Ñahendu Hesu. Martes 28º Durante el Año

Escucha el evangelio y la reflexión en: https://youtu.be/0WhggvYAxTM

Martes 28º Durante el Año

Lucas 11, 37 – 41

Upérõ peteĩ fariséo okonvida Jesús pe oho hag̃ua okaru hógape. Jesús oho ha oguapy okaru hag̃ua. Upe fariséo katu opondera Jesús ndojepohéi haguére okaru hag̃ua.

Jesús ojere he’i chupe: – Peẽ fariséo niko pende apéguio peñemopotĩ porãmba. Pende ryepýguio katu pende ky’a. Pene renyhẽ monda ha ñañágui. Výro paha niko peẽ. Ndapeikuaái nga’u piko Ñandejára ojapo hague pe ñande ape ha ñande retepy. Peme’ẽ va’erã pende rapicha mboriahúpe umi mba’e perekóvagui, pende reko potĩ hag̃ua añete.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oiméramo ñañekonvida jakaru haguã peteĩ karai térã kuñakarai kate, ipláta hetáva ningo, ñamondéta ñande ao ikatevéva. Ñaguahẽramo umi óga ojajaipávape niko ndajaikuáai voi mba’éichapa ñapyrũta, mamópa jaguapýta ha mba’éichapa jakaru va’erã hamba’e. Ñatĩ ningo jaikóramo guarã ñande koygua itereíramo mba’e. Ha péina jahecha Hesu oñekonvida raka’e oho haguã peteĩ karai guasu fariséo rógape.

Ha ha’e katu oho voi. Notĩri háicha ojehe’a haguã hapicha mboriahu ha itavýva ndive, notĩri avei ojehe’a haguã karai guasu kuéra rehe. Opavavépe ombojoja ha peteĩcha oreko. Noñembohekoiete. Ndojejapói umi imirĩva renondépe ha noñemomirĩri karai guasu apytépe.

Ha’e oho ha’e háichaite ha jepiguáichante oñemonde ha ojapo upépe ha’e ojapo háicha opa ára. Ndoikói ojehechaukase mba’e avave renondépe. Pe karai rríko katu ohecha ramo Hesu ndojepohéiha okaru haguã. Ha Hesu upépe ombo’e chupe vyroreíre ojesarekoha.

Omopotĩ gua’uha ijapéguio hembiporu, upe hekove iky’a ha henyhẽ aja monda ha añágui. Marãve naiporã mo’ãi omopotĩ ha omboveráramo jepe hembiporu ha ijao kuéra, nomopotĩriramo hekove aña.

Ndaha’éi hína pe ñande ape ipotĩ, iky’a, osoro térã ikate, la ovaléva, he’i Hesu. Ñande py’ápe jarekóva ha upégui osẽva hína la he’iséva. Aña, jejapo, pokarẽ, pochy ha tie’ỹgui ñanerenyhẽramo, umíva hína la ñanemongy’áva.

Tajaverapa jepe ra’e kate ha porãgui ñande apéguio ñande py’a opyta iky’a ha itajasu. Ha ápe che irũ ha che reindy, Hesu omombe’u ñandéve mba’éichapa ikatu ñamopotĩ ñande py’a, ñambogue ñande pekádo, ha upe jave ñamopotĩ avei ñande ape: Ñame’ẽ mboriahúpe jarekóvagui, ñaipytyvõ oikotevẽvape ha ojerurévape. Pe tupãmba’e -limosna ha contribución- ñame’ẽva mboriahúpe, pohã mbarete hína, omongueráva ha omboje’óva heta Aña rapykuere oiméva ñande rekovépe.

Pa’i Jasy.