he’i: — Peheja umi mitã tou che rendápe.

Ani pejoko. Ñandejára Rréino niko mitãme guarã ha umi mitãicha oikóvape guarã. Añete ha’e peẽme, pe ndojeroviáiva Ñandejárare ko’ã mitãicha ndoike mo’ãi Ñandejára Rréinope. Ha ohupi ijyva ári umi mitã. Omoĩ ipo hesekuéra ha ohovasa.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Omendáva jepe ojueja, mba’e piko la ñande. He’i ikachiãiséva oho kuetévo. Oĩ niko añete ñande apytépe ména ha tembireko omendáma va’ekue, térã amansevádo, oúva ojueja.

Umíva apytépe katu oĩ oñomoirũ térã omenda jeýva ha oĩ opytáva ha’eño oñangareko ifamíliare. Oĩ avei umi omendáva iñepyrũmbýpe, opytáva iñe’ẽme ha oñeha’ãva ohóvo omohu’ã iguata oñondive omano meve.

Ñande jopara niko ha opaichagua ñaime. Nañaneporãmbái ramo jepe niko ñañeha’ã va’erã ñañomboguata. Hi’ãite niko opavave omendáva ojoaju léi ha tupaópe ha omboguata hóga ha ifamília opa araite. Péva hína Ñandejára rembipota, he’i Hesu.

Oiméne ko Hesu imandu’a mitã nguéra upe jave, umíva ha’égui ohasa asyvéva opẽramo chuguikuéra peteĩ ikarréta rruéda, isy ha itúva ojuejáramo, ha oiko otyryry asy hikuái.

ÑAÑEMBO’E OÑONDIVE

Ore pytyvõmíkena Ñandejára omendáva opyta haguã oñondive opa araite ha romoirũ haguã avei ojueja, omenda jeýva ha opytáva ha’eño omongakuaa haguã ifamília jerovia ha mborayhúpe.

Pa’i Jasy.