Ñahendu Jesús Ñe’ẽ. Jueves 28º Durante el Año

Escucha el evangelio y la reflexión en: https://youtu.be/mgOpDfWNkpc

Jueves 28º Durante el Año

Lucas 11, 47 – 54

Jesús he’i umi fariséo ha Moises léi mbo’ehakuérape: Cháke peẽ. Pemopu’ã niko panteon guasu-guasu hamba’e pene mandu’a hag̃ua profétakuérare ndaje, umi pende rukuéra ypykue voi ojuka va’ekue. Ha péicha pehechauka hína peteĩchanteha peẽ pende ypykue ndive. Ha’ekuéra ojuka va’ekue umi profétape, ha peẽ pemopu’ã chupekuéra panteon.

Upévare, iñarandúpe voi Ñandejára he’i va’ekue pende rehe: “Amondóta peẽme proféta ha apóstol. Hetápe pejuka vaerã ág̃a, ha hetápe pemuñáne opa rupi.”

Upévare, peẽ peikovéva ko’ág̃a, pende rehe Ñandejára omopẽta hína umi proféta jejukakue ko yvy ñepyrũ ypy guive. Oñepyrũta amo Abel ojejuka ramo guare guive, proféta Zacarías peve, ojejuka va’ekue pe altar oĩva tupao renonde pa’ũme. Che ha’e peẽme, Ñandejára oitytaha pende ári opa ko’ã mba’e.

Pejererekóke peẽ, Moisés léi pembo’éva. Peẽ niko peikuaa porã mba’épa he’ise pe Ñandejára rendápe ñag̃uahẽ. Amo ipahápe katu, ndapeikéi peẽ ha pemboty okẽ pende rapicha rováre ani hag̃ua avave oike.

Jesús osẽtavo upégui katu, umi Moisés léi ombo’éva ha umi fariséokuéra ipochypa hendive. Hetave mba’e oporandu chupe hikuái, ombopakova pireségui chupe. Oipota hikuái Jesús he’i he’i’ỹ va’erã, oheja vai hag̃ua chupe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

Umi ombokacháva káva téra kavichu’i raity niko upéi odipara va’erã ha okañy. Ndoipotáiramo oko’i hese ha ojepopĩa’o ipirére. Ha upéicha avei umi proféta, Ñandejára ojokuáiva he’i haguã opavavépe upe añeteguáva. Hendape’ỹva ohenonde’a, ha tembiapo vai oikuaauka haguã. Ha hetápe ningo ndogustái oje’e la añeteguáva.

Ko’ýte umi omandáva nohenduséi oúva omona hováre itrápo ky’akuéra oñomi porãva hikuái. Pévare ningo ymaite guive umi proféta oñemuña, ojeity kárselpe ha oime voi heta ojejuka va’ekue.

Oime avei proféta ko’ãgagua. Ñande rapicha cristiano, kuña ha kuimba’e, ojeroviágui Ñandejára rehe. Oñemoĩva umi ikangyve ha imboriahúva ykére ha osẽva mburuvicha mbarete rovái he’i ichupekuéra hembiapo vai, odefende haguã obrero, campesino, indígena, bañadogua, ha opa oikotevẽva derecho. Ha oime ndogustáiva peichagua cristiano. Oipotánte hikuái opyta tupaópe oñesũ ha oñembo’e purahéi ñembotypy upépe. Ani osẽ kállepe ha oike polítikape.

Ñande Papa Francisco katu, ha’e avei peteĩ proféta ko’ãgagua, oñeha’ãva ohapo’o ñande iglesia ryepýgui voi umi mba’e vai. Ha’e ñanemokyre’ỹ mbarete ñasẽ haguã kállepe, toiko ñande hegui “cristiano callehéro”, he’i háicha ha’e. Ani ñakañy ha jakyhyjégui ñañomi ñande jerovia tupao banco guýpe. Mba’épa ere ichupe che reindy ha nde che irũ.

Pa’i Jasy.